ಮಂಗಳೂರು: ನಗರದಲ್ಲಿ ಕುಟುಂಬವೊಂದು 9 ದಶಕಗಳಿಂದ ನಾಲ್ಕು ತಲೆಮಾರುಗಳ ಮೂಲಕ ಗಣೇಶನ ಮೂರ್ತಿ ತಯಾರಿಕಾ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದು, ದೂರದ ಅಮೆರಿಕದ ಕ್ಯಾಲಿಫೋರ್ನಿಯಾದಲ್ಲೂ ಈ ಕುಟುಂಬದ ಗಣೇಶನ ಮೂರ್ತಿಗೆ ಭಾರಿ ಬೇಡಿಕೆಯಿದೆ.
9 ದಶಕಗಳಿಂದ ಗಣೇಶ ಮೂರ್ತಿ ತಯಾರಿಕಾ ಕಾಯಕದಲ್ಲಿ ಕುಟುಂಬ: ಇವರ ಗಣಪತಿಗೆ ಅಮೆರಿಕದಲ್ಲೂ ಬೇಡಿಕೆ
ನಗರದ ಮಣ್ಣಗುಡ್ಡೆಯಲ್ಲಿರುವ ಈ ಕುಟುಂಬದ ಹಿರಿಯರಾದ ಮೋಹನ್ ರಾವ್ ಅವರು 9 ದಶಕಗಳ ಹಿಂದೆ ಗಣೇಶ ಮೂರ್ತಿ ತಯಾರಿಕಾ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದರು. ಆ ಬಳಿಕ ಅವರ ನಾಲ್ವರು ಮಕ್ಕಳು ಈ ಪರಂಪರೆಯನ್ನು ಮುಂದುವರಿಸಿಕೊಂಡು ಬರುತ್ತಿದ್ದಾರೆ. ಇದೀಗ ಅವರ ಮಕ್ಕಳು, ಮೊಮ್ಮಕ್ಕಳು ಇದರೊಂದಿಗೆ ಕೈಜೋಡಿಸುತ್ತಿದ್ದು, ಒಟ್ಟು ನಾಲ್ಕು ತಲೆಮಾರು ಈ ಕೈಂಕರ್ಯದಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದೆ.
ಕ್ಯಾಲಿಫೋರ್ನಿಯಾದ ಸ್ಯಾನ್ ಜೋಸ್‌ನಲ್ಲಿರುವ ಪ್ರಸನ್ನ ಗಣಪತಿ ದೇವಳದಲ್ಲಿ ಸಾರ್ವಜನಿಕ ಗಣೇಶೋತ್ಸವದಲ್ಲಿ ಆರಾಧನೆಗೊಳ್ಳುವ ಗಣೇಶನ ಮೂರ್ತಿ ಜೂನ್ 30ರಂದು ಇಲ್ಲಿಂದ ರವಾನೆಯಾಗಿದೆ. ಅಲ್ಲದೆ ಕೇರಳದ ಕಾಸರಗೋಡು ಕುಂಬಳೆಗೂ ಇಲ್ಲಿಂದಲೇ ಗಣೇಶನ ಮೂರ್ತಿ ಹೋಗುತ್ತದೆ.