ಶ್ರೀಲಂಕಾ ಸರಣಿ ಬಾಂಬ್ ಸ್ಫೋಟ : ಮೃತ ಜೆಡಿಎಸ್​ ಮುಖಂಡರ ಕುಟುಂಬಕ್ಕೆ ಶಾಸಕರಿಂದ ಸಾಂತ್ವನ

ಶ್ರೀಲಂಕಾ ರಾಜಧಾನಿ ಕೊಲಂಬೊದಲ್ಲಿ ಸಂಭವಿಸಿರುವ ಸರಣಿ ಬಾಂಬ್​​ ಸ್ಫೋಟದಲ್ಲಿ ರಾಜ್ಯದ ಮೂವರು ಜೆಡಿಎಸ್​​ ಮುಖಂಡರು ಮೃತಪಟ್ಟಿದ್ದಾರೆ. ಹೀಗಾಗಿ ಮೃತರ ಕುಟುಂಬಸ್ಥರಿಗೆ ಜೆಡಿಎಸ್​ ಶಾಸಕ ಶ್ರೀನಿವಾಸ್​ ಮೂರ್ತಿ ಸಾಂತ್ವನ ಹೇಳಿದ್ದಾರೆ. ಆದರೆ, ಇನ್ನುಳಿದವರು ಪತ್ತೆಯಾಗದ್ದಕ್ಕೆ ಆತಂಕ ಹೆಚ್ಚಿದೆ.

ನೆಲಮಂಗಲ: ಶ್ರೀಲಂಕಾದಲ್ಲಿ ನಡೆದ ಸರಣಿ ಬಾಂಬ್ ಸ್ಫೋಟದಲ್ಲಿ ಮೃತಪಟ್ಟ ಶಿವಕುಮಾರ್ ಮನೆಗೆ ಭೇಟಿ ನೀಡಿದ ಜೆಡಿಎಶ್‌ ಶಾಸಕ ಶ್ರೀನಿವಾಸ್ ಮೂರ್ತಿ, ಕುಟುಂಬ ಸದಸ್ಯರಿಗೆ ಸಾಂತ್ವನ ಹೇಳಿದರು.

ಕೊಲಂಬೊದ ಹೋಟೆಲ್​ವೊಂದರಲ್ಲಿ ವಾಸ್ತವ್ಯ ಹೂಡಿದ್ದ 7 ಮಂದಿಯಲ್ಲಿ ಜೆಡಿಎಸ್ ಮುಖಂಡರಾದ ಹನುಮಂತರಾಯಪ್ಪ, ರಂಗಪ್ಪ ಮತ್ತು ಶಿವಕುಮಾರ್ ದುರ್ಮರಣಕ್ಕೀಡಾಗಿದ್ದಾರೆ ಎನ್ನಲಾಗುತ್ತಿದೆ. ಲೋಕಸಭಾ ಚುನಾವಣೆ ಮುಗಿದ ನಂತರ ಮೃತ ಮೂವರು ಸೇರಿದಂತೆ ಒಟ್ಟು ಏಳು ಜನರು ಪ್ರವಾಸಕ್ಕೆ ತೆರೆಳಿದ್ದಾಗ ಈ ಘಟನೆ ಸಂಭವಿಸಿದೆ. ಆದರೆ, ಇನ್ನುಳಿದವರ ಪತ್ತೆಯಾಗಿಲ್ಲ.

ಸುಭಾಷ್ ನಗರದಲ್ಲಿರುವ ಮೃತ ಶಿವಕುಮಾರ್​ ಮನೆಗೆ ಭೇಟಿ ನೀಡಿದ ಬಳಿಕ ಸುದ್ದಿಗಾರರ ಜೊತೆ ಮಾತನಾಡಿದ ಶ್ರೀನಿವಾಸ್ ಮೂರ್ತಿ, ಮೂರು ಜನರ ಸಾವು ಬಹಳ ನೋವು ತಂದಿದೆ. ಇಂದು ನೆಲಮಂಗಲದ ಜನತೆಗೆ ಶೋಕದ ದಿನ. ಮೃತ ಜೆಡಿಎಸ್​​ ಮುಖಂಡರು ನೆಲಮಂಗಲಕ್ಕೆ ಉತ್ತಮ ಸಮಾಜಸೇವೆ ಮಾಡಿದ್ದರು. ಮೃತ ದೇಹ ತರಲು ಈಗಾಗಲೇ ನಾಲ್ಕು ಜನ ಕೊಲಂಬೊಗೆ ಹೋಗುವ ತಯಾರಿಯಲ್ಲಿದ್ದಾರೆ. ನನಗೆ ವೀಸಾ ದೊರೆತರೆ ತಾವೂ ಸಹ ಹೋಗುವುದಾಗಿ ತಿಳಿಸಿದರು.