'ರನ್ ಫಾರ್‌ ವೃಷಭಾವತಿ' ಮ್ಯಾರಥಾನ್​​ಗೆ ಸಾಥ್ ನೀಡಿದ ರಾಕಿಂಗ್ ಸ್ಟಾರ್..!

ವೃಷಭಾವತಿ ಒಡಲನ್ನು ಸ್ವಚ್ಛಗೊಳಿಸುವ ಸಲುವಾಗಿ ಯುವ ಬ್ರಿಗೇಡ್ ಸೆಪ್ಟೆಂಬರ್ 22 ರಂದು 'ರನ್ ಫಾರ್ ವೃಷಭಾವತಿ' ಮ್ಯಾರಥಾನ್ ಹಮ್ಮಿಕೊಂಡಿದೆ.

ಬೆಂಗಳೂರು:ವೃಷಭಾವತಿ ಒಡಲನ್ನು ಸ್ವಚ್ಛಗೊಳಿಸುವ ಸಲುವಾಗಿ ಯುವ ಬ್ರಿಗೇಡ್ ಸೆಪ್ಟೆಂಬರ್ 22 ರಂದು ಹಮ್ಮಿಕೊಂಡಿರುವ 'ರನ್ ಫಾರ್ ವೃಷಭಾವತಿ' ಮ್ಯಾರಥಾನ್​ಗೆ ನಟ ಯಶ್ ಕೈಜೋಡಿಸಿದ್ದಾರೆ. ವಿಡಿಯೋ ಮೂಲಕ ಹೆಚ್ಚಿನ ಸಂಖ್ಯೆಯಲ್ಲಿ ಮ್ಯಾರಥ್ಯಾನ್​​ನಲ್ಲಿ ಭಾಗವಹಿಸಿ ಅರಿವು ಮೂಡಿಸುವಂತೆ ರಾಕಿಂಗ್​​ ಸ್ಟಾರ್ ಕರೆಕೊಟ್ಟಿದ್ದಾರೆ.

ಬಿಬಿಎಂಪಿ ನಿರ್ಲಕ್ಷ್ಯ ಹಾಗೂ ಬೆಂಗಳೂರು ನಿವಾಸಿಗಳ ಬೇಜವಾಬ್ದಾರಿಯಿಂದ ವೃಷಭಾವತಿ ನದಿ ಗಬ್ಬೆದ್ದು ನಾರುತ್ತಿದೆ. ಇದರ ಸ್ವಚ್ಛಕ್ಕಾಗಿ ನಡೆಯುತ್ತಿರುವ ಮ್ಯಾರಥಾನ್​ಗೆ ಸ್ಟಾರ್ ನಟ ಕೈಜೋಡಿಸುವ ಮೂಲಕ ಮತ್ತಷ್ಟು ಮಹತ್ವ ಪಡೆದಿದೆ.

ವೃಷಭಾವತಿ ಒಂದು ಶ್ರೇಷ್ಠ ನದಿ. ಇದು ನಗರದ ಮಧ್ಯದಲ್ಲಿ ಹರಿಯುತ್ತದೆ. ಆದರೆ, ಸಂಪೂರ್ಣ ಕೊಳಚೆ ನೀರಿನಿಂದ ಕೂಡಿದೆ. ಆದ್ದರಿಂದ ಅದನ್ನು ಕಾಪಾಡಿ ನಗರದ ಅಂದ ಹೆಚ್ಚಿಸುವ ಸಲುವಾಗಿ ನದಿಯನ್ನು ಅಭಿವೃದ್ಧಿಪಡಿಸಲು ಯುವ ಬ್ರಿಗೇಡ್​ ಮುಂದಾಗಿದೆ.

ನದಿಯನ್ನು ಅವರು ಸ್ವಚ್ಛಗೊಳಿಸಿ, ಇವರು ಅಭಿವೃದ್ಧಿ ಮಾಡಲಿ ಎಂದುಕೊಂಡು ಸುಮ್ಮನಿದ್ದರೆ ಏನೂ ಆಗುವುದಿಲ್ಲ. ಯಾರು ಜವಾಬ್ದಾರಿಯನ್ನು ತೆಗೆದುಕೊಂಡು ಕೆಲಸ ಮಾಡುತ್ತಾರೋ ಅಂತವರನ್ನು ಕಂಡರೆ ನನಗೆ ಗೌರವ. ಅಂತಹ ಮನಸ್ಥಿತಿಯ ಬಗ್ಗೆ ನನಗೆ ತುಂಬಾ ನಂಬಿಕೆ, ಅದರಿಂದಲೇ ಅಭಿವೃದ್ಧಿ ಸಾಧ್ಯ ಎಂದು ಯಶ್​ ಹೇಳಿದ್ದಾರೆ.