ಬೆಂಗಳೂರು:ಕೊರೊನಾ ಸೋಂಕು ಸದ್ಯ ಎಲ್ಲೆಡೆ ತನ್ನ ಆರ್ಭಟ ತೋರುತ್ತಿದೆ. ಇದನ್ನು ತಡೆಯಲು ಕೊರೊನಾ ವಾರಿಯರ್ಸ್ ಹಗಲಿರುಳು ಶ್ರಮಿಸುತ್ತಿದ್ದು, ಇಂತಹ ಕೊರೊನಾ ವಾರಿಯರ್ವೊಬ್ಬರಿಗೆ ಸೈಬರ್ ಖದೀಮರು ವಂಚನೆ ಮಾಡಿದ್ದಾರೆ.
ಬೆಂಗಳೂರಿನ ಯಶವಂತಪುರದಲ್ಲಿ ಈ ಘಟನೆ ಬೆಳಕಿಗೆ ಬಂದಿದ್ದು, ಆಸ್ಪತ್ರೆಯೊಂದರಲ್ಲಿ ನರ್ಸ್ ಆಗಿ ಕೆಲಸ ಮಾಡುತ್ತಿರುವ ಯುವತಿಗೆ ನ್ಯಾಪ್ಟಾಲ್ ಜಾಹೀರಾತು ಕಂಪನಿಯ 918017216387 ನಂಬರ್ನಿಂದ ರಾಜೇಶ್ ಎಂಬ ವ್ಯಕ್ತಿ ಕರೆ ಮಾಡಿ 1 ಲಕ್ಷದ 20 ಸಾವಿರ ರೂಪಾಯಿಯ ಗಿಫ್ಟ್ ವೋಚರ್ ಬಂದಿದೆ ಎಂದಿದ್ದಾನೆ.
ಮೊದಲಿಗೆ ವಂಚಕನ ಮಾತನ್ನು ನಂಬದ ಯುವತಿ ಕರೆ ಸ್ಥಗಿತಗೊಳಿಸಿದ್ದಾಳೆ. ಮತ್ತೆ ಮತ್ತೆ ಕರೆ ಮಾಡಿದ ನಂತರ ಯುವತಿ ನಂಬಿದ್ದಾಳೆ. ಈ ವೇಳೆ ಗಿಫ್ಟ್ ವೋಚರ್ ಬೇಕಾದರೆ ಮೊದಲು ನಮ್ಮ ಅಕೌಂಟ್ಗೆ ಹಣ ಹಾಕಬೇಕು ಎಂದು ವಂಚಕ ಹೇಳಿದಾಗ ಹಂತ ಹಂತವಾಗಿ 1 ಲಕ್ಷದ 70 ಸಾವಿರ ರೂಪಾಯಿ ಹಣವನ್ನು ವಂಚಕನ ಖಾತೆಗೆ ಹಾಕಿದ್ದಾಳೆ.
ಕೆಲವು ದಿನಗಳ ನಂತರ ಅನುಮಾನಗೊಂಡ ಆಕೆ ಪರಿಶೀಲಿಸಿದಾಗ ತಾನು ಮೋಸ ಹೋಗಿರುವ ವಿಚಾರ ಬೆಳಕಿಗೆ ಬಂದಿದೆ. ಈ ಕುರಿತು ಯುವತಿ ಉತ್ತರ ವಿಭಾಗದ ಸೈಬರ್ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
