ಮುಂಬೈ :ಆ್ಯಪಲ್ ಕಂಪನಿಯ ಸಿಇಒ ಟಿಮ್ ಕುಕ್ ಸದ್ಯ ಭಾರತ ಪ್ರವಾಸದಲ್ಲಿದ್ದಾರೆ. ಭಾರತದ ಪ್ರಥಮ ಆ್ಯಪಲ್ ರಿಟೇಲ್ ಸ್ಟೋರ್ ಉದ್ಘಾಟನಾ ಸಮಾರಂಭದ ನಿಮಿತ್ತ ಅವರು ಭಾರತಕ್ಕೆ ಆಗಮಿಸಿದ್ದಾರೆ. ಸದ್ಯ ಅವರು ಬಾಲಿವುಡ್ ತಾರೆ ಮಾಧುರಿ ದೀಕ್ಷಿತ್ ಅವರೊಂದಿಗೆ ಮುಂಬೈನ ಫೇಮಸ್ ಖಾದ್ಯ ವಡಾ ಪಾವ್ ರುಚಿ ನೋಡಿದ್ದಾರೆ. ಮಾಧುರಿ ದೀಕ್ಷಿತ್ ಅವರೊಂದಿಗೆ ವಡಾ ಪಾವ್ ಸವಿಯುತ್ತಿರುವ ಚಿತ್ರವೊಂದನ್ನು ಟ್ವೀಟ್ ಮಾಡಿರುವ ಟಿಮ್, ಜೀವನದಲ್ಲಿ ಮೊದಲ ಬಾರಿಗೆ ನನಗೆ ವಡಾ ಪಾವ್ ತೋರಿಸಿದ್ದಕ್ಕೆ ನಿಮಗೆ ಧನ್ಯವಾದಗಳು ಎಂದು ದೀಕ್ಷಿತ್ರಿಗೆ ಹೇಳಿದ್ದಾರೆ. ವಡಾಪಾವ್ ತುಂಬಾ ರುಚಿಯಾಗಿತ್ತು ಎಂದು ಅವರು ಸಂತಸ ವ್ಯಕ್ತ ಪಡಿಸಿದ್ದಾರೆ.
ಇದಕ್ಕೂ ಮುನ್ನ ದೀಕ್ಷಿತ್ ತಾವು ಟಿಮ್ ಕುಕ್ ಅವರೊಂದಿಗೆ ವಡಾಪಾವ್ ಸವಿದ ಚಿತ್ರವೊಂದನ್ನು ಶೇರ್ ಮಾಡಿ, ಮುಂಬೈಗೆ ಸ್ವಾಗತ ಕೋರಲು ವಡಾ ಪಾವ್ಗಿಂತ ಬೆಸ್ಟ್ ಇನ್ನಾವುದೂ ಇರಲಾರದು ಎಂದು ಬರೆದಿದ್ದರು. ಇದಕ್ಕೂ ಮುನ್ನ ಟಿಮ್ ಕುಕ್, ಏಷ್ಯಾ ಹಾಗೂ ಭಾರತದ ಅತಿ ಸಿರಿವಂತ ಕುಟುಂಬವಾದ ಅಂಬಾನಿ ಕುಟುಂಬದ ಬಂಗಲೆಗೆ ಬೇಟಿ ನೀಡಿದ್ದರು. ಅಂಬಾನಿಯ ಆ್ಯಂಟಿಲಿಯಾ ಮನೆಗೆ ಭೇಟಿ ನೀಡಿದ ಕುಕ್, ರಿಲಯನ್ಸ್ ಜಿಯೊ ಚೇರಮನ್ ಆಕಾಶ್ ಅಂಬಾನಿ ಅವರನ್ನು ಭೇಟಿ ಮಾಡಿದರು. ಈ ಸಂದರ್ಭದಲ್ಲಿ ಇಬ್ಬರ ಮಧ್ಯೆ ವ್ಯಾಪಾರ ವಹಿವಾಟಿಗೆ ಸಂಬಂಧಿಸಿದಂತೆ ಮೀಟಿಂಗ್ ನಡೆಯಿತು ಎಂದು ಹೇಳಲಾಗಿದೆ.
ಮುಂಬೈನಲ್ಲಿ ಆ್ಯಪಲ್ ಸ್ಟೋರ್ ಆರಂಭವಾಗುತ್ತಿರುವ ಸಂಭ್ರಮಾಚರಣೆಗಾಗಿ ಟಿಮ್ ಕುಕ್ ಮುಂಬೈನ ಗಣ್ಯಾತಿಗಣ್ಯರಿಗಾಗಿ ಪಾರ್ಟಿ ಆಯೋಜಿಸಿದ್ದರು. ಬಾಲಿವುಡ್ ಸೆಲೆಬ್ರಿಟಿಗಳಾದ ಮಾಧುರಿ ದೀಕ್ಷಿತ್, ರವೀನಾ ಟಂಡನ್, ಮೌನಿ ರಾಯ್, ನೇಹಾ ಧೂಪಿಯಾ, ಶಿಲ್ಪಾ ಶೆಟ್ಟಿ, ಸೋನಾಲಿ ಬೇಂದ್ರೆ, ವಿದ್ಯಾ ಬಾಲನ್, ಸೋನಾಕ್ಷಿ ಸಿನ್ಹಾ, ಶಾಹಿದ್ ಕಪೂರ್ ಸೇರಿದಂತೆ ಹಲವಾರು ಗಣ್ಯರು ಪಾರ್ಟಿಯಲ್ಲಿ ಭಾಗವಹಿಸಿದ್ದರು.