ಮುಂಬೈ:ಪ್ರಸಕ್ತ ಆರ್ಥಿಕ ವರ್ಷದ ಎರಡನೇ ತ್ರೈಮಾಸಿಕದ ಜಿಡಿಪಿ ಬೆಳವಣಿಗೆಯ ದತ್ತಾಂಶಗಳು ಬಿಡುಗಡೆ ಆಗುವ ಮುನ್ನವೇ ಮುಂಬೈ ಷೇರುಪೇಟೆಯಲ್ಲಿ ಸೆನ್ಸೆಕ್ಸ್ ಮಹಾ ಕುಸಿತ ದಾಖಲಿಸಿದೆ.
ಕಳೆದ ವಾರದಿಂದ ದಾಖಲೆಯ ಏರಿಕೆಯಲ್ಲಿದ್ದ ನಿಫ್ಟಿ ಮತ್ತು ಸೆನ್ಸೆಕ್ಸ್ ಸೂಚ್ಯಂಕವು ನವೆಂಬರ್ ತಿಂಗಳ ಕೊನೆಯ ಮತ್ತು ವಾರಾಂತ್ಯದ ಶುಕ್ರವಾರದ ವಹಿವಾಟಿನಲ್ಲಿ ಕ್ರಮವಾಗಿ 115.70 ಹಾಗೂ 385.11 ಅಂಶಗಳ ಇಳಿಕೆ ಕಂಡಿದೆ.
ನಿನ್ನೆಯ (ಗುರುವಾರ) ವಹಿವಾಟಿನಂದು 41,130.17 ಅಂಶಗಳಿಗೆ ಕೊನೆಗೊಂಡಿದ್ದ ಸೆನ್ಸೆಕ್ಸ್, ಮಧ್ಯಾಹ್ನ 2.20ರ ವೇಳಗೆ 395.87 ಅಂಕಗಳ ಇಳಿಕೆ ಕಂಡು 40,734.30 ಅಂಶಗಳ ಮಟ್ಟದಲ್ಲಿ ವಹಿವಾಟು ನಿರತವಾಗಿತ್ತು. ನಿಫ್ಟಿ ಕೂಡ 115.70 ಅಂಶಗಳ ಇಳಿಕೆಯೊಂದಿಗೆ 12,037 ಅಂಕಗಳಲ್ಲಿ ತನ್ನ ನಕರಾತ್ಮಕ ವ್ಯವಹಾರ ಮುಂದುವರಿಸಿತು.
ಅಮೆರಿಕ - ಚೀನಾ ವ್ಯಾಪಾರ ಒಪ್ಪಂದದ ಕಳವಳಗಳ ನಡುವೆ ಏಷ್ಯಾ ಷೇರುಪೇಟೆಗಳು ಕಡಿಮೆ ಮಟ್ಟದ ವಹಿವಾಟು ನಡೆಸಿದವು. ಮಾರುಕಟ್ಟೆ ವಿಶ್ಲೇಷಕರ ಪ್ರಕಾರ, ನವೆಂಬರ್ ಎಫ್ & ಒ ಮುಕ್ತಾಯದ ದಿನದಂದು ವ್ಯಾಪಾರಿಗಳು ತಮ್ಮ ಲಾಭವನ್ನು ಕಾಯ್ದಿರಿಸುವ ನಿರೀಕ್ಷೆ ಇರಿಸಿಕೊಂಡಿದ್ದಾರೆ. ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿನ ನಿಧಾನಗತಿಯ ಆರ್ಥಿಕ ಬೆಳವಣಿಗೆಯ ನಿರೀಕ್ಷೆಗಳು ಹೂಡಿಕೆದಾರರ ಮನೋಭಾವ ಕ್ಷೀಣಿಸಲು ಕಾರಣವಾಗಿದೆ. ಎರಡನೇ ತ್ರೈಮಾಸಿಕದ ಭಾರತದ ಜಿಡಿಪಿ ದತ್ತಾಂಶಗಳ ಶುಕ್ರವಾರ ಘೋಷಿಸುವ ಸಾಧ್ಯತೆ ಇದೆ. ಈ ಎಲ್ಲ ಕಾರಣಗಳಿಂದ ಮುಂಬೈ ಪೇಟೆಯಲ್ಲಿ ಕುಸಿತ ಕಂಡುಬಂದಿದೆ ಎಂದು ವ್ಯಾಖ್ಯಾನಿಸಿದ್ದಾರೆ.
ಭಾರ್ತಿ ಏರ್ಟೆಲ್ ಮತ್ತು ಎನ್ಟಿಪಿಸಿ ಗರಿಷ್ಠ ಲಾಭ ಮಾಡಿಕೊಂಡರೇ ಎಚ್ಸಿಎಲ್ ಟೆಕ್, ಕೋಟಕ್ ಬ್ಯಾಂಕ್, ಐಟಿಸಿ, ಇಂಡಸ್ಲ್ಯಾಂಡ್ ಬ್ಯಾಂಕ್, ಮಾರುತಿ, ಎಚ್ಡಿಎಫ್ಸಿ ಬ್ಯಾಂಕ್, ಎಚ್ಡಿಎಫ್ಸಿ, ಬಜಾಜ್ ಫೈನಾನ್ಸ್, ಇನ್ಫೋಸಿಸ್, ಟಿಸಿಎಸ್, ಆಜಾಜ್ ಆಟೋ ಆ್ಯಕ್ಸಸ್ ಬ್ಯಾಂಕ್, ಟಾಟಾ ಮೋಟಾರ್ಸ್ ಷೇರುಗಳು ಕುಸಿತ ಕಂಡವು.