ಜಾಗತಿಕ ಮಟ್ಟದಲ್ಲಿ ಕುಸಿದ ಬೇಡಿಕೆ; ಸ್ತಬ್ಧವಾದ ರಫ್ತು: ದೇಶದ ಕೈಗಾರಿಕಾ ಉತ್ಪಾದನೆ ಗಣನೀಯ ಕುಸಿತ

ಕೊರೊನಾ ವೈರಸ್​ ಸಂಕಷ್ಟ ಈಗ ಭಾರತದ ಉತ್ಪಾದನಾ ವಲಯದ ಮೇಲೆಯೂ ಕರಿನೆರಳು ಮೂಡಿಸಿದೆ. ಒಂದು ಕಡೆ ಹೊಸ ಆರ್ಡರ್​ ಬರುವುದು ನಿಂತು ಹೋಗಿದ್ದು, ಇನ್ನೊಂದೆಡೆ ರಫ್ತು ಚಟುವಟಿಕೆಗಳು ಸಹ ಕುಸಿದಿವೆ.

ಹೊಸದಿಲ್ಲಿ: ಕೊರೊನಾ ವೈರಸ್​ ಭೀತಿ ಹಾಗೂ ಲಾಕ್​ಡೌನ್​ಗಳಿಂದಾಗಿ ಭಾರತದ ಕೈಗಾರಿಕಾ ಉತ್ಪಾದನೆ ಭಾರಿ ಕುಸಿತ ಕಂಡಿದೆ. ಕೊರೊನಾ ವೈರಸ್​ನಿಂದಾಗಿ ಜಾಗತಿಕ ಮಟ್ಟದಲ್ಲಿ ಬೇಡಿಕೆ ಕುಸಿಯುತ್ತಿರುವ ಹಿನ್ನೆಲೆಯಲ್ಲಿ ಭಾರತದ ಕೈಗಾರಿಕಾ ಉತ್ಪಾದನೆ ಕುಂಠಿತಗೊಂಡಿದೆ ಎಂದು ಆರ್ಥಿಕ ಸಮೀಕ್ಷೆಯಲ್ಲಿ ತಿಳಿದು ಬಂದಿದೆ.

ಕೈಗಾರಿಕೆ ಉತ್ಪನ್ನದ ಸೂಚ್ಯಂಕ ಪಿಎಂಐ ಸೂಚ್ಯಂಕ​ ಮಾರ್ಚ್​​ನಲ್ಲಿ 51.8 ರಷ್ಟಿದೆ. ಇದು ಫೆಬ್ರವರಿಯಲ್ಲಿ 54.5 ರಷ್ಟಿತ್ತು. 2019ರ ನವೆಂಬರ್​ ನಂತರದ ಅತಿ ನಿಧಾನಗತಿಯ ಉತ್ಪಾದನಾ ವಲಯದ ಬೆಳವಣಿಗೆ ಇದಾಗಿದೆ. ಮುಂದಿನ 12 ತಿಂಗಳ ಆರ್ಥಿಕ ಪ್ರಗತಿಯ ನಿರೀಕ್ಷೆಗಳು ನಿರಾಶಾದಾಯಕವಾಗಿವೆ. ಈಗ ವಿಧಿಸಲಾಗಿರುವ ಲಾಕ್​ಡೌನ್ ದೀರ್ಘಾವಧಿಯವರೆಗೆ ಮುಂದುವರೆಯಬಹುದೆಂಬ ಭೀತಿಯೂ ಹಿಂಜರಿತಕ್ಕೆ ಕಾರಣವಾಗಿದೆ ಎಂದು ಸಮೀಕ್ಷೆಯಲ್ಲಿ ಹೇಳಲಾಗಿದೆ.

ಭಾರತೀಯ ಉತ್ಪಾದಕರಿಗೆ ಬರುತ್ತಿರುವ ಹೊಸ ಆರ್ಡರ್​ಗಳ ಪ್ರಮಾಣ ಅತಿ ಕಡಿಮೆಯಾಗಿದ್ದು, ಅದೇ ಸಮಯಕ್ಕೆ ಹೊಸ ರಫ್ತು ಚಟುವಟಿಕೆಗಳು ಸಹ ಪಾತಾಳಕ್ಕೆ ಕುಸಿದಿವೆ. ಕೊರೊನಾ ವೈರಸ್​ ಕಾರಣದಿಂದ ಅತಿ ವೇಗವಾಗಿ ಭಾರತದ ಉತ್ಪಾದನಾ ವಲಯ ನೆಲ ಕಚ್ಚುತ್ತಿದೆ ಎಂದು ಹೇಳಲಾಗಿದೆ.