ಎಸ್​ಬಿಐ ಆ್ಯಪ್​ನಲ್ಲಿ ತಾಂತ್ರಿಕ ದೋಷ.. ಗ್ರಾಹಕರಿಗೆ ಸಾಲು ಸಾಲು ಸಂದೇಶ.. ಕಂಪ್ಲೇಂಟ್‌ ಬಳಿಕ ಸರಿಪಡಿಸಿದ ಬ್ಯಾಂಕ್​..

ದೇಶದ ಅತಿದೊಡ್ಡ ಬ್ಯಾಂಕಾದ ಎಸ್​ಬಿಐ ಯೋನೋ ಆ್ಯಪ್​ನಲ್ಲಿ ತಾಂತ್ರಿಕ ದೋಷವುಂಟಾಗಿ ಇಂದು ಹಲವಾರು ಗ್ರಾಹಕರು ಪರದಾಡಿದ್ದಾರೆ. ತಮಗೆ ಸಂಬಂಧಿಸದ ಹಲವಾರು ಸಂದೇಶಗಳನ್ನು ಪಡೆದು ಕಿರಿಕಿರಿ ಅನುಭವಿಸಿದ ಬಗ್ಗೆ ದೂರು ನೀಡಿದ ಬಳಿಕ ಬ್ಯಾಂಕ್​ ಆ್ಯಪ್​ನಲ್ಲಾದ ತಾಂತ್ರಿಕ ದೋಷವನ್ನು ಸರಿಪಡಿಸಿದೆ..

ನವದೆಹಲಿ :ಸ್ಟೇಟ್​ ಬ್ಯಾಂಕ್​ ಆಫ್ ಇಂಡಿಯಾದ ಆ್ಯಪ್​ನಲ್ಲಿ ಇಂದು ತಾಂತ್ರಿಕ ದೋಷ ಉಂಟಾಗಿ ಗ್ರಾಹಕರು ಪರದಾಡಿದ್ದಾರೆ. ಅಲ್ಲದೇ, ಸಾಲು ಸಾಲು ನೋಟಿಫಿಕೇಷನ್​ಗಳು ಗ್ರಾಹಕರ ಮೊಬೈಲ್​ಗೆ ಬಂದು ಕಿರಿಕಿರಿಯುಂಟು ಮಾಡಿವೆ. ಗ್ರಾಹಕರಿಂದ ದೂರು ಬಂದ ಬಳಿಕ ಎಚ್ಚೆತ್ತ ಬ್ಯಾಂಕ್​ ತಾಂತ್ರಿಕ ದೋಷವನ್ನು ಸರಿಪಡಿಸಿದೆ.

ಎಸ್​ಬಿಐ ಬ್ಯಾಂಕ್​ನ ಯೋನೋ ಆ್ಯಪ್​ ಮೂಲಕ ಗ್ರಾಹಕರಿಗೆ 'ನೀವು ವೈಯಕ್ತಿಕ ಹೊಸ ಸಾಲ ಪಡೆಯಲು ಅರ್ಹರಾಗಿದ್ದೀರಿ' ಎಂಬ 100ಕ್ಕೂ ಅಧಿಕ ಸಂದೇಶಗಳು ಬಂದಿವೆ. ಇದಲ್ಲದೇ, ತಮ್ಮದಲ್ಲದ ಹೆಸರಿನ ಗ್ರಾಹಕರ ಮಾಹಿತಿ ಸಂದೇಶ ತಮಗೆ ಬಂದಿದ್ದನ್ನು ಕಂಡು ಗಾಬರಿಯಾದ ಬಳಕೆದಾರರು ಯೋನೋ ಆ್ಯಪ್​ ಹ್ಯಾಕ್​ ಆಗಿದ್ದ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದರು.

ಅಲ್ಲದೇ, ಆ್ಯಪ್​ ಲಾಗಿನ್​ ಆಗಲು ಸಹಿತ ಸಾಧ್ಯವಾಗದೇ ಪರದಾಡಿದ್ದಾರೆ. ಅವರಿಗೆ ಬಂದ ಸಂದೇಶಗಳನ್ನು ಸ್ಕ್ರೀನ್​ ಶಾಟ್​ ಮೂಲಕ ಬ್ಯಾಂಕ್​ ಅಧಿಕೃತ ವೆಬ್​ಸೈಟ್​ಗೆ ಟ್ಯಾಗ್​ ಮಾಡಿ ಮಾಹಿತಿ ರವಾನಿಸಿ, ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದರು.

ನಾನು ಯೋನೋ ಲೈಟ್ ಅಪ್ಲಿಕೇಶನ್‌ನಲ್ಲಿ ವಿವಿಧ ಹೆಸರುಗಳಲ್ಲಿ ನಿರಂತರವಾಗಿ ಸಾಕಷ್ಟು ಅಧಿಸೂಚನೆಗಳನ್ನು ಸ್ವೀಕರಿಸಿದ್ದೇನೆ. ಈ ಸಂದೇಶಗಳಲ್ಲಿನ ಮಾಹಿತಿ ನನ್ನ ಖಾತೆಗೆ ಸಂಬಂಧಿಸಿದ್ದಲ್ಲ. ಇದನ್ನು ಶೀಘ್ರವೇ ನಿಲ್ಲಿಸಿ ಎಂದು ಶ್ರೀದತ್ ದೋಷಿ ಎಂಬ ಗ್ರಾಹಕರು ಟ್ವಿಟರ್​ನಲ್ಲಿ ಬರೆದುಕೊಂಡಿದ್ದಾರೆ.

ಇನ್ನೊಬ್ಬ ಬಳಕೆದಾರರು 'ಯೋನೋ ಅಪ್ಲಿಕೇಶನ್‌ನ ಅಪರಿಚಿತರ ಹೆಸರುಳ್ಳ ಸಂದೇಶಗಳು ನಮಗೆ ರವಾನೆಯಾಗುತ್ತಿವೆ. 100ಕ್ಕೂ ಅಧಿಕ ಮೆಸೇಜ್​ ಬಂದಿವೆ. ದಯಮಾಡಿ ಸಮಸ್ಯೆಯನ್ನು ತುರ್ತಾಗಿ ಪರಿಹರಿಸಿ' ಎಂದು ಟ್ವೀಟ್​ ಮಾಡಿದ್ದರು.

ಇದಲ್ಲದೇ ಹಲವಾರು ಗ್ರಾಹಕರು ಆ್ಯಪ್​ ಹ್ಯಾಕ್​ ಆಗಿರುವ ಬಗ್ಗೆಯೂ ಅನುಮಾನ ವ್ಯಕ್ತಪಡಿಸಿದ್ದಾರೆ. ಅಲ್ಲದೇ, ಆ್ಯಪ್​ ಬಳಕೆಯೂ ಸಾಧ್ಯವಾಗುತ್ತಿಲ್ಲ ಎಂದು ದೂರಿದ್ದರು.

ಗ್ರಾಹಕರ ದೂರುಗಳಿಂದ ಶೀಘ್ರವೇ ಎಚ್ಚೆತ್ತ ಬ್ಯಾಂಕ್​, ಇದು ತಾಂತ್ರಿಕ ದೋಷದಿಂದಾದ ಸಮಸ್ಯೆಯಾಗಿದೆ. ಗ್ರಾಹಕರಿಗಾದ ಸಮಸ್ಯೆಗೆ ವಿಷಾದಿಸುತ್ತೇವೆ ಎಂದು ಎಸ್​ಬಿಐ ಟ್ವೀಟ್​ ಮಾಡಿದೆ. ಅಲ್ಲದೇ, ಆ್ಯಪ್​ನಲ್ಲಾದ ತಾಂತ್ರಿಕ ದೋಷವನ್ನು ಸರಿಪಡಿಸಿದೆ.

ಓದಿ:ಐಟಿ ರಿಟರ್ನ್ಸ್, ಆಧಾರ್-ಪ್ಯಾನ್ ಕಾರ್ಡ್​​ ಜೋಡಣೆ ಮರೆಯದಿರಿ