ಕೊನೆಯಾಯ್ತಾ ಅಮೆರಿಕ- ಚೀನಾ ವ್ಯಾಪಾರ ಯುದ್ಧ... ಸರಿಯುತ್ತಾ ಕಾರ್ಮೋಡ!

ಚೀನಾ ಅಧ್ಯಕ್ಷ ಕ್ಸಿ ಜಿನ್​​ಪಿಂಗ್​​ ಜೊತೆ ಮಾತುಕತೆ ನಡೆಸಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​, ಎರಡೂ ರಾಷ್ಟ್ರಗಳ ಸಂಬಂಧ ಮತ್ತೆ ಹಳಿಗೆ ಮರಳಿದೆ ಎಂದು ಘೋಷಿಸಿದ್ದಾರೆ.

ಒಸಾಕ: ಚೀನಾ ವಸ್ತುಗಳ ಮೇಲೆ ಇನ್ಮುಂದೆ ಯಾವುದೇ ಹೊಸ ಸುಂಕ ಹಾಕದಿರಲು ಅಮೆರಿಕ ನಿರ್ಧರಿಸಿದೆ ಎಂದು ಹೇಳಲಾಗುತ್ತಿದೆ. ಜಪಾನ್​ನಲ್ಲಿ ನಡೆದ ಜಿ-20 ಶೃಂಗಸಭೆಯಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಹಾಗೂ ಚೀನಾ ಅಧ್ಯಕ್ಷ ಕ್ಸಿ ಜಿನ್​​ಪಿಂಗ್​​ ನಡುವೆ ಈ ವಿಚಾರವಾಗಿ ಮಾತುಕತೆ ನಡೆದ ಬಳಿಕ ಅಮೆರಿಕದಿಂದ ಈ ನಿರ್ಧಾರ ಹೊರ ಬಿದ್ದಿದೆ.

ಜಿ-20 ಶೃಂಗಸಭೆಯ 2ನೇ ಹಾಗೂ ಕೊನೆ ದಿನ ಅಮೆರಿಕ- ಚೀನಾ ನಾಯಕರ ನಡುವಣ ವ್ಯಾಪಾರ ಯುದ್ಧ ಹಾಗೂ ಮಾತುಕತೆ ಬಹಳ ಮಹತ್ವ ಪಡೆದುಕೊಂಡಿತ್ತು. ಮೀಟಿಂಗ್​ ಬಳಿಕ ಮಾತನಾಡಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​, ಎರಡೂ ರಾಷ್ಟ್ರಗಳ ಸಂಬಂಧ ಮತ್ತೆ ಹಳಿಗೆ ಮರಳಿದೆ ಎಂದು ಘೋಷಿಸಿದರು. ನಾವು ಇಂದು ಚೀನಾದೊಂದಿಗೆ ಸಕಾರಾತ್ಮಕ ಮಾತುಕತೆ ನಡೆಸಿದ್ದೇವೆ. ನಾವು ನಿರೀಕ್ಷಿಸಿದ್ದಕ್ಕಿಂತ ಹೆಚ್ಚಿನ ಸಕ್ಸಸ್​ ಆಗಿದೆ ಎಂದು ಹೇಳಿದರು.

ಈ ಮೂಲಕ ಅಮೆರಿಕ - ಚೀನಾ ನಡುವಣ ಸುಂಕೆ ಹೇರಿಕೆ ಕದನ ಬಹುತೇಕ ತೆರೆ ಬೀಳುವ ಸಾಧ್ಯತೆ ಇದ್ದು, ವಿಶ್ವದ ಇತರ ರಾಷ್ಟ್ರಗಳ ಮೇಲೆ ಬೀರುತ್ತಿದ್ದ ಅಡ್ಡ ಪರಿಣಾಮಗಳು ಕೊನೆಗೊಳ್ಳುವ ಎಲ್ಲ ಲಕ್ಷಣಗಳು ಕಂಡು ಬಂದಿವೆ.