ಜೊಮ್ಯಾಟೋ ಬಳಿಕ ಸ್ವಿಗ್ಗಿ ಸರದಿ: 1,100 ಉದ್ಯೋಗಿಗಳ ಕೆಲಸಕ್ಕೆ ಕತ್ತರಿ!

ಕೊರೊನಾ ವೈರಸ್‌ ಹೊಡೆತದಿಂದಾಗಿ ಫುಡ್‌ ಡೆಲಿವರಿ ಆ್ಯಪ್‌ ಸ್ವಿಗ್ಗಿ 1,100 ಮಂದಿ ಉದ್ಯೋಗಿಗಳನ್ನು ಕೆಲಸದಿಂದ ತೆಗೆಯಲು ಮುಂದಾಗಿದೆ.

ನವದೆಹಲಿ:ಲಾಕ್‌ಡೌನ್‌ನಿಂದಾಗಿ ಆ್ಯಪ್‌ ಆಧಾರಿತ ಫುಡ್‌ ಡೆಲಿವರಿ ಸಂಸ್ಥೆ ಜೊಮ್ಯಾಟೋ ಇತ್ತೀಚೆಗಷ್ಟೇ 600 ಉದ್ಯೋಗಿಗಳ ಕೆಲಸಕ್ಕೆ ಕತ್ತರಿ ಹಾಕಿದ್ದರು. ಇದರ ಬೆನ್ನಲ್ಲೇ ಮತ್ತೊಂದು ಫುಡ್‌ ಡೆಲಿವರಿ ಮಾಡುವ ಸ್ವಿಗ್ಗಿ ತನ್ನ ಸಂಸ್ಥೆಯ 1,100 ಮಂದಿ ಉದ್ಯೋಗಿಗಳನ್ನು ಮನೆಗೆ ಕಳುಹಿಸಲು ನಿರ್ಧರಿಸಿದೆ. ಆ ಮೂಲಕ ಕಂಪನಿಯ ಶೇಕಡಾ 14 ರಷ್ಟು ಉದ್ಯೋಗ ಕಡಿತಕ್ಕೆ ಮುಂದಾಗಿದೆ.

ಕೆಲಸ ಕಳೆದುಕೊಳ್ಳಲಿರುವ ಎಲ್ಲ ಉದ್ಯೋಗಿಗಳಿಗೆ ನೋಟಿಸ್‌ ಅವಧಿಯಲ್ಲಿ 3 ತಿಂಗಳ ಸಂಬಳ ನೀಡಲಾಗುತ್ತದೆ ಎಂದು ಸ್ವಿಗ್ಗಿಯ ಸಹ ಸಂಸ್ಥಾಪಕ ಮತ್ತು ಸಿಇಒ ಶ್ರೀಹರ್ಷ ಮಜೇಟಿ ಹೇಳಿದ್ದಾರೆ.

ಈ ಎಲ್ಲಾ ಸಿಬ್ಬಂದಿ ಪ್ರತಿ ವರ್ಷ ನಮ್ಮೊಂದಿಗೆ ಸಮಯ ಕಳೆದಿದ್ದಾರೆ. ಐದು ವರ್ಷ ಸ್ವಿಗ್ಗಿಯಲ್ಲಿ ಕೆಲಸ ಮಾಡಿದರು ಮೂರು ತಿಂಗಳ ನೋಟಿಸ್ ಅವಧಿ ಪೂರೈಸಿದರೆ ಅಂತಹವರಿಗೆ 8 ತಿಂಗಳ ಸಂಬಳ ಪಡೆಯಲಿದ್ದಾರೆ. ಕೆಲಸದಿಂದ ತೆಗೆಯುತ್ತಿರುವ ಬಗ್ಗೆ ಪ್ರತಿಯೊಬ್ಬರಿಗೂ ಒನ್‌ ಟು ಒನ್‌ ವಿಡಿಯೋ ಕಾಲ್‌ ಮೂಲಕ ಮಾಹಿತಿ ನೀಡುವುದಾಗಿ ತಿಳಿಸಿದೆ.

ಕೋವಿಡ್‌-19 ಮಹಾಮಾರಿಯ ಪರಿಣಾಮದಿಂದಾಗಿ ಕಂಪನಿಯು ಈಗಾಗಲೇ ತನ್ನ ಅಡುಗೆ ವ್ಯವಸ್ಥೆಯನ್ನ ತಾತ್ಕಾಲಿಕ ಅಥವಾ ಕಾಯಂ ಆಗಿ ಬಾಗಿಲು ಮುಚ್ಚುವ ಪ್ರಕ್ರಿಯೆಗೆ ಮುಂದಾಗಿದೆ ಎಂದು ಶ್ರೀಹರ್ಷ ಹೇಳಿದ್ದಾರೆ.