ನವದೆಹಲಿ:ಮೊಬೈಲ್ ದೂರ ಸಂಪರ್ಕದಲ್ಲಿ ಬದ್ಧ ವೈರಿಗಳಾಗಿ ಸ್ಪರ್ಧೆಯೊಡ್ಡುತ್ತಿರುವ ಜಿಯೋ ಹಾಗೂ ಭಾರ್ತಿ ಏರ್ಟೆಲ್ ಕಂಪನಿಗಳು ಉದ್ಯಮ ವಲಯದ ಮತ್ತೊಂದು ವಿಭಾಗದಲ್ಲಿ ಎದುರಾಳಿಯಾಗಿ ಕಾದಾಡುತ್ತಿವೆ.
ಝೀ ಎಂಟರ್ಟೈನ್ಮೆಂಟ್ ಎಂಟರ್ಪ್ರೈಸಸ್ನಲ್ಲಿ ಪಾಲುದಾರಿಕೆ ಬಿಡ್ ಸಲ್ಲಿಸಲು ಉಭಯ ಕಂಪನಿಗಳು ಮುತುವರ್ಜಿ ವಹಿಸುತ್ತಿವೆ ಎಂದು ಉದ್ಯಮ ಮೂಲಗಳು ತಿಳಿಸಿವೆ.
ಝೀ ಎಂಟರ್ಟೈನ್ಮೆಂಟ್ ಸ್ವಾಧೀನಪಡಿಸಿಕೊಳ್ಳಲು ಜಪಾನಿನ ಪ್ರಮುಖ ಮಾಧ್ಯಮ ಸೋನಿ ಕಾರ್ಪೊರೇಷನ್ ಸಹ ಬಿಡ್ ಸಲ್ಲಿಸುವ ಉತ್ಸಹದಲ್ಲಿತ್ತು. ಆದರೆ, ಮೌಲ್ಯಮಾಪನದ ವ್ಯತ್ಯಾಸ ಉಲ್ಲಂಘನೆಯಿಂದ ತನ್ನ ಬಿಡ್ ಸ್ಥಗಿತಗೊಳಿಸಿದೆ. ಅಮೆರಿಕದ ಕೇಬಲ್ ಕಂಪನಿ ಕಾಮ್ಕ್ಯಾಸ್ಟ್- ಅಟೈರೋಸ್ ಸಹ ಝೀ ಸ್ವಾಧೀನದ ಮಾತುಕತೆಯಲ್ಲಿ ಮುಂಚೂಣಿಯಲ್ಲಿದೆ.
ಉದ್ಯಮದಲ್ಲಿ ಝೀ ಸ್ಟೇಕ್ ಮಾರಾಟದ ಸಂಗತಿ ಹೊರ ಬೀಳುತ್ತಿದ್ದಂತೆ ತೆರೆಮರೆಯಲ್ಲಿ ಪ್ರತಿ ಸ್ಪರ್ಧಿಗಳ ಕಸರತ್ತು ನಡೆಯುತ್ತಿದೆ. ಆದರೆ, ಕೆಲವು ಕಂಪನಿಗಳು ಈ ಬಗ್ಗೆ ಪ್ರತಿಕ್ರಿಯೆ ನೀಡಲು ನಿರಾಕರಿಸಿವೆ. ಭಾರ್ತಿ ಏರ್ಟೆಲ್ ವಕ್ತಾರರು, 'ಏರ್ಟೆಲ್ ಝೀ ಖರೀದಿಸುವ ರೇಸಿಂಗ್ ಸ್ಪರ್ಧೆಯಲ್ಲಿ ಇಲ್ಲ' ಎಂದು ಸ್ಪಷ್ಟನೆ ನೀಡಿದ್ದಾರೆ.
ಸುಭಾಷ್ ಚಂದ್ರ ನೇತೃತ್ವದ ಎಸ್ಸೆಲ್ ಗ್ರೂಪ್ಗೆ ಹೊಡೆತ ಬೀಳುತ್ತಿದೆ. ಹಣಕಾಸಿನ ಒತ್ತಡದಿಂದಾಗಿ ಝೀ ಎಂಟರ್ಟೈನ್ಮೆಂಟ್ನಲ್ಲಿನ ತನ್ನ ಪಾಲಿನ ಷೇರುಗಳನ್ನು ಮಾರಾಟ ಮಾಡಲು ಯೋಜಿಸುತ್ತಿದೆ. ಎಸ್ಸೆಲ್ ಗ್ರೂಪ್ ಪ್ರವರ್ತಕರು ಹಣಕಾಸು ಬಿಕ್ಕಟ್ಟು ಆರಂಭವಾದ ಈ ವರ್ಷದಿಂದ ಕಂಪನಿಯ ಷೇರುಗಳನ್ನು ಮಾರಾಟ ಮಾಡಲು ಆರಂಭಿಸಿದ್ದಾರೆ.