ಗೆಳಯನ ನಿವೃತ್ತಿ ಕುರಿತು ಹೃದಯ ಸ್ಪರ್ಷಿ ಸಂದೇಶ ನೀಡಿದ ಸೆಹ್ವಾಗ್​

ಭಾರತ ಕಂಡ ಕ್ರಿಕೆಟ್​ನ ಸೂಪರ್ ಸ್ಟಾರ್​ ಯುವರಾಜ್​ ಸಿಂಗ್​ ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ನಿವೃತ್ತಿ ಘೋಷಿಸಿರುವುದರಿಂದ ಹಲವು ವರ್ಷಗಳ ಕಾಲ ಅವರ ಜೊತೆ ಕ್ರಿಕೆಟ್​ ಆಡಿದ ಭಾರತ ತಂಡದ ಹಾಲಿ ಹಾಗೂ ಮಾಜಿ ಆಟಗಾರರು ಶುಭಕೋರಿದ್ದಾರೆ.

ಮುಂಬೈ: ಭಾರತಯ ಕಂಡ ಶ್ರೇಷ್ಠ ಆಲ್​ರೌಂಡರ್​ ಯುವರಾಜ್​ ಸಿಂಗ್​ ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ನಿವೃತ್ತಿ ಘೋಷಿಸಿದ ಹಿನ್ನೆಲೆಯಲ್ಲಿ ಭಾರತ ಮಾಜಿ ಕ್ರಿಕೆಟಿಗರು ಯುವರಾಜ್​ ಸಿಂಗ್​ ಮುಂದಿನ ಜೀವನ ಸುಖಕರವಾಗಿರಲಿ ಎಂದು ಹೇಳಿದ್ದಾರೆ.

ಯುವರಾಜ್​ ಜೊತೆ ದಶಕಗಳ ಕಾಲ ಕ್ರಿಕೆಟ್​ ಆಡಿರುವ ಸ್ಫೋಟಕ ಬ್ಯಾಟ್ಸ್​ಮನ್​ ವಿರೇಂದ್ರ ಸೆಹ್ವಾಗ್​ ಯುವರಾಜ್​ ಕುರಿತು ರೋಮಾಂಚನಕಾರಿ ಸಂದೇಶದ ಮೂಲಕ ಶುಭಕೋರಿದ್ದಾರೆ. " ಕ್ರಿಕೆಟ್​ಗೆ​ ಆಟಗಾರರು ಬರಬಹುದು, ಹೋಗಬಹುದು ಆದರೆ ಯುವರಾಜ್​ ಸಿಂಗ್​ರಂತಹ ಆಟಗಾರರು ಸಿಗುವುದು ಮಾತ್ರ ತುಂಬಾ ಅಪರೂಪ, ತಮ್ಮ ಜೀವನದಲ್ಲಿ ಹಲವಾರು ನೋವುಗಳನ್ನು ಎದುರಿಸಿದ ಯುವಿ, ನೋವನ್ನೇ ಗೆದ್ದು ತೋರಿಸಿದವರು. ಕ್ರಿಕೆಟ್​ಗೆ ರೀ ಎಂಟ್ರಿ ನೀಡಿ ಬೌಲರ್​ಗಳನ್ನು ಸೋಲಿಸಿ ಕೋಟ್ಯಂತರ ಅಭಿಮಾನಿಗಳ ಹೃದಯ ಗೆದ್ದಿದ್ದಾರೆ. ಯುವಿಯ ಹೋರಾಟ ಮತ್ತು ಆತ್ಮಸ್ಥೈರ್ಯದ ಗುಣ ನೂರಾರು ಜನರಿಗೆ ಸ್ಪೂರ್ತಿ" ಎಂದಿರುವ ವೀರೂ ಅವರ ಮುಂದಿನ ಜೀವನ ಉತ್ತಮವಾಗಿರಲಿ ಎಂದು ಶುಭಕೋರಿದ್ದಾರೆ.

ನಿಮ್ಮ ಕ್ರಿಕೆಟ್​ ಜೀವನದ ತುಂಬಾ ಅದ್ಭುತವಾಗಿತ್ತ, ನೀವೊಬ್ಬ ನಿಜವಾದ ಚಾಂಪಿಯನ್​ ಆಗಿದ್ದು, ತಂಡ ಯಾವಾಗಲು ನಿಮ್ಮ ಸೇವೆಯನ್ನು ಬಯಸುತ್ತಿತ್ತು. ಮೈದಾನದಲ್ಲಿ ಮತ್ತು ಮೈದಾನದ ಹೊರಗೆ ನೀವು ಹಲವು ಏಳು ಬೀಳುಗಳನ್ನ ದಿಟ್ಟವಾಗಿ ಎದುರಿಸಿದ ರೀತಿ ಊಹೆಗೆ ಮೀರಿದ್ದಾಗಿದೆ. ನಿಮ್ಮ ಜೀವನದ 2ನೇ ಇನ್ನಿಂಗ್ಸ್​ ಉತ್ತಮವಾಗಿರಲಿ ಎಂದು ಕ್ರಿಕೆಟ್​ ದೇವರೆಂದೇ ಖ್ಯಾತರಾದ ಸಚಿನ್​ ತೆಂಡೂಲ್ಕರ್​ ಅಭಿನಂದನೆ ಸಲ್ಲಿಸಿದ್ದಾರೆ.

ಮಾಜಿ ಕ್ರಿಕೆಟಿಗ ಹಾಲಿ ಎಂಪಿಯಾಗಿರುವ ಗೌತಮ್​ ಗಂಭೀರ್​, ಭಾರತ ಕಂಡ ಸೀಮಿತ ಓವರ್​ಗಳ ಕ್ರಿಕೆಟಿನಲ್ಲಿ ನೀವು ಅತ್ಯುತ್ತಮ ಆಟಗಾರ. ನಾನು ಕೂಡ ನಿಮ್ಮ ಹಾಗೆ ಬ್ಯಾಟಿಂಗ್​ ಮಾಡಬೇಕೆಂದೆನಿಸಿತ್ತು. ಬಿಸಿಸಿಐ 12 ನೇ ನಂಬರ್​ ಜರ್ಸಿಯನ್ನು ನಿಮ್ಮ ಕೆರಿಯರ್​ಗೆ ಅರ್ಪಿಸಬೇಕು ಎಂದು ತಿಳಿಸಿ ಯುವರಾಜ್​ಗೆ​ ಅಭಿನಂದನೆ ಸಲ್ಲಿಸಿದ್ದಾರೆ.

ನಿಮ್ಮ ಜೊತೆ ಆಡಿದ್ದು ನಮಗೆ ತುಂಬಾ ಖುಷಿ ನೀಡಿದೆ. ನೀವು ಕ್ರಿಕೆಟ್​ ಇತಿಹಾಸದಲ್ಲೆ ಅತ್ಯುತ್ತಮ ಕ್ರಿಕೆಟರ್​ನಲ್ಲಿ ಒಬ್ಬರು. ನಮಗೆ ಮತ್ತು ಇಂದಿನ ಯುವ ಕ್ರಿಕೆಟಿಗರಿಗೂ ನಿಮ್ಮ ತಾಳ್ಮೆ, ಸಂಕಲ್ಪ, ಉತ್ಸಾಹವನ್ನು ಆಟದಲ್ಲಿ ತೋರಿಸುವ ಗುಣ ಮಾದರಿ ಎಂದು ತಿಳಿಸಿರುವ ವಿವಿಎಸ್​ ಲಕ್ಷ್ಮಣ್​ ಯುವಿ ಮುಂದಿನ ಜೀವನಕ್ಕೆ ಶುಭಕೋರಿದ್ದಾರೆ.

ನಿಮ್ಮ ಅದ್ಭುತ ಕ್ರಿಕೆಟ್​ ಜೀವನದಲ್ಲಿ ದೇಶವನ್ನು ಪ್ರತಿನಿಧಿಸಿದ್ದಕ್ಕೆ ಅಭಿನಂದನೆಗಳು. ನೀವು ನಮಗಾಗಿ ಹಲವು ನೆನೆಪು, ಗೆಲುವುಗಗಳನ್ನು ಬಿಟ್ಟು ಹೋಗಿದ್ದೀರಾ ನಿಮ್ಮ ಜೀವನ ಯಶಸ್ವಿಯಾಗಿರಲಿ ಎಂದು ಭಾರತ ತಂಡದ ನಾಯಕ ವಿರಾಟ್​ ಕೊಹ್ಲಿ ಟ್ವೀಟ್​ ಮಾಡಿದ್ದಾರೆ.

ಸುರೇಶ್​ ರೂನಾ, ಮೊಹಮ್ಮದ್​ ಕೈಫ್​, ರಿಷಭ್​ ಪಂತ್​, ಕೆವಿನ್​ ಪೀಟರ್​ಸನ್​, ಪ್ರಗ್ಯಾನ್​ ಓಜಾ, ಸಂಜಯ್​ ಮಂಜ್ರೇಕರ್​, ಮಯಾಂಕ್​ ಅಗರ್​ವಾಲ್​ ಸೇರಿದಂತೆ ಹಲವಾರು ಹಾಲಿ ಮಾಜಿ ಕ್ರಿಕೆಟಿಗರು, ಐಪಿಎಲ್​ನ ಹಲವು ಪ್ರಾಂಚೈಸಿಗಳು ಯುವರಾಜ್​ಸಿಂಗ್​ಗೆ ಶುಭಕೋರಿವೆ.