ಆರ್ಥಿಕ ದಿವಾಳಿ​​: ಎಲ್ಲರೂ ಸಂಪತ್ತು ಘೋಷಿಸಿ, ಟ್ಯಾಕ್ಸ್​ ಭರಿಸುವಂತೆ ಇಮ್ರಾನ್​ ​ ಮನವಿ!

ಆರ್ಥಿಕ ದಿವಾಳಿಗೆ ಸಿಲುಕಿ ಕಂಗಾಲಾಗಿರುವ ಪಾಕ್​ ಈಗ ತೆರಿಗೆ ಸಂಗ್ರಹಕ್ಕೆ ಮುಂದಾಗಿದೆ. ಈ ಸಂಬಂಧ ಅಲ್ಲಿನ ಪ್ರಧಾನಿ ಮನವಿ ಮಾಡಿಕೊಂಡಿದ್ದು, ತಮ್ಮ ಬಳಿಯ ಅಘೋಷಿತ ಆಸ್ತಿಯ ಮಾಹಿತಿ ನೀಡುವಂತೆ ಮನವಿ ಮಾಡಿಕೊಂಡಿದ್ದಾರೆ.

ಇಸ್ಲಾಮಾಬಾದ್​: ಆರ್ಥಿಕ ದಿವಾಳಿಯಲ್ಲಿ ಸಿಲುಕಿ ನೆರೆಯ ಪಾಕ್​ ಒದ್ದಾಡುತ್ತಿದ್ದು, ಇದರ ಮಧ್ಯೆ ಅಲ್ಲಿನ ನಿವಾಸಿಗಳಿಗೆ ತಮ್ಮ ಸಂಪತ್ತು ಘೋಷಣೆ ಮಾಡಿ ಜೂನ್​ 30ರೊಳಗೆ ತೆರಿಗೆ ಭರಿಸುವಂತೆ ಅಲ್ಲಿನ ಪ್ರಧಾನಿ ಇಮ್ರಾನ್​ ಖಾನ್​ ಮನವಿ ಮಾಡಿಕೊಂಡಿದ್ದಾರೆ.

ನಾಳೆ ಪಾಕಿಸ್ತಾನದ ಬಜೆಟ್​ ಮಂಡನೆಯಾಗಲಿದ್ದು, ಅದಕ್ಕೂ ಮುನ್ನಾದಿನವಾದ ಇಂದು ಸಚಿವ ಸಂಪುಟ ಸಭೆ ನಡೆಸಿ, ಈ ನಿರ್ಧಾರ ಕೈಗೊಂಡಿದ್ದಾರೆ. ಈಗಾಗಲೇ ಲಭ್ಯವಾಗಿರುವ ಮಾಹಿತಿ ಪ್ರಕಾರ ಪಾಕ್​​ನಲ್ಲಿ 20 ಕೋಟಿ ಜನರಲ್ಲಿ ಕೇವಲ 14 ಲಕ್ಷ ಜನರು ಟ್ಯಾಕ್ಸ್​ ತುಂಬುತ್ತಿದ್ದಾರೆ. ಹೀಗಾಗಿ ಪಾಕ್​ ಪ್ರಧಾನಿ ಈ ಘೋಷಣೆ ಮಾಡಿದ್ದಾರೆ.

ಸಂಪತ್ತು ಘೋಷಣೆ ಯೋಜನೆಯಲ್ಲಿ ನೀವು ಭಾಗಿಯಾಗಿ ಸರ್ಕಾರಕ್ಕೆ ಸಹಾಯ ಮಾಡುವಂತೆ ಇಮ್ರಾನ್​ ಖಾನ್​ ಮನವಿ ಮಾಡಿಕೊಂಡಿದ್ದು, ನಿಮ್ಮ ಮಕ್ಕಳ ಭವಿಷ್ಯದ ದೃಷ್ಠಿಯಿಂದ ಈ ನಿರ್ಧಾರಕ್ಕೆ ಕೈಜೋಡಿಸಿ ಎಂದು ತಿಳಿಸಿದ್ದಾರೆ.

ಕಳೆದ ಕೆಲ ವರ್ಷಗಳಿಂದ ದೇಶ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿ ನಲುಗುತ್ತಿದ್ದು, ನೀವೆಲ್ಲರೂ ದೇಶದ ಅಭಿವೃದ್ಧಿಗಾಗಿ ಕೊಡುಗೆ ನೀಡಬೇಕಾಗಿದ್ದು, ಬಲಿಷ್ಠ ಪಾಕಿಸ್ತಾನ ನಿರ್ಮಾಣಕ್ಕಾಗಿ ಆರ್ಥಿಕವಾಗಿ ಸಹಾಯ ಮಾಡಿ ಎಂದು ಕೇಳಿಕೊಂಡಿದ್ದಾರೆ.