ಸ್ಮಿತ್​ ಹಿಯ್ಯಾಳಿಸದಿರಿ ಎಂದ ಕೊಹ್ಲಿ ನಡೆ ಸರಿಯಲ್ಲ! ಇಂಗ್ಲಿಷ್​​ ಕ್ರಿಕೆಟಿಗನಿಂದ ಟ್ವೀಟ್​!

ಎದುರಾಳಿ ತಂಡದ ಆಟಗಾರನ ಬಗ್ಗೆ ಕೊಹ್ಲಿ ನಡೆದುಕೊಂಡ ರೀತಿಗೆ ಇಡೀ ಕ್ರಿಕೆಟ್​ ಜಗತ್ತೇ ಪ್ರಶಂಸೆ ವ್ಯಕ್ತಪಡಿಸಿತ್ತು. ಆದ್ರೆ, ಇಂಗ್ಲೆಂಡ್​ನ ಮಾಜಿ ಕ್ರಿಕೆಟಿಗ ನಿಕ್​ ಕಾಂಪ್ಟನ್​ ಟೀಂ ಇಂಡಿಯಾ ನಾಯಕನ ನಡೆಯನ್ನು ಪ್ರಶ್ನಿಸಿದ್ದಾರೆ.

ನವದೆಹಲಿ​: ಭಾರತದ-ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ಕ್ರೀಡಾಂಗಣದಲ್ಲಿ ತುಂಬಿದ್ದ ಭಾರತೀಯ ಅಭಿಮಾನಿಗಳು 'ಚೀಟರ್,​ ಚೀಟರ್'​ ಎಂದು ಹೀಯಾಳಿಸಿರುವುದಕ್ಕೆ ಕೋಪಗೊಂಡ ಕೊಹ್ಲಿ, ಉತ್ತಮವಾಗಿ ಫೀಲ್ಡ್​ ಮಾಡಿದ ಸ್ಮಿತ್​ರನ್ನು ಚಪ್ಪಾಳೆ ತಟ್ಟಿ ಬೆಂಬಲಿಸುವಂತೆ ಎಂದು ಸನ್ನೆ ಮಾಡಿ ತೋರಿಸಿದ್ದರು.

ಎದುರಾಳಿ ತಂಡದ ಆಟಗಾರನ ಬಗ್ಗೆ ಕೊಹ್ಲಿ ಕ್ರಿಕೆಟಿಂಗ್ ಸ್ಪಿರಿಟ್‌ಗೆ ಇಡೀ ಕ್ರಿಕೆಟ್​ ಜಗತ್ತೇ ಹಾಡಿ ಹೊಗಳಿತ್ತು. ಆದ್ರೆ, ಇಂಗ್ಲೆಂಡ್​ನ ಮಾಜಿ ಕ್ರಿಕೆಟಿಗ ನಿಕ್​ ಕಾಂಪ್ಟನ್‌ಗೆ ಇದು ಪಥ್ಯವಾಗಿಲ್ಲ. ಕೊಹ್ಲಿ ನಡೆಯನ್ನು ಪ್ರಶ್ನಿಸಿದ ಮಾಜಿ ಆಟಗಾರ ನಿಕ್​ ಕಾಂಪ್ಟನ್, ಕೊಹ್ಲಿ ಅಭಿಮಾನಿಗಳನ್ನು ತಡೆಯಬಾರದಿತ್ತು, ಸ್ಮಿತ್​ ತಪ್ಪು ಮಾಡಿದ್ದಾರೆ, ಆದ್ದರಿಂದಲೇ ಅವರನ್ನು ಅಭಿಮಾನಿಗಳು 'ಚೀಟರ್ಸ್'​ ಎಂದಿದ್ದಾರೆ. ಅಭಿಮಾನಿಗಳನ್ನು ಪ್ರಶ್ನಿಸುವ ಹಕ್ಕು ಯಾರಿಗೂ ಇಲ್ಲ ಎಂದು ಟ್ವೀಟ್​ ಮಾಡಿದ್ದರು.

ಟ್ವೀಟ್​ಗೆ ಸಾಮಾಜಿಕ ಜಾಲಾತಾಣದಲ್ಲಿ ಟೀಕೆ ವ್ಯಕ್ತವಾದ ಬಳಿಕ ಎಚ್ಚೆತ್ತುಕೊಂಡ ನಿಕ್​ ಮತ್ತೊಂದು ಟ್ವೀಟ್​ನಲ್ಲಿ, ನನ್ನ ಕಾಮೆಂಟ್​ ಅನ್ನು ತಪ್ಪಾಗಿ ಅರ್ಥೈಸಿಕೊಳ್ಳಲಾಗಿದೆ. ನಾನು ಕೊಹ್ಲಿ ಮಾಡಿದ್ದ ತಪ್ಪು ಎಂದಿಲ್ಲ. ಕ್ರೀಡಾಂಗಣದಲ್ಲಿ ಅಭಿಮಾನಿಗಳು ಎಂಜಾಯ್​ ಮಾಡಲು ಹಾಗೂ ಅವರಿಗಿಷ್ಟ ಬಂದಂತೆ ಇರುವಂತೆ ಬಿಡಬೇಕು ಎಂಬರ್ಥದಲ್ಲಿ ಹೇಳಿರುವೆ ಎಂದು ಸಮರ್ಥನೆ ನೀಡಿದ್ದಾರೆ.

ನನ್ನಿಂದ ಯಾರಿಗಾದರು ನೋವಾಗಿದ್ದರೆ ಕ್ಷಮೆಯಿರಲಿ ಎಂದಿರುವ ನಿಕ್​ ಕಾಂಪ್ಟನ್​ ಆಟವನ್ನು ಎಂಜಾಯ್​ ಮಾಡೋಣ ಎಂದು ವಿವಾದಕ್ಕೆ ತೆರೆ ಎಳೆದಿದ್ದಾರೆ.