ಚೆನ್ನೈ: ಪ್ಲೆಸಿಸ್, ಧೋನಿ ಬ್ಯಾಟಿಂಗ್ ಹಾಗೂ ಸ್ಪಿನ್ ಬೌಲಿಂಗ್ ನೆರವಿನಿಂದ ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧ ಚೆನ್ನೈ ಸೂಪರ್ ಕಿಂಗ್ಸ್ 22 ರನ್ಗಳ ಗೆಲುವು ದಾಖಲಿಸಿದೆ.
ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಚೆನ್ನೈ ತಂಡ 20 ಓವರ್ಗಳಲ್ಲಿ 3 ವಿಕೆಟ್ ಕಳೆದುಕೊಂಡು 160 ರನ್ ಗಳಿಸಿತು. ಈ ಆವೃತ್ತಿಯಲ್ಲಿ ಚೊಚ್ಚಲ ಪಂದ್ಯವಾಡಿದ ಆಫ್ರಿಕಾದ ಡು ಪ್ಲೆಸಿಸ್ 38 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿದರೆ, ನಾಯಕ ಧೋನಿ ಕೊನೆಯಲ್ಲಿ ಮತ್ತೊಮ್ಮೆ ತಮ್ಮ ಬಲಿಷ್ಠ ಹೊಡೆತಗಳಿಂದ 23 ಎಸೆತಗಳಲ್ಲಿ 37 ರನ್ ಗಳಿಸಿ 160 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಲು ನೆರವಾದರು.
ಪಂಜಾಬ್ ಪರ ನಾಯಕ ಆರ್. ಅಶ್ವಿನ್ 23 ರನ್ ನೀಡಿ 3 ವಿಕೆಟ್ ಪಡೆದರು.
161 ರನ್ಗಳ ಗುರಿ ಪಡೆದ ಪಂಜಾಬ್ ಕೇವಲ 7 ರನ್ ಗಳಿಸುವಷ್ಟರಲ್ಲಿ 2 ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತ ಅನುಭವಿಸಿತು. ಧೋನಿಯ ಚಾಣಾಕ್ಷ ನಾಯಕತ್ವದಿಂದ ಶಾರ್ದುಲ್ ಬದಲು ಕಣಕ್ಕಿಳಿದಿದ್ದ ಹರಭಜನ್ ಈ ಇಬ್ಬರು ದಾಂಡಿಗರನ್ನು ಪೆವಿಲಿಯನ್ಗಟ್ಟಿದರು.
ನಂತರ ಒಂದಾದ ರಾಹುಲ್(55), ಸರ್ಫರಾಜ್ ಖಾನ್(67) 3ನೇ ವಿಕೆಟ್ಗೆ 110 ರನ್ಗಳ ಜೊತೆಯಾಟ ನೀಡಿ ಚೇತರಿಕೆ ನೀಡದರಾದರು ತಾಳ್ಮೆಯ ಆಟಕ್ಕೆ ಒತ್ತು ಕೊಟ್ಟು ರನ್ ರೇಟ್ ಗತಿ ಏರಿಸಿಕೊಂಡರು.
ಇದರಿಂದ ಕೊನೆಯ 3 ಓವರ್ಗಳಲ್ಲಿ ಗುರಿ ತಲುಪಲು 48 ರನ್ ಗಳಿಸಬೇಕಾಗಿತ್ತು. ಆದರೆ ಉತ್ತಮ ಬೌಲಿಂಗ್ ನಡೆಸಿದ ಚಹಾರ್ ಹಾಗೂ ಸ್ಕಾಟ್ ಕಗ್ಲಿಜನ್ ಇಬ್ಬರ ವಿಕೆಟ್ ಪಡೆದು ತಂಡಕ್ಕೆ ಗೆಲುವು ತಂದುಕೊಟ್ಟರು. ಡೇವಿಡ್ ಮಿಲ್ಲರ್ ಕೇವಲ 6 ರನ್ ಗಳಿಸಿ ಚಹಾರ್ ಬೌಲಿಂಗ್ನಲ್ಲಿ ಕ್ಲೀನ್ ಬೌಲ್ಡ್ ಆಗುವ ಮೂಲಕ ಪಂಜಾಬ್ ಗೆಲುವಿನ ಆಸೆಗೆ ಎಳ್ಳುನೀರು ಬಿಟ್ಟರು.
