ನವದೆಹಲಿ:ಭಾರತೀಯು ವಾಯಸೇನೆಗೆ ಸೇರಿದ ವಿಮಾನವೊಂದು ನಾಪತ್ತೆಯಾಗಿ ಒಂದು ದಿನ ಕಳೆದರೂ ಸಣ್ಣ ಸುಳಿವೂ ಪತ್ತೆಯಾಗಿಲ್ಲ. ವಾಯುಸೇನೆ ಹಾಗೂ ಭೂಸೇನೆ ಜಂಟಿಯಾಗಿ ರಾತ್ರಿಯಿಡೀ ಕಾರ್ಯಾಚರಣೆ ನಡೆಸಿದ ಹೊರತಾಗಿಯೂ ಎಎನ್-32 ವಿಮಾನ ಪತ್ತೆಹಚ್ಚಲಾಗಿಲ್ಲ.
ಸುಖೋಯ್ ಯುದ್ಧವಿಮಾನ ಹಾಗೂ ಎರಡು ಹೆಲಿಕಾಪ್ಟರ್ಗಳನ್ನು ಕಾರ್ಯಾಚರಣೆಗೆ ಇಳಿಸಲಾಗಿತ್ತು. ಹೆಲಿಕಾಪ್ಟರ್ಗಳು ನಾಪತ್ತೆಯಾದ ವಿಮಾನದ ಸ್ಥಳವನ್ನು ಗುರುತಿಸಿದೆ ಎಂದು ರಾತ್ರಿ ವೇಳೆ ವಾಯುಸೇನೆ ಹೇಳಿಕೊಂಡಿತ್ತು.
ಸದ್ಯ ಕಾರ್ಯಾಚರಣೆ ಮುಂದುವರೆದಿದ್ದು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ(ಇಸ್ರೋ) ವಾಯುಸೇನೆಗೆ ಹುಡುಕಾಟದಲ್ಲಿ ಕೈಜೋಡಿಸಿದೆ. ರಡಾರ್ ಫೋಟೋಗಳ ಮೂಲಕ ನಾಪತ್ತೆಯಾದ ವಿಮಾನವನ್ನು ಹುಡುಕುವ ಕಾರ್ಯದಲ್ಲಿ ಇಸ್ರೋ ಭಾಗಿಯಾಗಿದೆ.
ಘಟನೆಯ ಹಿನ್ನೆಲೆ :
ಸೋಮವಾರ ಮಧ್ಯಾಹ್ನ 12.25ಕ್ಕೆ ಅಸ್ಸೋಂನ ಜೋರ್ಹತ್ನಿಂದ ವಾಯುಸೇನೆಯ ಎಎನ್-32 ವಿಮಾನ ಟೇಕಾಫ್ ಆಗಿತ್ತು. ಅರುಣಾಚಲ ಪ್ರದೇಶದ ಮೆಂಚುಕಾದಲ್ಲಿ ಲ್ಯಾಂಡ್ ಆಗಬೇಕಿತ್ತು. ಆದರೆ, ಟೇಕಾಫ್ ಆದ ಅರ್ಧಗಂಟೆಯಲ್ಲಿ ವಿಮಾನದ ಸಂಪರ್ಕ ಕಡಿತಗೊಂಡಿತ್ತು. ಎಎನ್-32 ವಿಮಾನದಲ್ಲಿ ಒಟ್ಟು 13 ಮಂದಿ ಪ್ರಯಾಣ ಮಾಡುತ್ತಿದ್ದರು.