ಜೀವಜಲಕ್ಕಾಗಿ ಪ್ರಾಣ ಪಣಕ್ಕಿಡುವ ಮಹಿಳೆಯರು: 2ಕಿಮೀ ದೂರದಿಂದ ನೀರು ತರುವ ದುಸ್ಥಿತಿ!

ನಾಸಿಕ್​ನ ವಿವಿಧ ಗ್ರಾಮಗಳಲ್ಲಿ ಪ್ರತಿ ವರ್ಷ ನೀರಿನ ಸಮಸ್ಯೆ ಹೆಚ್ಚಾಗುತ್ತಿದ್ದು, ರೋಹಿಲೆ ಗ್ರಾಮದ ಮಹಿಳೆಯರು ಪ್ರತಿದಿನ ಎರಡು ಕಿಲೋ ಮೀಟರ್ ನಡೆದೇ ಹೋಗಿ ಜೀವ ಜಲ ತರುವಂತಹ ಪರಿಸ್ಥಿತಿ ನಿರ್ಮಾಣಗೊಂಡಿದೆ.

ನಾಸಿಕ್​(ಮಹಾರಾಷ್ಟ್ರ):ಬೇಸಿಗೆ ಬಿಸಿ ಜೋರಾಗಿದೆ. ದೇಶದ ಕೆಲವೊಂದು ಪ್ರದೇಶಗಳಲ್ಲಿ ಅಂತರ್ಜಲ ಬತ್ತಿ ಹೋಗಿರುವ ಕಾರಣ ಜನರು ನಿತ್ಯ ನೀರಿಗಾಗಿ ಪರದಾಡುವಂತಹ ಸ್ಥಿತಿ ನಿರ್ಮಾಣಗೊಂಡಿದೆ. ಮಹಾರಾಷ್ಟ್ರದ ನಾಸಿಕ್​ನ ರೋಹಿಲೆ ಗ್ರಾಮದಲ್ಲಿ ನೀರಿನ ಕೊರತೆ ಉಂಟಾಗಿದ್ದು, ಮಹಿಳೆಯರು ಪ್ರತಿದಿನ ತಮ್ಮ ಪ್ರಾಣ ಪಣಕ್ಕಿಡುತ್ತಿದ್ದಾರೆ.

ಗ್ರಾಮದಲ್ಲಿ ಯಾವುದೇ ರೀತಿಯ ನೀರಿನ ಸೌಲಭ್ಯ ಇಲ್ಲದ ಕಾರಣ ಪ್ರತಿ ದಿನ 2 ಕಿಲೋ ಮೀಟರ್ ದೂರ ಹೋಗಿ ಬಾವಿ ನೀರು ತರುವಂತಹ ದುಸ್ಥಿತಿಯಿದೆ. ಅದಕ್ಕಾಗಿ ಬಾವಿಯೊಳಗಿಳಿದು ನೀರು ತುಂಬುವುದು ಅನಿವಾರ್ಯವಾಗಿದೆ. ಈ ವೇಳೆ ಕೆಲವೊಮ್ಮೆ ಮಹಿಳೆಯರು ಕಾಲು ಜಾರಿ ಅದರೊಳಗೆ ಬಿದ್ದಿರುವ ಅನೇಕ ನಿದರ್ಶನಗಳಿವೆ. ಆದರೆ, ಪ್ರತಿದಿನ ನೀರು ಹೊತ್ತು ತರುವುದು ಅನಿವಾರ್ಯವಾಗಿದೆ.

ಈ ಸಮಸ್ಯೆಗೆ ಸಂಬಂಧಿಸಿದಂತೆ ಮಾತನಾಡಿರುವ ನೀರಾವರಿ ಇಲಾಖೆ ಇಂಜಿನಿಯರ್​​ ಅಲ್ಕಾ, ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದಾಗ ಈ ಸಲ ನೀರಿನ ಸಮಸ್ಯೆ ಹೆಚ್ಚಾಗಿ ಕಾಣಿಸಿಕೊಂಡಿಲ್ಲ. ಜಿಲ್ಲಾಧಿಕಾರಿಗಳ ಕಚೇರಿಯಿಂದ ಈಗಾಗಲೇ ನಮಗೆ ನೀರಿನ ಸಮಸ್ಯೆ ಕುರಿತು ಬೇಡಿಕೆ ಬಂದಿದ್ದು, ತಕ್ಷಣವೇ ಟ್ಯಾಂಕರ್ ಮೂಲಕ ನೀರು ಒದಗಿಸುವ ಕ್ರಮ ಕೈಗೊಳ್ಳಲಾಗುವುದು ಎಂದಿದ್ದಾರೆ.

ಹೆಣ್ಣು ನೀಡಲು ಹಿಂದೇಟು:ನಾಸಿಕ್​ನ ರೋಹಿಲೆ ಗ್ರಾಮ ಸೇರಿದಂತೆ ಕೆಲವೊಂದು ಹಳ್ಳಿಗಳಲ್ಲಿ ಪ್ರತಿ ವರ್ಷ ನೀರಿನ ಸಮಸ್ಯೆ ಉಂಟಾಗುತ್ತಿದೆ. ಹೀಗಾಗಿ ಇಲ್ಲಿನ ಯುವಕರಿಗೆ ಹೆಣ್ಣು ನೀಡಲು ಹಿಂದೇಟು ಹಾಕುವಂತಹ ಅನೇಕ ನಿದರ್ಶನಗಳು ನಡೆದು ಹೋಗಿವೆ.