ಬೈಕ್​​-ಕಾರು ಭೀಕರ ಅಪಘಾತ: ಬೈಕ್​​ಗೆ ಬೆಂಕಿ ಹೊತ್ತಿಕೊಂಡು ಮೂವರು ಸಜೀವ ದಹನ!

ಬಿಹಾರದಲ್ಲಿ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ಮೂವರು ಯುವಕರು ದುರಂತ ಸಾವನ್ನಪ್ಪಿದ್ದಾರೆ.

ಮಾಧೇಪುರ್​(ಬಿಹಾರ): ಬಿಹಾರದ ಮಾಧೇಪುರ ರಸ್ತೆಯಲ್ಲಿ ನಡೆದ ರಸ್ತೆ ಅಪಘಾತವೊಂದರಲ್ಲಿ ಮೂವರು ಯುವಕರು ಸಜೀವ ದಹನವಾಗಿದ್ದಾರೆ. ಬೈಕ್​ ಮತ್ತು ಕಾರಿನ ಮಧ್ಯೆ ಅಪಘಾತ ನಡೆದಿದ್ದು, ಬೈಕ್​ಗೆ ಬೆಂಕಿ ಹೊತ್ತಿಕೊಂಡಿದೆ. ಪರಿಣಾಮ ದುರ್ಘಟನೆ ಘಟಿಸಿತು ಎಂದು ವರದಿಯಾಗಿದೆ.

ಶಂಕರಪುರ ಪೊಲೀಸ್ ಠಾಣಾ ವ್ಯಾಪ್ತಿಯ ನಿಸಿಹಾರ್​ಪುರದಲ್ಲಿ ನಿನ್ನೆ ರಾತ್ರಿ ಔತಣಕೂಟ ಏರ್ಪಡಿಸಲಾಗಿತ್ತು. ಇಲ್ಲಿಗೆ ಮೂವರು ಯುವಕರು ಬೈಕ್​ ಮೇಲೆ ತೆರಳಿದ್ದರು. ಊಟ ಮುಗಿಸಿ ರಾತ್ರಿ 1ರಿಂದ 2 ಗಂಟೆಯ ಸುಮಾರಿಗೆ ಮಾಧೇಪುರಕ್ಕೆ ವಾಪಸ್​ ಬರುತ್ತಿದ್ದರು. ಈ ವೇಳೆ ಅವರ ಬೈಕ್​​ ಎದುರಿನಿಂದ ಬಂದ ಕಾರಿಗೆ ಡಿಕ್ಕಿ ಹೊಡೆದಿದೆ. ಪರಿಣಾಮ ಬೈಕ್​ಗೆ ಬೆಂಕಿ ಹೊತ್ತಿಕೊಂಡಿದ್ದು, ಮೂವರು ಸುಟ್ಟು ಕರಕಲಾದರು.

ಈ ವೇಳೆ ಅದೇ ರಸ್ತೆಯಲ್ಲಿ ಹೋಗ್ತಿದ್ದ ಮಾಜಿ ಸಂಸದ ಪಪ್ಪು ಯಾದವ್​ ಅವರ ಬೆಂಗಾವಲು ಪಡೆ ರಕ್ಷಣೆಗೆ ಮುಂದಾಗಿದೆ. ತಕ್ಷಣವೇ ಸ್ಥಳೀಯ ವೈದ್ಯಕೀಯ ಕಾಲೇಜಿ​ಗೆ ಗಾಯಾಳುಗಳನ್ನು ಸಾಗಿಸಿದ್ದಾರೆ. ಆದರೆ, ದುರಾದೃಷ್ಟವಶಾತ್​ ಯಾರೂ ಕೂಡ ಬದುಕುಳಿದಿಲ್ಲ. ಮೃತರನ್ನು ಸನು ಕುಮಾರ್​, ರವಿಕುಮಾರ್​ ಹಾಗೂ ಸುಮನ್ ಕುಮಾರ್​​ ಎಂದು ಗುರುತಿಸಲಾಗಿದೆ.