ಸಾಲಗಾರರಿಂದ ಕೆಟ್ಟ ಸಾಲಗಳ ಮರುಪಾವತಿಯೇ ಖಾಸಗೀಕರಣದಿಂದ ಮುಕ್ತಿಗಿರುವ ಮಾರ್ಗ

ಶಾಸಕಾಂಗ ಮತ್ತು ರಿಸರ್ವ್ ಬ್ಯಾಂಕ್‌ಗಳು ಸಾಲ ನೀಡುವ ಮಾರ್ಗಸೂಚಿಗಳನ್ನು ಜಂಟಿಯಾಗಿ ಪರಿಶೀಲಿಸಬೇಕು ಹಾಗೂ ಅಗತ್ಯವಾದ ಸರಿಪಡಿಸುವ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಎಂದು ಕರ್ನಾಟಕದ ಹೈಕೋರ್ಟ್ ಇತ್ತೀಚೆಗೆ ಹೇಳಿದೆ. ಈ ಕೆಲಸ ತಕ್ಷಣವೇ ಆಗಬೇಕಿದೆ..

ನವದೆಹಲಿ :ಕೇಂದ್ರ ವಿತ್ತ ಸಚಿವೆ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ತಮ್ಮ ಇತ್ತೀಚಿನ ಬಜೆಟ್ ಭಾಷಣದಲ್ಲಿ ಸಾರ್ವಜನಿಕ ವಲಯದ ಎರಡು ಬ್ಯಾಂಕ್​ಗಳನ್ನು ಶೀಘ್ರದಲ್ಲೇ ಖಾಸಗೀಕರಣಗೊಳಿಸಲಿದ್ದೇವೆ ಎಂದು ಘೋಷಿಸಿದರು. ಈ ವಲಯದಲ್ಲಿ ರಾಷ್ಟ್ರೀಕರಣ ಪರ್ವದ ಐದು ದಶಕಗಳ ನಂತರ ದೇಶವು ಬ್ಯಾಂಕಿಂಗ್ ನಿರ್ವಹಣೆಯಲ್ಲಿ ಮತ್ತೆ ಹೊಸ ತಿರುವನ್ನು ಹೊಂದತೊಡಗಿದೆ.

ಖಾಸಗೀಕರಣಗೊಳಿಸಲು ಉದ್ದೇಶಿಸಿರುವ ಬ್ಯಾಂಕ್​ಗಳ ಪಟ್ಟಿಯ ಕುರಿತ ವರದಿಗಳು ಸುಳ್ಳು ಎಂದು ಕೇಂದ್ರ ಹಣಕಾಸು ಸಚಿವರು ಖಂಡಿಸಿದ್ದಾರೆ. ಮತ್ತೊಂದೆಡೆ, ಅದೇನೇ ಬರಲಿ, ಬ್ಯಾಂಕ್​ಗಳ ಖಾಸಗೀಕರಣವನ್ನು ಸಕ್ರಿಯಗೊಳಿಸಲು ಈ ವರ್ಷ ಎರಡು ಕಾನೂನುಗಳನ್ನು ತಿದ್ದುಪಡಿ ಮಾಡಲಾಗುವುದು ಎಂಬ ಬಲವಾದ ಸೂಚನೆಗಳೂ ಇವೆ.

ಎನ್‌ಪಿಎ (ಅನುತ್ಪಾದಕ ಆಸ್ತಿ) ಪೀಡಿತ ಬ್ಯಾಂಕ್​​​ಗಳಲ್ಲಿ ಬಂಡವಾಳ ಹೂಡಿಕೆಯ ನೀತಿ ಅವಲಂಬಿಸುವುದಕ್ಕಿಂತ ಹೆಚ್ಚಾಗಿ ಜನರಿಗೆ ಮೂಲಸೌಕರ್ಯಗಳನ್ನು ಅಭಿವೃದ್ಧಿಪಡಿಸಲು ಖರ್ಚು ಮಾಡುವುದು ಉತ್ತಮ ಎಂದು ಕೇಂದ್ರ ಸಚಿವರು ವಾದಿಸುತ್ತಿದ್ದಾರೆ. ಈ ವಾದವು ಸರ್ಕಾರದ ದೃಷ್ಟಿಕೋನವನ್ನು ಸ್ಪಷ್ಟವಾಗಿ ಪ್ರತಿಬಿಂಬಿಸುತ್ತದೆ.

ಆದರೆ, ಯೆಸ್‌ ಬ್ಯಾಂಕ್, ಲಕ್ಷ್ಮಿ ವಿಲಾಸ್ ಬ್ಯಾಂಕ್ ಮತ್ತು ಇತರ ಕೆಲವು ಬ್ಯಾಂಕ್‌ಗಳು ಅನುಭವಿಸಿದ ಕುಸಿತವು ಎನ್‌ಪಿಎಗಳ ದುಷ್ಪರಿಣಾಮಕ್ಕೆ ಖಾಸಗಿ ಬ್ಯಾಂಕ್​ಗಳು ಯಾವುದೇ ಸಹನಾ ಸಾಮರ್ಥ್ಯ ಹೊಂದಿಲ್ಲ ಎಂಬುದನ್ನು ನಮಗೆ ಸ್ಪಷ್ಟವಾಗಿ ಸೂಚಿಸಿವೆ. ಐಡಿಬಿಐ ಸೇರಿ 19 ಖಾಸಗಿ ಬ್ಯಾಂಕ್​ಗಳಲ್ಲಿ ಸಂಗ್ರಹವಾಗಿರುವ ಎನ್‌ಪಿಎ ಪ್ರಮಾಣ ಅಂದಾಜು ರೂ.2 ಲಕ್ಷ ಕೋಟಿ ಇದೆ ಎನ್ನುತ್ತವೆ ಅಧಿಕೃತ ಅಂಕಿ-ಅಂಶಗಳು.

ಖಾಸಗಿ ಬ್ಯಾಂಕ್​ಗಳು ಎನ್‌ಪಿಎ ಭೀತಿಗೆ ಒಳಗಾಗುವ ಸಾಧ್ಯತೆ ಎತ್ತಿ ತೋರಿಸುತ್ತಲೇ, ಖಾಸಗೀಕರಣವನ್ನು ಆರಿಸಿಕೊಳ್ಳುವ ಬದಲು ಪ್ರಮುಖ ಸಾಲಗಾರರಿಂದ ಕೆಟ್ಟ ಸಾಲಗಳನ್ನು ವಸೂಲಿ ಮಾಡುವತ್ತ ಗಮನಹರಿಸಬೇಕೆಂದು ಅಖಿಲ ಭಾರತ ಬ್ಯಾಂಕ್ ನೌಕರರ ಸಂಘವು (ಎಐಬಿಇಎ) ಸರ್ಕಾರವನ್ನು ಕೋರುತ್ತಿದೆ.

ಕೆಟ್ಟ ಸಾಲ ಎಂದು ಭಾವಿಸಲಾಗಿದ್ದ ರೂ. 2.33 ಲಕ್ಷ ಕೋಟಿಯನ್ನು ಕೇವಲ 4 ವರ್ಷಗಳ ಅವಧಿಯಲ್ಲಿ ವಸೂಲಿ ಮಾಡಲು ಸಾಧ್ಯವಾಗಿರುವುದನ್ನು ಖುದ್ದು ಕೇಂದ್ರ ಹಣಕಾಸು ಸಚಿವಾಲಯವು ಸಂಸತ್ತಿನಲ್ಲಿ ಕೆಲ ಕಾಲದ ಹಿಂದೆ ಘೋಷಿಸಿತ್ತು. ಸರ್ಕಾರದ ಬೆಂಬಲವಿದ್ದರೆ, ಕೆಟ್ಟ ಸಾಲಗಳನ್ನು ವಸೂಲು ಮಾಡಬಹುದು ಎಂಬುದನ್ನು ಇದು ತೋರಿಸುತ್ತದೆ.

ನಿಷ್ಕ್ರಿಯ ಆಸ್ತಿಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸಲು ಮಲೇಷ್ಯಾದ ಧನ ಹರ್ತಾ ಮಾದರಿಯಲ್ಲಿ ಬ್ಯಾಡ್ ಬ್ಯಾಂಕ್ ಆಫ್ ಇಂಡಿಯಾವನ್ನು ರಚಿಸಲು ಭಾರತದ ರಿಸರ್ವ್ ಬ್ಯಾಂಕ್ ಮಾಜಿ ಅಧ್ಯಕ್ಷ ದುವ್ವುರಿ ಸುಬ್ಬರಾವ್ ಸಲಹೆ ನೀಡಿದ್ದಾರೆ. ಕಾರ್ಯನಿರ್ವಹಿಸದ ಇಂತಹ ಎಲ್ಲಾ ಸ್ವತ್ತುಗಳನ್ನು ಸೂಕ್ತವಾಗಿ ನಿರ್ವಹಿಸಬೇಕೆಂದರೆ, ಅವನ್ನೆಲ್ಲ ಸಂಸ್ಥೆಯೊಂದಕ್ಕೆ ವರ್ಗಾಯಿಸುವುದು ಬಹಳ ಮುಖ್ಯವಾಗಿದೆ.

ಅದೇ ರೀತಿ ಕಾರ್ಯನಿರ್ವಹಿಸದ ಸ್ವತ್ತುಗಳ ಉತ್ಪಾದನೆಗೆ ಕಾರಣವಾದ ಪರಿಸ್ಥಿತಿಗಳನ್ನು ಸರಿಪಡಿಸುವುದು ಸಹ ಅಷ್ಟೇ ಮುಖ್ಯ ಕೆಲಸವಾಗಿದೆ. ಸುಸ್ತಿ ಸಾಲಗಳನ್ನು ಒಳಗೊಂಡಿರುವ ಕ್ರಮಗಳ ಭಾಗವಾಗಿ, ಸುಸ್ತಿದಾರರ ಫೊಟೋಗಳನ್ನು ಪ್ರಚಾರ ಮಾಡಲು ಆರ್‌ಬಿಐ ಈ ಹಿಂದೆ ಕರೆ ನೀಡಿತ್ತು. ಆದರೆ, ಬ್ಯಾಂಕಿಂಗ್ ನಿಯಂತ್ರಕರ ಆದೇಶಗಳನ್ನು ಕಾರ್ಯರೂಪಕ್ಕೆ ತಂದಿರುವ ಸಂದರ್ಭಗಳು ಬಲು ಕಡಿಮೆ.

ಸಾಲ ಮರುಪಾವತಿಯಲ್ಲಿನ ಅಸಮರ್ಥತೆ ಮತ್ತು ಪಡೆದ ಸಾಲವನ್ನು ಮರುಪಾವತಿ ಮಾಡುವ ಉದ್ದೇಶ ಹೊಂದಿರದ ಹಣಕಾಸಿನ ಅಪರಾಧಿಗಳಿಗೆ ಬಗ್ಗೆ ಚೆನ್ನಾಗಿ ಗೊತ್ತಿದ್ದರೂ ಕೂಡ ಅಂಥವರಿಗೆ ಸಾಲ ನೀಡುವ ಆಂತರಿಕ ದ್ರೋಹಿಗಳಿರುವುದು ನಮ್ಮ ದೇಶದಲ್ಲಿನ ಬ್ಯಾಂಕಿಂಗ್ ಬಿಕ್ಕಟ್ಟಿಗೆ ಪ್ರಮುಖ ಕಾರಣವಾಗಿದೆ.

ಬ್ಯಾಂಕ್ ಸಿಬ್ಬಂದಿಯ ಸಡಿಲತೆಯಿಂದಾಗಿ ಪ್ರತಿ ನಾಲ್ಕು ಗಂಟೆಗಳಿಗೊಮ್ಮೆ ಒಂದು ಬ್ಯಾಂಕಿಂಗ್ ವಂಚನೆ ನಡೆಯುತ್ತಿದೆ ಎಂದು ಆರ್‌ಬಿಐ ಹೇಳಿದೆ. ಹೀಗಿದ್ದರೂ, ಇಂತಹ ಪರಿಸ್ಥಿತಿಯನ್ನು ಸರಿಪಡಿಸುವ ಯಾವ ಉತ್ತಮ ಕೆಲಸವನ್ನೂ ಅದು ಮಾಡಿಲ್ಲ. ತನ್ನ ಹೊಣೆಗಾರಿಕೆಯನ್ನು ಗಾಳಿಗೆ ತೂರಿರುವ ಅದರ ಕ್ರಮ ಕ್ಷಮೆಗೆ ಅರ್ಹವಾದುದಲ್ಲ.

ಶಾಸಕಾಂಗ ಮತ್ತು ರಿಸರ್ವ್ ಬ್ಯಾಂಕ್‌ಗಳು ಸಾಲ ನೀಡುವ ಮಾರ್ಗಸೂಚಿಗಳನ್ನು ಜಂಟಿಯಾಗಿ ಪರಿಶೀಲಿಸಬೇಕು ಹಾಗೂ ಅಗತ್ಯವಾದ ಸರಿಪಡಿಸುವ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಎಂದು ಕರ್ನಾಟಕದ ಹೈಕೋರ್ಟ್ ಇತ್ತೀಚೆಗೆ ಹೇಳಿದೆ. ಈ ಕೆಲಸ ತಕ್ಷಣವೇ ಆಗಬೇಕಿದೆ.

ಸಾರ್ವಜನಿಕ ವಲಯದ ಬ್ಯಾಂಕ್​ಗಳನ್ನು ಕೇಂದ್ರ ಸರ್ಕಾರವು ಒಂದೂವರೆ ವರ್ಷಗಳ ಹಿಂದೆ ವಿಲೀನಗಳ ಮೂಲಕ ತರ್ಕಬದ್ಧಗೊಳಿಸಿತ್ತು. ಬ್ಯಾಂಕ್​ಗಳ ಸಂಖ್ಯೆಯನ್ನು 27ರಿಂದ 12ಕ್ಕೆ ಕುಗ್ಗಿಸಲು ಇದು ಕಾರಣವಾಗಿತ್ತು. ಸಾರ್ವಜನಿಕರ ಲಕ್ಷಾಂತರ ಕೋಟಿಗಳಷ್ಟು ಹಣದ ಠೇವಣಿಗಳಿಗೆ ಈ ಬ್ಯಾಂಕ್​ಗಳು ಸುರಕ್ಷಿತ ತಾಣಗಳಾಗಿವೆ. ಇವುಗಳ ಬಗ್ಗೆ ನಿರ್ಧಾರ ತೆಗೆದುಕೊಳ್ಳುವಾಗ ಕೇಂದ್ರವು ಎಚ್ಚರಿಕೆಯಿಂದ ನಡೆದುಕೊಳ್ಳಬೇಕಿದೆ.

ದೇಶದ ಆರ್ಥಿಕತೆಗೆ ಸಂಬಂಧಿಸಿದಂತೆ ಬ್ಯಾಂಕಿಂಗ್ ಕ್ಷೇತ್ರವು ಇದುವರೆಗೆ ಒಂದು ನಿರ್ಣಾಯಕ ಕಾರ್ಯತಂತ್ರದ ಕ್ಷೇತ್ರವಾಗಿದೆ. ದೀರ್ಘಾವಧಿಯ ಸಾರ್ವಜನಿಕ ಹಿತಾಸಕ್ತಿಗಳನ್ನು ಗಮನದಲ್ಲಿಟ್ಟುಕೊಂಡು ಅದರ ಸುಧಾರಣೆ ಮತ್ತು ಅಭಿವೃದ್ಧಿಯ ಕ್ರಮಗಳನ್ನು ಸಹ ಕಾರ್ಯತಂತ್ರವಾಗಿ ಯೋಜಿಸಬೇಕಿದೆ.

ಇದನ್ನೂ ಓದಿ:ನಿಮಗೆ ಗೊತ್ತೇ..? ಅಮೆರಿಕ ಭಾರತಕ್ಕೆ 15.89 ಲಕ್ಷ ಕೋಟಿ ರೂ. ಋಣ ಸಂದಾಯ ಮಾಡಬೇಕಿದೆ!