ಪೈಲಟ್​ ಮೇಲೆ ಹಲ್ಲೆ ಪ್ರಕರಣ: ಪ್ರಯಾಣಿಕ ಸಾಹಿಲ್​ ಕಟಾರಿಯಾಗೆ ಜಾಮೀನು

ವಿಮಾನ ನಿರ್ಗಮನ ವಿಳಂಬದ ಬಗ್ಗೆ ಅನೌನ್ಸ್​ ಮಾಡುತ್ತಿರುವ ಪೈಲಟ್​ ಮೇಲೆ ಪ್ರಯಾಣಿಕನೊಬ್ಬ ಹಲ್ಲೆ ನಡೆಸಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು.

ನವದೆಹಲಿ: ವಿಮಾನ ನಿರ್ಗಮನ ವಿಳಂಬವಾಗುವ ಬಗ್ಗೆ ಅನೌನ್ಸ್ ಮಾಡುತ್ತಿದ್ದ ಇಂಡಿಗೋ ಏರ್​ಲೈನ್ಸ್​ಪೈಲಟ್​ ಮೇಲೆ ಹಲ್ಲೆ ನಡೆಸಿದ ಪ್ರಯಾಣಿಕನನ್ನು ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಗಿದೆ. ಪ್ರಯಾಣಿಕನನ್ನು 28 ವರ್ಷದ ಸಾಹಿಲ್​ ಕಟಾರಿಯಾ ಎಂದು ಗುರುತಿಸಲಾಗಿದ್ದು, ಆತನಿಗೆ ಅಪರಾಧ ಪ್ರಕ್ರಿಯಾ ಸಂಹಿತೆಯ (CrPC) ಸೆಕ್ಷನ್​ 41ರ ಅಡಿಯಲ್ಲಿ ನೋಟಿಸ್​ ನೀಡಲಾಗಿದೆ ಎಂದು ಅಧಿಕಾರಿಯೊಬ್ಬರು ಮಂಗಳವಾರ ತಿಳಿಸಿದ್ದಾರೆ.

ಪೊಲೀಸರ ಪ್ರಕಾರ, ಸಾಹಿಲ್​ ಕಟಾರಿಯಾ ದಕ್ಷಿಣ ದೆಹಲಿಯ ಅಮರ್​ ಕಾಲೊನಿಯ ನಿವಾಸಿಯಾಗಿದ್ದು, ಸ್ಟೇಷನರಿ ಹಾಗೂ ಆಟಿಕೆ ಅಂಗಡಿ ನಡೆಸುತ್ತಿದ್ದಾರೆ. ಭಾನುವಾರ ಘಟನೆ ನಡೆದ ವೇಳೆ ಸಾಹಿಲ್​ ಕಟಾರಿಯಾ ತಮ್ಮ ಪತ್ನಿಯೊಂದಿಗೆ ಹನಿಮೂನ್​ಗೆ ಗೋವಾಕ್ಕೆ ತೆರಳುತ್ತಿದ್ದರು. ವಿಮಾನ ನಿರ್ಗಮನ 13 ಗಂಟೆಗಳ ಕಾಲದ ವಿಳಂಬದಿಂದಾಗಿ ಹತಾಶೆಗೊಂಡಿದ್ದ ಅವರು​, ವಿಮಾನದ ಒಳಗಿದ್ದ ಪೈಲಟ್​ಗೆ ಹಲ್ಲೆ ನಡೆಸಿದ್ದರು. ಹಲ್ಲೆಗೊಳಗಾದ ಪೈಲಟ್​ ಅನುಪ್​ ಕುಮಾರ್​ ಕಟಾರಿಯಾ ವಿರುದ್ಧ ದೂರು ದಾಖಲಿಸಿದ್ದು, ದೆಹಲಿ ಪೊಲೀಸರು ಎಫ್​ಐಆರ್​ ದಾಖಲಿಸಿದ್ದಾರೆ.

ದೆಹಲಿಯಿಂದ ಗೋವಾಗೆ ತೆರಳುತ್ತಿದ್ದ ಇಂಡಿಗೋ ವಿಮಾನದಲ್ಲಿ (6E-2175) ವಿಮಾನ ಸಂಚಾರ ವಿಳಂಬ ಆಗಲಿದೆ ಎಂದು ಅನೌನ್ಸ್​ ಮಾಡುತ್ತಿದ್ದ ಪೈಲಟ್​ಗೆ ಹಳದಿ ಹೂಡಿ ಧರಿಸಿರುವ ಪ್ರಯಾಣಿಕನೊಬ್ಬ ಹಿಂಬದಿ ಸೀಟಿನಿಂದ ಓಡಿಬಂದು ಥಲಿಸಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿತ್ತು. ಮತ್ತೊಂದು ವೈರಲ್​ ವಿಡಿಯೋದಲ್ಲಿ ಕಟಾರಿಯಾ ಪೈಲಟ್​ಗೆ ಕ್ಷಮೆಯಾಚಿಸುತ್ತಿರುವುದನ್ನು ಕಾಣಬಹುದು.

ಇದನ್ನೂ ಓದಿ:ಇಂಡಿಗೋ ವಿಮಾನ ಸಂಚಾರ ವಿಳಂಬ: ಕ್ಯಾಪ್ಟನ್‌ಗೆ​ ಪ್ರಯಾಣಿಕನಿಂದ ಹಲ್ಲೆ