5 ವರ್ಷಗಳಲ್ಲಿ ಆರು ಲಕ್ಷ ಭಾರತೀಯರು 'ಪೌರತ್ವ' ತ್ಯಜಿಸಿದ್ದಾರೆ: ಕೇಂದ್ರ ಸರ್ಕಾರ

ಕಳೆದ ಐದು ವರ್ಷಗಳಲ್ಲಿ ಆರು ಲಕ್ಷ ಭಾರತೀಯರು ತಮ್ಮ ಪೌರತ್ವ ತ್ಯಜಿಸಿದ್ದಾರೆಂದು ಲೋಕಸಭೆಗೆ ಕೇಂದ್ರ ಸರ್ಕಾರ ಲಿಖಿತ ರೂಪದ ಮಾಹಿತಿ ನೀಡಿದೆ.

ನವದೆಹಲಿ:ಕಳೆದ ಐದು ವರ್ಷಗಳಲ್ಲಿ ಆರು ಲಕ್ಷ ಭಾರತೀಯರು ತಮ್ಮ(ಭಾರತೀಯ ಪೌರತ್ವ) ಪೌರತ್ವ ತ್ಯಜಿಸಿದ್ದಾರೆಂದು ಕೇಂದ್ರ ಸರ್ಕಾರ ಲೋಕಸಭೆಗೆ ತಿಳಿಸಿದೆ.

ಸಂಸತ್​ ಚಳಿಗಾಲದ ಅಧಿವೇಶನದ ವೇಳೆ ವಿಪಕ್ಷ ಸದಸ್ಯರ ಪ್ರಶ್ನೆಯೊಂದಕ್ಕೆ ಕೇಂದ್ರ ಗೃಹ ಖಾತೆ ರಾಜ್ಯ ಸಚಿವ ನಿತ್ಯಾನಂದ್​ ರೈ ಈ ಮಾಹಿತಿ ನೀಡಿದರು. ಕೇಂದ್ರ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಮಾಹಿತಿ ಪ್ರಕಾರ, 1,33,83,718 ಭಾರತೀಯರು ವಿವಿಧ ದೇಶಗಳಲ್ಲಿ ವಾಸವಿದ್ದಾರೆ. ಇವರ ಪೈಕಿ 2017ರಿಂದ 6 ಲಕ್ಷ ಭಾರತೀಯರು ತಮ್ಮ ಪೌರತ್ವ ತ್ಯಜಿಸಿದ್ದಾರೆಂದು ವಿವರಿಸಿದರು.

2017ರಲ್ಲಿ 1,33,049 ಲಕ್ಷ ಭಾರತೀಯರು, 2018ರಲ್ಲಿ 1,34,561 ಲಕ್ಷ, 2019ರಲ್ಲಿ 85,248 ಲಕ್ಷ ಹಾಗೂ 2020ರಲ್ಲಿ 1,11,287 ಜನರು ಭಾರತದ ಪೌರತ್ವ ತ್ಯಜಿಸಿದ್ದಾರೆ.

ಭಾರತ ಸರ್ಕಾರ ದ್ವಿಪೌರತ್ವಕ್ಕೆ ಅನುಮತಿ ನೀಡುವುದಿಲ್ಲ. ಅದಾಗ್ಯೂ, 1955ರ ಪೌರತ್ವ ಕಾಯ್ದೆ ಅಡಿಯಲ್ಲಿ ಭಾರತದ ಸಾಗರೋತ್ತರ ಪ್ರಜೆ ಎಂಬ ಕಾರ್ಡ್​ ಹೊಂದಿರುವವರಿಗೆ ಶಾಸನಬದ್ಧ ಹಕ್ಕು ನೀಡುತ್ತದೆ.

4,177 ಜನರಿಗೆ ಭಾರತೀಯ ಪೌರತ್ವ

ಇದೇ ವೇಳೆ ಕಳೆದ ಐದು ವರ್ಷಗಳಲ್ಲಿ 4,177 ಜನರಿಗೆ ಭಾರತೀಯ ಪೌರತ್ವ ನೀಡಲಾಗಿದೆ ಎಂದು ಕೇಂದ್ರ ಮಾಹಿತಿ ನೀಡಿದೆ. 2016ರಲ್ಲಿ 1106 ಜನರು, 2017ರಲ್ಲಿ 817 ಜನರು 2018ರಲ್ಲಿ 628, 2019ರಲ್ಲಿ 987 ಹಾಗೂ 2020ರಲ್ಲಿ 639 ಜನರಿಗೆ ಪೌರತ್ವ ನೀಡಲಾಗಿದೆ ಎಂಬ ಮಾಹಿತಿ ಹಂಚಿಕೊಂಡಿದೆ.