ಚೆನ್ನೈ: ಆನ್ಲೈನ್ ಗೇಮ್ಗಳಿಂದ ಜನತೆ ಬೆಟ್ಟಿಂಗ್ ದಾಸರಾಗುತ್ತಿದ್ದಾರೆ ಎಂಬ ಕೂಗು ಕೇಳಿಬಂದ ಹಿನ್ನೆಲೆ ತಮಿಳುನಾಡು ಸರ್ಕಾರ ಆನ್ಲೈನ್ ಗೇಮಿಂಗ್ಗೆ ಬ್ರೇಕ್ ಹಾಕಿದೆ. ಈ ಮೂಲಕ ಆನ್ಲೈನ್ ಗೇಮ್ಗಳಿಗೆ ನಿರ್ಬಂಧ ಹೇರಿದೆ.
ತಮಿಳುನಾಡಲ್ಲಿ ಆನ್ಲೈನ್ ಗೇಮರ್ಗಳ ಆತ್ಮಹತ್ಯಾ ಪ್ರಕರಣ ಹೆಚ್ಚಾಗಿದ್ದರಿಂದ ಮತ್ತು ಬೆಟ್ಟಿಂಗ್ ದಂಧೆ ಬಗ್ಗೆ ಸರ್ಕಾರ ಗಂಭೀರ ಚರ್ಚೆ ನಡೆಸಿತ್ತು. ಇದೀಗ ಆನ್ಲೈನ್ ಗೇಮ್ ನಿಷೇಧಿಸುವ ಸುಗ್ರೀವಾಜ್ಞೆ ಜಾರಿ ಮಾಡಿದೆ.
ರಾಜ್ಯ ಸರ್ಕಾರದ ಪ್ರಸ್ತಾವನೆಯ ಆಧಾರದ ಮೇಲೆ ರಾಜ್ಯಪಾಲ ಬನ್ವಾರಿಲಾಲ್ ಪುರೋಹಿತ್ ಅವರು ಈ ಸುಗ್ರೀವಾಜ್ಞೆ ಹೊರಡಿಸಿದ್ದಾರೆ. ಕಂಪ್ಯೂಟರ್, ಯಾವುದೇ ಸಂವಹನ ಸಾಧನ ಅಥವಾ ಸಂಪನ್ಮೂಲವನ್ನು ಬಳಸಿಕೊಂಡು ಸೈಬರ್ ಮೂಲಕ ಬೆಟ್ಟಿಂಗ್ ಆಡುವುದನ್ನು ನಿಷೇಧಿಸಿದೆ. ಅಲ್ಲದೆ ಹಲವು ನಿರ್ಬಂಧಗಳನ್ನು ಹೇರಲಾಗಿದೆ ಎಂದು ರಾಜ ಭವನದ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಇದಕ್ಕೂ ಮೊದಲು ಸಿಎಂ ಪಳನಿ ಸ್ವಾಮಿ ಈ ಆನ್ಲೈನ್ ಗೇಮ್ಗಳ ನಿಷೇಧ ಕುರಿತು ಸುಳಿವು ನೀಡಿದ್ದರು. ಆನ್ಲೈನ್ ಗೇಮ್ಗಳ ಕುರಿತು ದೂರುಗಳು ಹೆಚ್ಚಾಗಿದ್ದು, ಅಲ್ಲದೆ ಇದರಲ್ಲಿ ಹಣ ಕಳೆದುಕೊಂಡು ಆತ್ಮಹತ್ಯೆಗೆ ಶರಣಾಗುತ್ತಿರುವ ಪ್ರಕರಣ ಅಧಿಕವಾದ ಹಿನ್ನೆಲೆ ಈ ನಿರ್ಧಾರ ತೆಗೆದುಕೊಳ್ಳುವ ಕುರಿತು ತಿಳಿಸಿದ್ದರು.
ಇನ್ನು ಕೊಯಂಬತ್ತೂರಿನಲ್ಲಿ ಮೂವರು ಆನ್ಲೈನ್ ಗೇಮ್ನಿಂದ ಲಕ್ಷಾಂತರ ಹಣ ಕಳೆದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು. ಹಣದಾಸೆಗೆ ಬೀಳುವ ಜನತೆ ಅದರಲ್ಲೂ ಯುವಕರು ಆನ್ಲೈನ್ ಗೇಮಿಂಗ್ನಲ್ಲಿ ಬೆಟ್ಟಿಂಗ್ಗಾಗಿ ಹಣ ಹೂಡಿ ಕಳೆದುಕೊಳ್ಳುತ್ತಿದ್ದಾರೆ. ಅಲ್ಲದೆ ಇದರಿಂದ ಮನನೊಂದು, ಖಿನ್ನತೆಗೆ ಒಳಗಾಗಿ ಆತ್ಮಹತ್ಯೆಯ ದಾರಿ ಹಿಡಿಯುತ್ತಾರೆ. ಈ ಹಿನ್ನೆಲೆ ಸರ್ಕಾರ ಆನ್ಲೈನ್ ಗೇಮಿಂಗ್ ನಿಷೇಧಿಸುವ ಪ್ರಸ್ತಾವನೆ ಸಲ್ಲಿಸಿತ್ತು ಎಂದು ಪ್ರಕಟಣೆ ತಿಳಿಸಿದೆ.
ಇನ್ನು ಸರ್ಕಾರದ ನಿಷೇಧಾಜ್ಞೆಯನ್ನೂ ಮೀರಿ ಗೇಮಿಂಗ್ನಲ್ಲಿ ತೊಡಗಿದರೆ ಅಂತಹವರಿಗೆ 5 ಸಾವಿರ ದಂಡ ಹಾಗೂ 6 ತಿಂಗಳು ಜೈಲು ಶಿಕ್ಷೆ ಮತ್ತು ಸೈಬರ್ ಸೆಂಟರ್ನಲ್ಲಿ ಅನುವು ಮಾಡಿಕೊಟ್ಟರೆ ಮಾಲಿಕರಿಗೆ 10 ಸಾವಿರ ದಂಡ ಹಾಗೂ 2 ವರ್ಷ ಜೈಲು ಶಿಕ್ಷೆ ವಿಧಿಸಲು ಅವಕಾಶವಿದೆ.
