Omicron alert: ವಿದೇಶದಿಂದ ಬಂದಿದ್ದ 10 ಪ್ರವಾಸಿಗರು ಮೀರತ್​ನಲ್ಲಿ ನಾಪತ್ತೆ

ವಿದೇಶದಿಂದ ಉತ್ತರ ಪ್ರದೇಶದ ಮೀರತ್​​ಗೆ ಆಗಮಿಸಿದ್ದ 10 ಮಂದಿ ಇದೀಗ ನಾಪತ್ತೆಯಾಗಿದ್ದು, ಅವರಿಗಾಗಿ ಶೋಧಕಾರ್ಯ ಆರಂಭವಾಗಿದೆ ಎಂದು ಜಿಲ್ಲಾಡಳಿತ ಮಾಹಿತಿ ನೀಡಿದೆ.

ಮೀರತ್​​(ಉತ್ತರ ಪ್ರದೇಶ):ದಕ್ಷಿಣ ಆಫ್ರಿಕಾದ ರೂಪಾಂತರ ಕೋವಿಡ್​ ವೈರಸ್​ ಒಮಿಕ್ರಾನ್​​​ ಇದೀಗ ಭಾರತಕ್ಕೂ ಲಗ್ಗೆ ಹಾಕಿದ್ದು, ಬೆಂಗಳೂರಿನ ಎರಡು ಪ್ರಕರಣ ಸೇರಿದಂತೆ ದೇಶದಲ್ಲಿ 4 ಕೇಸ್​ ದಾಖಲಾಗಿವೆ. ಇದರ ಬೆನ್ನಲ್ಲೇ ವಿದೇಶದಿಂದ ಉತ್ತರ ಪ್ರದೇಶಕ್ಕೆ ಆಗಮಿಸಿದ್ದ 10 ಮಂದಿ ನಾಪತ್ತೆಯಾಗಿದ್ದಾರೆಂದು ಮೀರತ್​​​ ಜಿಲ್ಲಾಡಳಿತ ಮಾಹಿತಿ ನೀಡಿದೆ.

ಕಳೆದ 15 ದಿನದಲ್ಲಿ ಉತ್ತರ ಪ್ರದೇಶಕ್ಕೆ ವಿದೇಶದಿಂದ ಒಟ್ಟು 250 ಜನರು ಆಗಮಿಸಿದ್ದು, ಇದರಲ್ಲಿ 10 ಮಂದಿ ನಾಪತ್ತೆಯಾಗಿದ್ದಾರೆಂದು ಮೀರತ್​​ ಜಿಲ್ಲಾಡಳಿತ ತಿಳಿಸಿದೆ.

ಇದಕ್ಕೆ ಸಂಬಂಧಿಸಿದಂತೆ ಮಾಧ್ಯಮಗೋಷ್ಠಿ ನಡೆಸಿ ಮಾಹಿತಿ ನೀಡಿರುವ ಮೀರತ್​​​ ಸಿಎಂಒ ಅಖಿಲೇಶ್​ ಮೋಹನ್​, ಒಮಿಕ್ರಾನ್​ ತಡೆಗಟ್ಟಲು ಮೀರತ್​ನಲ್ಲೂ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗಿದ್ದು, ಕಳೆದ 15 ದಿನಗಳಲ್ಲಿ 250 ವಿದೇಶಿಗರು ವಾಪಸ್​​​​​​​ ಆಗಿದ್ದಾರೆ. ಆದರೆ ಇದರಲ್ಲಿ 10 ಮಂದಿ ನಾಪತ್ತೆಯಾಗಿದ್ದಾರೆಂಬ ಮಾಹಿತಿ ಹಂಚಿಕೊಂಡಿದ್ದಾರೆ.

ಆಸ್ಟ್ರೇಲಿಯಾ, ಬಾಂಗ್ಲಾದೇಶ, ಕೆನಡಾ, ಜರ್ಮನಿ, ಜಪಾನ್​, ಕುವೈತ್​​, ಮಲೇಷಿಯಾ, ಮಾಲ್ಡೀವ್​​, ನ್ಯೂಜಿಲ್ಯಾಂಡ್​​, ದಕ್ಷಿಣ ಆಫ್ರಿಕಾ, ಶ್ರೀಲಂಕಾ ಸೇರಿದಂತೆ ಅನೇಕ ವಿದೇಶಗಳಿಂದ ಜನರು ಆಗಮಿಸಿದ್ದು, ಇವರನ್ನೆಲ್ಲ ಐಸೋಲೇಷನ್​​ನಲ್ಲಿಡಲಾಗಿದ್ದು, ತೀವ್ರ ನಿಗಾ ವಹಿಸಲಾಗಿದೆ ಎಂದರು.

ಕರ್ನಾಟಕದಲ್ಲಿ ಈಗಾಗಲೇ ಎರಡು ಒಮಿಕ್ರಾನ್​​ ಪ್ರಕರಣ ಪತ್ತೆಯಾಗಿದ್ದು, ಬೆಂಗಳೂರಿಗೆ ಆಗಮಿಸಿರುವ ಅನೇಕ ವಿದೇಶಿಗರ ಪೈಕಿ 10 ಜನರು ನಾಪತ್ತೆಯಾಗಿದ್ದಾರೆಂದು ಆರೋಗ್ಯ ಸಚಿವ ಡಾ. ಸುಧಾಕರ್ ಈಗಾಗಲೇ ಮಾಹಿತಿ ಹಂಚಿಕೊಂಡಿದ್ದಾರೆ.