'ಲೋಖೋ ಸೋನಾರ್ ಬಾಂಗ್ಲಾ' ಉದ್ಘಾಟಿಸಿದ ಬಿಜೆಪಿ ರಾಷ್ಟ್ರಾಧ್ಯಕ್ಷ ಜೆ.ಪಿ.ನಡ್ಡಾ

ಸಾಮಾನ್ಯ ಜನರ ಸಲಹೆಗಳನ್ನು ಪಡೆಯಲು 'ಲೋಖೋ ಸೋನಾರ್ ಬಾಂಗ್ಲಾ' ಪ್ರಣಾಳಿಕೆ ಕ್ರೌಡ್‌ ಸೋರ್ಸಿಂಗ್ ಅಭಿಯಾನವನ್ನು ಬಿಜೆಪಿ ರಾಷ್ಟ್ರಾಧ್ಯಕ್ಷ ಜೆ.ಪಿ.ನಡ್ಡಾ ಇಂದು ಪ್ರಾರಂಭಿಸಿದರು.

ಕೋಲ್ಕತಾ: ಇಲ್ಲಿನ ಬಿಜೆಪಿ ಕಚೇರಿಯಲ್ಲಿ ಸಾಮಾನ್ಯ ಜನರ ಸಲಹೆಗಳನ್ನು ಪಡೆಯಲು ಭಾರತೀಯ ಜನತಾ ಪಕ್ಷ ರಾಷ್ಟ್ರಾಧ್ಯಕ್ಷ ಜೆ.ಪಿ.ನಡ್ಡಾ ಅವರು 'ಲೋಖೋ ಸೋನಾರ್ ಬಾಂಗ್ಲಾ' ಪ್ರಣಾಳಿಕೆ ಕ್ರೌಡ್ ‌ಸೋರ್ಸಿಂಗ್ ಅಭಿಯಾನವನ್ನು ಪ್ರಾರಂಭಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ನಡ್ಡಾ, "ನಾವು ಜನರಿಂದ 2 ಕೋಟಿ ಸಲಹೆಗಳನ್ನು ಸ್ವೀಕರಿಸುತ್ತೇವೆ. ಪಶ್ಚಿಮ ಬಂಗಾಳದಾದ್ಯಂತ ಅಂದಾಜು 30,000 ಸಲಹಾ ಪೆಟ್ಟಿಗೆಗಳನ್ನು ಅಳವಡಿಸುತ್ತೇವೆ. 294 ವಿಧಾನಸಭಾ ಕ್ಷೇತ್ರಗಳಲ್ಲಿ ಸುಮಾರು 100 ಪೆಟ್ಟಿಗೆಗಳನ್ನು ಇಡಲಾಗುವುದು" ಎಂದರು.

"ಸ್ವಾಮಿ ವಿವೇಕಾನಂದರು, ರವೀಂದ್ರನಾಥ ಠಾಗೋರ್​, ಬಂಕಿಮ್ ಚಂದ್ರ ಚಟರ್ಜಿ, ನೇತಾಜಿ ಸುಭಾಷ್ ಚಂದ್ರ ಬೋಸ್, ಶ್ಯಾಮಾ ಪ್ರಸಾದ್ ಮುಖರ್ಜಿ, ಈಶ್ವರ್ ಚಂದ್ರ ವಿದ್ಯಾಸಾಗರ್ ಅವರು ನೀಡಿದ ಕೊಡುಗೆಯ ನಾಡಿನಲ್ಲಿ 'ಸೋನಾರ್ ಬಾಂಗ್ಲಾ' ತಯಾರಿಸಲು ನಾವು ಪ್ರಯತ್ನಗಳನ್ನು ಮಾಡುತ್ತಿದ್ದೇವೆ" ಎಂದರು.

ಈ ಕಾರ್ಯಕ್ರಮದಲ್ಲೇ ನಟಿ ಪಾಯಲ್ ಸರ್ಕಾರ್, ಬಿಜೆಪಿ ರಾಷ್ಟ್ರಾಧ್ಯಕ್ಷ ಜೆ.ಪಿ.ನಡ್ಡಾ ಅವರ ಸಮ್ಮುಖದಲ್ಲಿ ಬಿಜೆಪಿಗೆ ಸೇರಿದರು.