ಅಸಹಾಯಕತೆ: 100 ರೂಪಾಯಿಗೆ ಹಾರಿಹೋಯ್ತು ಮಗನ ಪ್ರಾಣ

ವಿದ್ಯುತ್​ ಕಂಬ ಏರಿ ಕೆಲಸ ಮಾಡ್ತಿದ್ದ ವೇಳೆ ವ್ಯಕ್ತಿಯೊಬ್ಬನ ಪ್ರಾಣಪಕ್ಷಿ ಹಾರಿಹೋಗಿದ್ದು, ಮೃತ ವ್ಯಕ್ತಿಯ ದೇಹವನ್ನಿಟ್ಟುಕೊಂಡು ತಾಯಿ ಕಣ್ಣೀರು ಹಾಕಿರುವ ಘಟನೆ ನಡೆದಿದೆ.

ಛತರ್ಪುರ್​(ಮಧ್ಯಪ್ರದೇಶ):ಛತರ್ಪುರ್ ಜಿಲ್ಲಾ ಆಸ್ಪತ್ರೆ ಹೊರಗೆ ಅಹಾಯಕ ತಾಯಿಯೊಬ್ಬಳ ಮಗನ ಮೃತದೇಹ ತೊಡೆಯ ಮೇಲೆ ಮಲಗಿಸಿಕೊಂಡು ಅಳುತ್ತಿರುವ ದೃಶ್ಯ ವೈರಲ್​ ಆಗಿದೆ. ಇದನ್ನ ನೋಡಿದ ಯಾವುದೇ ವ್ಯಕ್ತಿಯ ಕಣ್ಣಂಚಲ್ಲಿ ನೀರು ಬರದೇ ಇರದು.

ವಾಸ್ತವವಾಗಿ, 100 ರೂಪಾಯಿ ವೇತನಕ್ಕಾಗಿ ವ್ಯಕ್ತಿ ವಿದ್ಯುತ್​ ಕಂಬ ಹತ್ತುವ ಕೆಲಸಕ್ಕೆ ಮುಂದಾಗಿ ತನ್ನ ಪ್ರಾಣ ಕಳೆದುಕೊಂಡಿದ್ದಾನೆ. ಹಳ್ಳಿಯಲ್ಲಿ ವಾಸವಾಗಿದ್ದ ಖಾಸಗಿ ಗುತ್ತಿಗೆದಾರನೊಬ್ಬ ತನ್ನೊಂದಿಗೆ ಕೆಲಸ ಮಾಡಲು ಬಲವಂತವಾಗಿ ಕರೆದುಕೊಂಡು ಹೋಗಿದ್ದು, 100 ರೂ. ಕೂಲಿ ನೀಡುವುದಾಗಿ ಹೇಳಿದ್ದಾನೆ.

ವಿದ್ಯುತ್​ ಕಂಬ ಹತ್ತಿ ಕೆಲಸ ಮಾಡ್ತಿದ್ದ ವೇಳೆ ಹಠಾತ್​ ಶಾಕ್​ ಹೊಡೆದು ಅಖಿಲೇಶ್​ ಸಾವನ್ನಪ್ಪಿದ್ದಾನೆ. ತಕ್ಷಣವೇ ಆತನನ್ನ ಮೃತನ ತಾಯಿ ಸೀತಾ ಹಾಗೂ ಕುಟುಂಬದ ಸದಸ್ಯರು ಜಿಲ್ಲಾಸ್ಪತ್ರೆಗೆ ಕರೆದುಕೊಂಡು ಬಂದಿದ್ದಾರೆ. ಆದರೆ ಆತ ಸಾವನ್ನಪ್ಪಿದ್ದಾನೆಂದು ಘೋಷಣೆ ಮಾಡಿದ್ದಾರೆ.

ಮೃತ ವ್ಯಕ್ತಿಯ ಮರಣೋತ್ತರ ಪರೀಕ್ಷೆ ನಡೆಸಲಾಗಿದ್ದು, ಈಗಾಗಲೇ ಕುಟುಂಬಕ್ಕೆ ಶವ ಹಸ್ತಾಂತರ ಮಾಡಲಾಗಿದೆ. ಅಖಿಲೇಶ್​ ಕುಟುಂಬದಲ್ಲಿ ಮೂವರು ಕಿರಿಯ ಸಹೋದರರಿದ್ದು, ಪತ್ನಿ, ತಾಯಿ ಹಾಗೂ ಓರ್ವ ಮಗನಿದ್ದಾನೆ. ಕುಟುಂಬಕ್ಕೆ ಈತನೇ ಆಧಾರಸ್ತಂಭವಾಗಿದ್ದನು. ಆದರೆ ಇದೀಗ 100 ರೂ ಕೂಲಿಗೋಸ್ಕರ ಪ್ರಾಣ ಕಳೆದುಕೊಂಡಿದ್ದಾನೆ.

ಸ್ವಲ್ಪ ಸಮಯಕ್ಕೂ ಮೊದಲು ತಾಯಿ ಭೇಟಿಯಾಗಿದ್ದ ಮಗ

ಕೆಲಸಕ್ಕೆ ತೆರಳುವುದಕ್ಕೂ ಕೆಲ ನಿಮಿಷಗಳ ಮೊದಲು ತಾಯಿ ಭೇಟಿ ಮಾಡಿದ್ದ ಅಖಿಲೇಶ್​ ಕೆಲಸಕ್ಕೆ ಹೋಗುವುದಾಗಿ ಹೇಳಿಕೊಂಡಿದ್ದನು. ಆದರೆ, ಇದಾದ ಕೆಲ ಗಂಟೆಗಳಲ್ಲಿ ಆತ ಸಾವನ್ನಪ್ಪಿರುವ ಸುದ್ದಿ ಕೇಳಿ ತಾಯಿ ಆಘಾತಕ್ಕೊಳಗಾಗಿದ್ದಾಳೆ. ಆಸ್ಪತ್ರೆ ಮುಂದೆ ಮಗನ ಮೃತದೇಹ ತೊಡೆಯ ಮೇಲೆ ಹಾಕಿಕೊಂಡು ಕಣ್ಣೀರು ಹಾಕಿದ್ದಾಳೆ.