ಸಾವನ್ನಪ್ಪಿದ ಕೋಳಿ ಆತ್ಮಶಾಂತಿಗೋಸ್ಕರ ತಿಥಿ: 500 ಜನರಿಗೆ ಊಟ ಹಾಕಿಸಿದ ವೈದ್ಯ!

ಸಾವನ್ನಪ್ಪಿರುವ ಹುಂಜದ ತಿಥಿ ಮಾಡಲಾಗಿದ್ದು, ಬರೋಬ್ಬರಿ 500 ಜನರಿಗೆ ಔತಣಕೂಟ ಏರ್ಪಡಿಸಿರುವ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.

ಪ್ರತಾಪಗಢ(ಉತ್ತರ ಪ್ರದೇಶ):ಮನುಷ್ಯರು, ಮುದ್ದಿನ ಪ್ರಾಣಿಗಳು ಸಾವನ್ನಪ್ಪಿದಾಗ ಅಂತಿಮ ವಿಧಿ - ವಿಧಾನ ಮಾಡುವುದು, ಆತ್ಮಶಾಂತಿಗೋಸ್ಕರ ತಿಥಿ ಕಾರ್ಯಕ್ರಮ ಮಾಡಿ ನೂರಾರು ಜನರಿಗೆ ಊಟ ಹಾಕಿಸುವುದು ಸರ್ವೆ ಸಾಮಾನ್ಯ. ಆದರೆ, ಇಲ್ಲೋರ್ವ ವೈದ್ಯ ಕೋಳಿ ಸಾವನ್ನಪ್ಪಿರುವುದಕ್ಕಾಗಿ ಅದರ ಆತ್ಮಕ್ಕೆ ಶಾಂತಿ ಕೋರಿ ಔತಣಕೂಟ ಏರ್ಪಡಿಸಿದ್ದಾರೆ.

ಉತ್ತರ ಪ್ರದೇಶದ ಪ್ರತಾಪಗಢದಲ್ಲಿ ಈ ಘಟನೆ ನಡೆದಿದೆ. ಸಾವನ್ನಪ್ಪಿರುವ 5 ವರ್ಷದ ಕೋಳಿಯ ಆತ್ಮಕ್ಕೆ ಶಾಂತಿ ಕೋರಿ ವೈದ್ಯ 13ನೇ ದಿನದಂದು ತಿಥಿ ಮಾಡಿದ್ದು, 500 ಮಂದಿಗೆ ಔತಣಕೂಟ ಏರ್ಪಡಿಸಿದ್ದರು.

ಪ್ರತಾಪ್​ಗಢ ಜಿಲ್ಲೆಯ ಫತಾನ್​ಪುರ ಪೊಲೀಸ್ ಠಾಣಾ ವ್ಯಾಪ್ತಿಯ ಬೆಹದೌಲ್​ ಕಾಲಾ ಗ್ರಾಮದ ನಿವಾಸಿ ಡಾ. ಶಾಲಿಕ್ರಮ್​ ಸರೋಜ್​ ಕ್ಲಿನಿಕ್​ ನಡೆಸುತ್ತಿದ್ದರು. ಅವರ ಮನೆಯಲ್ಲಿ ಮೇಕೆ, ಹುಂಜ ಸಾಕಿದ್ದರು. ಇಡೀ ಕುಟುಂಬದ ಸದಸ್ಯರು ಕೋಳಿಯನ್ನ ತುಂಬಾ ಪ್ರೀತಿಸುತ್ತಿದ್ದರು. ಅದಕ್ಕೆ ಲಾಲಿ ಎಂದು ಹೆಸರಿಟ್ಟಿದ್ದರು.

ಜುಲೈ 8ರಂದು ಡಾ.ಶಾಲಿಕ್ರಮ್​ ಅವರ ಮೇಲೆ ಮೇಲೆ ಶ್ವಾನವೊಂದು ದಾಳಿ ಮಾಡಿದೆ. ಈ ವೇಳೆ, ನಾಯಿ ಜೊತೆ ಲಾಲಿ ಸಹ ಸಂಘರ್ಷಕ್ಕೆ ಇಳಿದಿದೆ. ಈ ವೇಳೆ ಅದು ಗಂಭೀರವಾಗಿ ಗಾಯಗೊಂಡಿದೆ.

ಜುಲೈ 9ರ ಸಂಜೆ ಹುಂಜ ಲಾಲಿ ಸಾವನ್ನಪ್ಪಿದೆ. ಇದಾದ ಬಳಿಕ ಮನೆಯ ಸಮೀಪದಲ್ಲಿ ಹೂಳಲಾಗಿದೆ. ಇದಾದ ಬಳಿಕ ಅದರ ಆತ್ಮಕ್ಕೆ ಶಾಂತಿ ಸಿಗಲೆಂದು ಹದಿಮೂರನೇ ದಿನದಂದು ತಿಥಿ ಮಾಡಿದ್ದಾರೆ. ಈ ವೇಳೆ ವೈದ್ಯರು ತಲೆ ಸಹ ಬೋಳಿಸಿಕೊಂಡಿದ್ದಾರೆ. ಸಂಜೆ 6 ಗಂಟೆಯಿಂದ ರಾತ್ರಿ 10 ಗಂಟೆಯವರೆಗೆ ಸುಮಾರು 500ಕ್ಕೂ ಹೆಚ್ಚು ಜನರಿಗೆ ಔತಣಕೂಟ ಏರ್ಪಡಿಸಲಾಗಿದೆ. ಇದಕ್ಕೋಸ್ಕರ 40 ಸಾವಿರ ರೂಪಾಯಿ ಖರ್ಚು ಮಾಡಲಾಗಿದೆ ಎಂದು ಅವರು ತಿಳಿಸಿದ್ದಾರೆ.