ಒಎನ್‌ಜಿಸಿ ಅಪಹರಣ ಪ್ರಕರಣ: ಕೊನೆಗೂ ಸಿಬ್ಬಂದಿಯನ್ನು ಬಿಡುಗಡೆ ಮಾಡಿದ ಉಲ್ಫಾ ಉಗ್ರರು

ಅಸ್ಸೋಂ ಮುಖ್ಯಮಂತ್ರಿ ಆಗ್ರಹದ ಬಳಿಕ ಉಲ್ಫಾ ಉಗ್ರರು ತಾವು ಅಪಹರಿಸಿದ್ದ ಒಎನ್‌ಜಿಸಿ ಸಿಬ್ಬಂದಿಯನ್ನು ಬಿಡುಗಡೆ ಮಾಡಿದ್ದಾರೆ.

ಶಿವಸಾಗರ್​ (ಅಸ್ಸೋಂ): ತಾವು ಅಪಹರಿಸಿದ್ದ ತೈಲ ಮತ್ತು ನೈಸರ್ಗಿಕ ಅನಿಲ ನಿಗಮದ (ಒಎನ್‌ಜಿಸಿ) ಸಿಬ್ಬಂದಿ ರಿತುಲ್ ಸೈಕಿಯಾರನ್ನು ಕೊನೆಗೂ ಉಲ್ಫಾ ಉಗ್ರರು ಬಿಡುಗಡೆ ಮಾಡಿದ್ದಾರೆ.

ಏಪ್ರಿಲ್ 21ರಂದು ಶಿವಸಾಗರ ಜಿಲ್ಲೆಯ ಪ್ರದೇಶದಲ್ಲಿ ಯುನೈಟೆಡ್ ಲಿಬರೇಶನ್ ಫ್ರಂಟ್ ಆಫ್ ಅಸ್ಸೋಂ-ಇಂಡಿಪೆಂಡೆಂಟ್ (ULFA-I) ಎಂಬ ನಿಷೇಧಿತ ಸಂಘಟನೆಯ ಉಗ್ರರು ಒಎನ್‌ಜಿಸಿಯ ಇಬ್ಬರು ಸಹಾಯಕ ಜೂನಿಯರ್ ಎಂಜಿನಿಯರ್​ಗಳಾದ ಮೋಹನ್ ಗೊಗೊಯ್ (35), ಅಲಕೇಶ್ ಸೈಕಿಯಾ (28) ಹಾಗೂ ಜೂನಿಯರ್​ ಟೆಕ್ನಿಶಿಯನ್​ ರಿತುಲ್ ಸೈಕಿಯಾ (33) ಅವರನ್ನು ಅಪಹರಿಸಿದ್ದರು.

ಅಪಹರಣಕ್ಕೊಳಗಾಗಿದ್ದ ಒಎನ್​ಜಿಸಿ ಸಿಬ್ಬಂದಿ

ಜಂಟಿ ಕಾರ್ಯಾಚರಣೆ ಕೈಗೊಂಡಿದ್ದ ಭಾರತೀಯ ಸೇನೆ ಹಾಗೂ ಅಸ್ಸೋಂ ರೈಫಲ್ಸ್ ಮೂರು ದಿನಗಳಲ್ಲೇ ಮೋಹನ್ ಗೊಗೊಯ್ ಹಾಗೂ ಅಲಕೇಶ್ ಸೈಕಿಯಾರನ್ನು ರಕ್ಷಿಸಿದ್ದರು. ಮತ್ತೋರ್ವನಿಗಾಗಿ ಕಾರ್ಯಾಚರಣೆ ಮುಂದುವರೆಸಿದ್ದರು. ಇತ್ತೀಚೆಗಷ್ಟೇ ಅಸ್ಸೋಂ ಮುಖ್ಯಮಂತ್ರಿ ಹಿಮಂತ್​ ಬಿಶ್ವಾ ಶರ್ಮಾ ಸುದ್ದಿಗೋಷ್ಠಿಯಲ್ಲಿ ಅಲಕೇಶ್ ಸೈಕಿಯಾರನ್ನು ಬಿಡುಗಡೆ ಮಾಡುವಂತೆ ಉಲ್ಫಾ ಸಂಘಟನೆಯ ಮುಖ್ಯ ಕಮಾಂಡರ್​ಗೆ ಆಗ್ರಹಿಸಿದ್ದರು. ಇದೀಗ ಉಗ್ರರು ರಿತುಲ್ ಸೈಕಿಯಾರನ್ನು ಬಿಡುಗಡೆ ಮಾಡಿದ್ದಾರೆ.