ಉತ್ತರಾಖಂಡದ ಚಮೋಲಿಯಲ್ಲಿ ಭೂಕುಸಿತ: ಜೋಶಿಮಠ-ನೀತಿ ಕಣಿವೆ ಗಡಿ ಬಂದ್​

ಉತ್ತರಾಖಂಡದ ಚಮೋಲಿ ಜಿಲ್ಲೆಯ ಜೋಶಿಮಠ-ನೀತಿ ಕಣಿವೆ ಗಡಿ ಭಾಗದಲ್ಲಿ ನಿರಂತರವಾಗಿ ಭೂಕುಸಿತವಾಗುತ್ತಿದ್ದು, ಬೆಟ್ಟದಿಂದ ಬೃಹತ್‌ ಬಂಡೆಗಳು ಧರೆಗುರುಳುತ್ತಿವೆ.

ಚಮೋಲಿ:ಉತ್ತರಾಖಂಡ ರಾಜ್ಯಾದ್ಯಂತ ಸುರಿಯುತ್ತಿರುವ ಭಾರೀ ಮಳೆಯಿಂದಾಗಿ ಚಮೋಲಿ ಜಿಲ್ಲೆಯಲ್ಲಿ ಭೂಕುಸಿತ ಸಂಭವಿಸಿದ್ದು, ಮೂರು ದಿನಗಳಿಂದ ಸಂಚಾರ ಅಸ್ತವ್ಯಸ್ತಗೊಂಡಿದೆ. ಇದೀಗ ಜೋಶಿಮಠ-ನೀತಿ ಕಣಿವೆ ಗಡಿ ಕೂಡ ಬಂದ್ ಆಗಿದ್ದು, ಅನೇಕ ಗ್ರಾಮಗಳು ಸಂಪರ್ಕ ಕಳೆದುಕೊಂಡಿವೆ.

ಜೋಶಿಮಠ-ನೀತಿ ಕಣಿವೆ ಗಡಿ ಭಾಗದಲ್ಲಿ ನಿರಂತರವಾಗಿ ಭೂಕುಸಿತವಾಗುತ್ತಿದ್ದು, ಬೆಟ್ಟದಿಂದ ಹೆಬ್ಬಂಡೆಗಳು ಧರೆಗುರುಳುತ್ತಿವೆ. ವಿದ್ಯುತ್ ಕಂಬಗಳು ನೆಲಕ್ಕುರುಳಿದ್ದು, ವಿದ್ಯುತ್​ ಕೂಡ ಇಲ್ಲದೇ ಜನರು ಭಯದಿಂದಲೇ ರಾತ್ರಿಗಳನ್ನು ಕಳೆಯುವ ಪರಿಸ್ಥಿತಿ ಒದಗಿಬಂದಿದೆ. ಮನೆಯಿಂದ ಹೊರಹೋಗಲಾದ ಕಾರಣ ಅಗತ್ಯ ವಸ್ತುಗಳನ್ನು ಪೂರೈಸುವಂತೆ ಗ್ರಾಮಸ್ಥರು ಸರ್ಕಾರದ ಬಳಿ ಮನವಿ ಮಾಡಿದ್ದಾರೆ. ಇನ್ನು ಅನೇಕ ವಾಹನಗಳು ಮಾರ್ಗಮಧ್ಯೆದಲ್ಲೇ ಸಿಲುಕಿಕೊಂಡಿವೆ.

ಇದನ್ನೂ ಓದಿ: ಭೂಕಂಪಕ್ಕೆ ತತ್ತರಿಸಿದ ಹೈಟಿ: ಸಾವಿನ ಸಂಖ್ಯೆ 1,419ಕ್ಕೆ ಏರಿಕೆ, 6000 ಮಂದಿಗೆ ಗಾಯ

ಕಳೆದ ಫೆಬ್ರವರಿಯಲ್ಲಿ ಚಮೋಲಿಯಲ್ಲಿ ಹಿಮಸ್ಫೋಟಿಸಿ ಪ್ರವಾಹ ಉಂಟಾಗಿತ್ತು. 74 ಮಂದಿಯ ಮೃತದೇಹಗಳು ಸಿಕ್ಕಿದ್ದು, ನಾಪತ್ತೆಯಾದ ನೂರಕ್ಕೂ ಹೆಚ್ಚು ಮಂದಿ ಕೊನೆಗೂ ಸಿಗಲಿಲ್ಲ.