ಧಗಧಗನೇ ಹೊತ್ತಿ ಉರಿದ ಸರ್ಕಾರಿ ಬಸ್​.. 30 ಜೀವಗಳು ಉಳಿಸಿದ ಚಾಲಕ! ವಿಡಿಯೋ..

ತಾಂತ್ರಿಕ ದೋಷದಿಂದಾಗಿ ಸರ್ಕಾರಿ ಬಸ್​ವೊಂದು ಧಗಧಗನೇ ಹೊತ್ತಿ ಉರಿದಿರುವ ಘಟನೆ ತೆಲಂಗಾಣದ ಜನಗಾಮ ಜಿಲ್ಲೆಯಲ್ಲಿ ನಡೆದಿದೆ.

ಜನಗಾಮ:ವರಂಗಲ್​ 1 ಡಿಪೋಗೆ ಸೇರಿದ್ದ ಸೂಪರ್​ ಲಗ್ಜರಿ ಬಸ್​ವೊಂದು ನಡು ರಸ್ತೆಯಲ್ಲೇ ಧಗಧಗನೇ ಹೊತ್ತಿ ಉರಿದ ಘಟನೆ ಇಲ್ಲಿನ ಪೊಲೀಸ್​ ಠಾಣೆಯ ಘನ್​ಪೂರ್​ ಬಳಿ ಶುಕ್ರವಾರ ಸಂಭವಿಸಿದೆ.

ಹನ್ಮಕೊಂಡದಿಂದ ಹೈದರಾಬಾದ್​ಗೆ ಸೂಪರ್​ ಲಗ್ಜರಿ ಬಸ್​ನಲ್ಲಿ 30 ಪ್ರಯಾಣಿಕರು ತೆರಳುತ್ತಿದ್ದರು. ಮಧ್ಯಾಹ್ನ ಜನಗಾದ ಸ್ಟೇಷನ್​ಘನ್​ಪೂರ್​ ಬಳಿ ಬರುತ್ತಿದ್ದಂತೆ ಇಂಜಿನ್​​​​ನಲ್ಲಿ ಹೊಗೆ ಕಾಣಿಸಿಕೊಂಡಿದೆ. ಕೂಡಲೇ ಬಸ್​ ನಿಲ್ಲಿಸಿದ ಚಾಲಕ ವೆಂಕಟೇಶ್​ ಪ್ರಯಾಣಿಕರನ್ನು ಕೆಳಗಿಳಿಸಿದ್ದಾರೆ.

ಪ್ರಯಾಣಿಕರನ್ನು ಕೆಳಗಿಳಿಸುತ್ತಿದ್ದಂತೆ ಬಸ್​ ತುಂಬ ಬೆಂಕಿ ಆವರಿಸಿದೆ. ನಡುರಸ್ತೆಯಲ್ಲಿ ಎಲ್ಲರೂ ನೋಡು ನೋಡುತ್ತಿದ್ದಂತೆ ಬಸ್​ ಬೆಂಕಿಗಾಹುತಿಯಾಯಿತು. ಸ್ಥಳೀಯ ಗ್ರಾಮ ಪಂಚಾಯ್ತಿ ಸಿಬ್ಬಂದಿ ಟ್ರ್ಯಾಕ್ಟರ್​ ಮೂಲಕ ನೀರಿನ ಟ್ಯಾಂಕ್​ ತಂದು ಬಸ್​ನ ಬೆಂಕಿ ನಂದಿಸಿದರು.

ಇಂಜಿನ್​ನಲ್ಲಿ ಶಾಟ್​ ಸರ್ಕ್ಯೂಟ್​ ಆದ ಕಾರಣ ಈ ಘಟನೆ ನಡೆದಿದೆ ಎಂದು ವರಂಗಲ್​ ಅರ್ಬನ್​ ಜಿಲ್ಲಾ ಡಿವಿಎಂ ಶ್ರೀನಿವಾಸರಾವು ತಿಳಿಸಿದ್ದಾರೆ. ಸುದ್ದಿ ತಿಳಿಯುತ್ತಿದ್ದಂತೆ ಸ್ಥಳೀಯ ನಾಯಕರೊಬ್ಬರು ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.