ಮಹಾರಾಷ್ಟ್ರಕ್ಕೆ ಸಿಎಂ ಫಡ್ನವೀಸ್​​, ಡೆಪ್ಯೂಟಿ ಸಿಎಂ​ ಶಿಂಧೆ: ವರದಿ

ಮಹಾರಾಷ್ಟ್ರ ಸಿಎಂ ಸ್ಥಾನಕ್ಕೆ ಉದ್ಧವ್ ಠಾಕ್ರೆ ರಾಜೀನಾಮೆಯಿಂದಾಗಿ ಮಹಾವಿಕಾಸ್ ಅಘಾಡಿ ಮೈತ್ರಿ ಸರ್ಕಾರ ಪತನಗೊಂಡಿದೆ. ನೂತನ ಮುಖ್ಯಮಂತ್ರಿಯಾಗಿ ಪ್ರತಿಪಕ್ಷ ನಾಯಕರಾಗಿರುವ ದೇವೇಂದ್ರ ಫಡ್ನವೀಸ್​​ ಪ್ರಮಾಣ ವಚನ ಸ್ವೀಕರಿಸುವುದು ಬಹುತೇಕ ನಿಚ್ಛಳಲಾಗಿದೆ. ಸರ್ಕಾರ ಉರುಳಿಸುವಲ್ಲಿ ನಿರ್ಣಾಯಕ ಪಾತ್ರ ನಿರ್ವಹಿಸಿದ ಶಿವಸೇನೆಯ ಪ್ರಮುಖ ಬಂಡಾಯ ನಾಯಕ ಏಕನಾಥ್‌ ಶಿಂಧೆ ಅವರ ಪಾತ್ರವೇನು ಎನ್ನುವುದಕ್ಕೂ ಉತ್ತರ ಸಿಗುತ್ತಿದೆ.

ಮುಂಬೈ(ಮಹಾರಾಷ್ಟ್ರ):ಸುಪ್ರೀಂಕೋರ್ಟ್ ಮಹಾರಾಷ್ಟ್ರದ ಅಘಾಡಿ ಸರ್ಕಾರಕ್ಕೆ ವಿಶ್ವಾಸಮತಯಾಚನೆ ಮಾಡಲು ಆದೇಶ ನೀಡುತ್ತಿದ್ದಂತೆ ನಿನ್ನೆ ರಾತ್ರಿ ಫೇಸ್​​ಬುಕ್​ ಲೈವ್‌ಗೆ ಬಂದ ಉದ್ಧವ್ ಠಾಕ್ರೆ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ಪ್ರಕಟಿಸಿದ್ದರು. ಇದೀಗ, ರಾಜ್ಯದಲ್ಲಿ ಹೊಸ ಸರ್ಕಾರ ರಚನೆಗೆ ಬಿಜೆಪಿ ಸಕಲ ರೀತಿಯಲ್ಲೂ ತಯಾರಿ ನಡೆಸುತ್ತಿದೆ. ದೇವೇಂದ್ರ ಫಡ್ನವೀಸ್​​ ಮತ್ತೊಮ್ಮೆ ಸಿಎಂ ಸ್ಥಾನಕ್ಕೇರುವುದು ಬಹುತೇಕ ಖಚಿತವಾಗಿದೆ.

ರಾಜ್ಯದಲ್ಲಿ ಅತಿದೊಡ್ಡ ರಾಜಕೀಯ ಪಕ್ಷವಾಗಿ ಹೊರಹೊಮ್ಮಿರುವ ಭಾರತೀಯ ಜನತಾ ಪಾರ್ಟಿ(ಬಿಜೆಪಿ)ಗೆ ಶಿವಸೇನೆಯ ಬಂಡಾಯ ಶಾಸಕರು ಸಾಥ್​ ನೀಡಿದ್ದಾರೆ. ಉದ್ಧವ್ ವಿರುದ್ಧ ಬಂಡೆದ್ದ ಶಾಸಕರು ಈಗಾಗಲೇ ಗೋವಾದ ಪಣಜಿಯಲ್ಲಿದ್ದು, ಮುಖ್ಯಸ್ಥ ಏಕನಾಥ್ ಶಿಂಧೆ ಮುಂಬೈಗೆ ಆಗಮಿಸಿದ್ದಾರೆ.

ಏಕನಾಥ್ ಶಿಂಧೆ ಇಂದು ಮಧ್ಯಾಹ್ನ ರಾಜ್ಯಪಾಲರು ಹಾಗೂ ದೇವೇಂದ್ರ ಫಡ್ನವೀಸ್​​ ಅವರನ್ನು ಭೇಟಿ ಮಾಡಲಿದ್ದಾರೆ. ಹಾಗಾಗಿ, ಸರ್ಕಾರ ರಚನೆ ಕಸರತ್ತು ಮತ್ತಷ್ಟು ವೇಗ ಪಡೆದುಕೊಂಡಿದೆ. ಪ್ರಾಥಮಿಕ ಮಾಹಿತಿಯ ಪ್ರಕಾರ, ನಾಳೆ ರಾಜಭವನದಲ್ಲಿ ಫಡ್ನವೀಸ್​​ ಸಿಎಂ ಆಗಿಯೂ, ಏಕನಾಥ್ ಶಿಂಧೆ ಉಪಮುಖ್ಯಮಂತ್ರಿಯಾಗಿಯೂ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ.

ವಿಧಾನಸಭೆಯಲ್ಲಿ ಪಕ್ಷಗಳ ಬಲಾಬಲ: ಬಿಜೆಪಿಯ 105 ಶಾಸಕರು, ಬಂಡಾಯ ಶಿವಸೇನೆಯ 39 ಶಾಸಕರು, ಸ್ವತಂತ್ರ 13 ಶಾಸಕರು ಹಾಗೂ ಸಣ್ಣ ಪಕ್ಷಗಳ 10 ಮಂದಿ ಶಾಸಕರಿದ್ದಾರೆ.

ಮಹಾ ವಿಕಾಸ್ ಅಘಾಡಿ:ಎನ್​​ಸಿಪಿ 53, ಶಿವಸೇನೆ 16, ಕಾಂಗ್ರೆಸ್​​ 44 ಹಾಗೂ ಇತರೆ 6 ಶಾಸಕರಿದ್ದಾರೆ.

288 ಸದಸ್ಯ ಬಲದ ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ಬಿಜೆಪಿ ಹಾಗೂ ಶಿವಸೇನೆ ಜೊತೆಯಾಗಿ ಸರ್ಕಾರ ರಚನೆ ಮಾಡಲು ಬೇಕಿರುವ ಸಂಖ್ಯಾಬಲ ಹೊಂದಿದೆ. ಇದಕ್ಕೆ ಇತರೆ ಪಕ್ಷಗಳ 9 ಶಾಸಕರ ಬೆಂಬಲವೂ ಇರುವುದರಿಂದ ರಾಜ್ಯದಲ್ಲಿ ಕಮಲ ಅರಳುವುದರಲ್ಲಿ ಯಾವುದೇ ಸಂದೇಹವಿಲ್ಲ.

ಯಾರಿಗೆಲ್ಲ ಮಂತ್ರಿಸ್ಥಾನ ಸಾಧ್ಯತೆ?: ದೇವೇಂದ್ರ ಫಡ್ನವೀಸ್​​(ಮುಖ್ಯಮಂತ್ರಿ), ಏಕನಾಥ್​ ಶಿಂಧೆ(ಉಪಮುಖ್ಯಮಂತ್ರಿ), ಚಂದ್ರಕಾಂತ್​ ಪಾಟೀಲ್​, ಗಿರೀಶ್ ಮಹಾಜನ್​, ಗಣೇಶ್ ನಾಯಕ್​, ಸಂಭಾಜಿ ಪಾಟೀಲ್​, ಗುಲಾಬ್​ರಾವ್ ಪಾಟೀಲ್​, ಉದಯ್ ಸಮಂತ್​, ಅಬ್ದುಲ್​ ಸತಾರ್, ಸಂಜಯ್ ರಾಥೋಡ್​, ತಾನಾಜಿ ಸಾವಂತ್​​ ಪ್ರಮುಖರು.

ಇವರೊಂದಿಗೆ ಪ್ರಸಾದ್ ಲಾಡ್​, ಜಯಕುಮಾರ್ ಗೋರ್​, ಪ್ರಶಾಂತ್ ಠಾಕೂರ್​, ಅಥುಲ್​ ಸೇವ್, ಸುರೇಶ್ ಖಡೆ ಸಹ ಮಂತ್ರಿ ಸ್ಥಾನದ ರೇಸ್​​ನಲ್ಲಿದ್ದಾರೆ.