ಗುಡ್​ ನ್ಯೂಸ್​: ಮೂರು ವಾರಗಳ ಬಳಿಕ ದೆಹಲಿಯ ಕೋವಿಡ್​ ಪಾಸಿಟಿವ್​ ಸಂಖ್ಯೆಯಲ್ಲಿ ಇಳಿಕೆ

ದೆಹಲಿಯಲ್ಲಿ ಕೊರೊನಾ ಸಾವು-ನೋವು ಕಡಿಮೆಯಾಗುತ್ತಿದ್ದು, ಕೋವಿಡ್​ ಪಾಸಿಟಿವ್​ ದರ​ ಶೇ.21.67ಕ್ಕೆ ಇಳಿಕೆಯಾಗಿದೆ.

ನವದೆಹಲಿ: ಸತತ ಮೂರು ವಾರಗಳವರೆಗೆ ರಾಷ್ಟ್ರ ರಾಜಧಾನಿಯನ್ನು ಲಾಕ್​​ಡೌನ್​ ಮಾಡಿದ ಪರಿಣಾಮ ಏ.19ರ ಬಳಿಕ ದೆಹಲಿಯ ಕೋವಿಡ್​ ಪಾಸಿಟಿವಿಟಿ ರೇಟ್​ ಕಡಿಮೆಯಾಗಿದ್ದು, ಶೇ 35ರಿಂದ ಶೇ.21.67ಕ್ಕೆ ಇಳಿಕೆ ಕಂಡಿದೆ.

ಹೊಸ ಸೋಂಕಿತರ ಸಂಖ್ಯೆ ಕಡಿಮೆಯಾಗಿದ್ದು, ಕಳೆದ 24 ಗಂಟೆಗಳಲ್ಲಿ 13,336 ಕೇಸ್​​ಗಳು ಪತ್ತೆಯಾಗಿವೆ. ಮೃತರ ಸಂಖ್ಯೆ ಕೂಡ 300ರ ಗಡಿಯಿಂದ ಕೆಳಗಿಳಿದಿದ್ದು, ನಿನ್ನೆ 273 ಮಂದಿ ಸಾವನ್ನಪ್ಪಿರುವ ಬಗ್ಗೆ ವರದಿಯಾಗಿದೆ. ದೆಹಲಿಯಲ್ಲಿ ಮರಣ ಪ್ರಮಾಣ ಶೇಕಡಾ 1.46 ರಷ್ಟಿದೆ. ಈವರೆಗೆ ಒಟ್ಟು 13,23,567 ಸೋಂಕಿತರು ಪತ್ತೆಯಾಗಿದ್ದು, 19,344 ಮಂದಿ ವೈರಸ್​ಗೆ ಬಲಿಯಾಗಿದ್ದಾರೆ.

ಹೆಚ್ಚಿನ ಓದಿಗೆ: ದೆಹಲಿಯಲ್ಲಿ ಕುಸಿದ ಸೋಂಕು ಪ್ರಸರಣ ಪ್ರಮಾಣ: ಮತ್ತೆ ಒಂದು ವಾರ ಲಾಕ್‌ಡೌನ್‌ ವಿಸ್ತರಣೆ

ಕೊರೊನಾ ಸಾವು-ನೋವು ಕಡಿಮೆಯಾಗುತ್ತಿದ್ದರೂ ಕೂಡ ಮತ್ತಷ್ಟು ಪರಿಸ್ಥಿತಿ ನಿಯಂತ್ರಣಕ್ಕೆ ಸಲುವಾಗಿ ಹಾಗೂ ವೈದ್ಯಕೀಯ ಮೂಲಸೌಕರ್ಯವನ್ನು ಹೆಚ್ಚಿಸಲು ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ನಿನ್ನೆ ಮತ್ತೆ ಒಂದು ವಾರದ ಕಾಲ ಲಾಕ್​​ಡೌನ್​ ವಿಸ್ತರಿಸಿ ಆದೇಶ ಹೊರಡಿಸಿದ್ದಾರೆ. ದೆಹಲಿ ಸರ್ಕಾರ ಹೊರಡಿಸಿರುವ ಹೊಸ ಮಾರ್ಗಸೂಚಿಯಲ್ಲಿ ಮೆಟ್ರೋ ಸೇವೆ ಸ್ಥಗಿತಗೊಳಿಸಿದ್ದು, ಸಾರ್ವಜನಿಕ ಸ್ಥಳಗಳಲ್ಲಿ ವಿವಾಹ ಸಮಾರಂಭಗಳನ್ನು ನಿಷೇಧಿಸಲಾಗಿದೆ.