ನವದೆಹಲಿ:ಪಶ್ಚಿಮ ದೆಹಲಿಯ ಪಂಜಾಬಿ ಬಾಗ್ ಪ್ರದೇಶದ ರಿಂಗ್ ರೋಡ್ ಬಳಿಯ ಚರಂಡಿಯಲ್ಲಿ ಅನುಮಾನಾಸ್ಪದ ಸೂಟ್ಕೇಸ್ ಕಾಣಿಸಿಕೊಂಡಿದ್ದು, ಸೂಟ್‌ಕೇಸ್ನಲ್ಲಿ ಮಹಿಳೆಯ ಮೃತದೇಹ ಪತ್ತೆಯಾಗಿದೆ. ಚರಂಡಿಯು ವಾಸ್ತವವಾಗಿ ನಜಾಫ್‌ಗಢ ಚರಂಡಿಯ ಒಂದು ಭಾಗವಾಗಿದ್ದು, ಈ ಮೃತದೇಹ ತುಂಬಿದ್ದ ಸೂಟ್ಕೇಸ್ ಬುಧವಾರ ಸಂಜೆ ಪತ್ತೆಯಾಗಿದೆ.
ರಾಜೌರಿ ಗಾರ್ಡನ್‌ನಿಂದ ಪಂಜಾಬಿ ಬಾಗ್ ಕಡೆಗೆ ಹೋಗುವ ರಿಂಗ್ ರಸ್ತೆಯ ಬಳಿ ಸೂಟ್ಕೇಸ್ ಬಿದ್ದಿರುವ ಬಗ್ಗೆ ದಾರಿಹೋಕರೊಬ್ಬರು ಗಮನಿಸಿ ಪಿಸಿಆರ್‌ಗೆ ಮಾಹಿತಿ ನೀಡಿದ್ದನು. ನಂತರ ಪಂಜಾಬಿ ಬಾಗ್ ಠಾಣೆಯ ಪೊಲೀಸರು ಸ್ಥಳಕ್ಕೆ ಆಗಮಿಸಿ ಸೂಟ್‌ಕೇಸ್ನ್ನು ತೆರೆದಾಗ ಅದರಲ್ಲಿ ಮಹಿಳೆಯ ಶವ ಕಂಡು ಬೆಚ್ಚಿಬಿದ್ದ ಪೊಲೀಸರು ಅಪರಾಧ ವಿಭಾಗದ ತಂಡವನ್ನೂ ಕರೆಸಿ ತನಿಖೆ ಆರಂಭಿಸಿದ್ದಾರೆ.