ಪಂಜಾಬ್‌ ಚುನಾವಣೆ: ಗಮನ ಸೆಳೆದ ಸಯಾಮಿ ಅವಳಿಗಳ ಮತದಾನ- ವಿಡಿಯೋ

ಹಿಂದಿನ ವರ್ಷ ಡಿಸೆಂಬರ್​ನಲ್ಲಿ ಸರ್ಕಾರಿ ನೌಕರಿ ಪಡೆದಿದ್ದ ಸಯಾಮಿ ಅವಳಿಗಳಾದ ಸೋಹ್ನಾ ಮತ್ತು ಮೋಹ್ನಾ ಅಮೃತಸರದ ಮಾನಾವಾಲಾ ಮತಗಟ್ಟೆಗೆ ಆಗಮಿಸಿ, ಮತ ಚಲಾಯಿಸಿದು.

ಅಮೃತಸರ: ಪಂಜಾಬ್ ವಿಧಾನಸಭಾ ಚುನಾವಣೆಗೆ ಮತದಾನ ಆರಂಭವಾಗಿದೆ. ಕೆಲವೇ ತಿಂಗಳ ಹಿಂದೆ ರಾಜ್ಯ ಸರ್ಕಾರದಲ್ಲಿ ನೌಕರಿ ಪಡೆದಿದ್ದ ಸಯಾಮಿ ಅವಳಿಗಳಾದ ಸೋಹ್ನಾ ಮತ್ತು ಮೋಹ್ನಾ ಎಂಬ ಸಹೋದರರು ಮತಗಟ್ಟೆಗೆ ಆಗಮಿಸಿ, ತಮ್ಮ ಹಕ್ಕು ಚಲಾಯಿಸಿದ್ದು ವಿಶೇಷವಾಗಿ ಗಮನ ಸೆಳೆಯಿತು.

ಅಮೃತಸರದ ಮಾನಾವಾಲಾ ಮತಗಟ್ಟೆಗೆ ಆಗಮಿಸಿದ್ದ ಈ ಅವಳಿಗಳನ್ನು ಮತಗಟ್ಟೆಯ ಅಧಿಕಾರಿಗಳು ಸ್ವಾಗತಿಸಿದರು. ಈ ಸಂದರ್ಭದಲ್ಲಿ ಇಬ್ಬರು ಪ್ರತ್ಯೇಕ ಮತದಾರರಾಗಿರುವ ಕಾರಣದಿಂದ ಮತದಾನದಲ್ಲಿ ಗೌಪ್ಯತೆ ಕಾಪಾಡಿಕೊಳ್ಳಲು ವಿಶೇಷ ವ್ಯವಸ್ಥೆಯನ್ನು ಮಾಡಲಾಗಿತ್ತು.

'ಇವರಿಬ್ಬರ ಮತದಾನ ಬಹಳ ವಿಶಿಷ್ಟವಾಗಿದೆ. ಸರಿಯಾದ ವಿಡಿಯೋಗ್ರಫಿ ಮಾಡಲು ಚುನಾವಣಾ ಆಯೋಗವು ನಮಗೆ ಹೇಳಿದೆ. ಅವರು ವಿಶೇಷಚೇತನ ಮತದಾರರಿಗೆ ಆದರ್ಶ. ಅವರಿಬ್ಬರಲ್ಲಿ ಮತದಾನದ ಗೌಪ್ಯತೆಯನ್ನು ಕಾಪಾಡಲು, ಒಬ್ಬರು ಮತದಾನ ಮಾಡುವಾಗ ಇನ್ನೊಬ್ಬರು ನೋಡದಂತೆ ಕನ್ನಡಕವನ್ನು ನೀಡಲಾಗಿತ್ತು' ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ ಎಂದು ಎಎನ್​ಐ ವರದಿ ಮಾಡಿದೆ.

ಸೋಹ್ನಾ ಮತ್ತು ಮೋಹ್ನಾ ಪಂಜಾಬ್ ಸ್ಟೇಟ್ ಪವರ್ ಕಾರ್ಪೊರೇಷನ್ ಲಿಮಿಟೆಡ್​ನಲ್ಲಿ (PSPCL) ಉದ್ಯೋಗಿಯಾಗಿದ್ದಾರೆ. ಡಿಸೆಂಬರ್ 20, 2021ರಂದು ಕೆಲಸ ಪಡೆದ ಅವರು ವಿದ್ಯುತ್ ಉಪಕರಣಗಳನ್ನು ನೋಡಿಕೊಳ್ಳುತ್ತಾರೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಇದನ್ನೂ ಓದಿ:ವಡಾಪಾವ್ ತಿಂದು ಹಣ ನೀಡದೇ ಹೋದ ಕೇಂದ್ರ ಸಚಿವ: ಬಿಲ್‌ ಪಾವತಿಸಿದ ಬಿಜೆಪಿ ಕಾರ್ಯಕರ್ತ

ಸೋಹ್ನಾ ಮತ್ತು ಮೋಹ್ನಾ ಜೂನ್ 14, 2003ರಂದು ನವದೆಹಲಿಯಲ್ಲಿ ಜನಿಸಿದ್ದರು. ಇವರಿಗೆ ಯಕೃತ್ತು ಸೇರಿದಂತೆ ದೇಹದ ಹಲವು ಒಳಭಾಗಗಳು ಮತ್ತು ಕಾಲುಗಳು ಅಂಟಿಕೊಂಡಿವೆ. ಆದರೆ ತಲೆ, ಹೃದಯ, ಕೈಗಳು ಬೇರೆ ಬೇರೆ ಇವೆ. ದೆಹಲಿಯ ಆಲ್​ ಇಂಡಿಯಾ ಇನ್ಸ್​ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸ್​ಗೆ ಕರೆದೊಯ್ಯಲಾಯಿತಾದರೂ, ಶಸ್ತ್ರಚಿಕಿತ್ಸೆ ಮಾಡಿ ದೇಹಗಳನ್ನು ಬೇರ್ಪಡಿಸಿದರೆ, ಮತ್ತಷ್ಟು ಮಾರಣಾಂತಿಕ ತೊಡಕುಗಳು ಕಾಣಿಸಿಕೊಳ್ಳುವ ಸಾಧ್ಯತೆಯಿರುವ ಕಾರಣದಿಂದ ಶಸ್ತ್ರಚಿಕಿತ್ಸೆ ಮಾಡಿಲ್ಲ.