ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾ ಪೈಶಾಚಿಕ ಘಟನೆಗೆ ಸಾಕ್ಷಿಯಾದ ಪ್ರದೇಶ. ಉಗ್ರನ ದಾಳಿಗೆ 44 ಯೋಧರ ರಕ್ತ ಹರಿದ ನೆಲದಲ್ಲಿ ಇನ್ನೂ ಸೂತಕದ ಛಾಯೆ ಇದೆ. ದೇಶದೆಲ್ಲೆಡೆ ರಂಗೇರಿರುವ ಲೋಕಸಭೆ ಚುನಾವಣೆ ಇಲ್ಲಿ ಮಾತ್ರ ನೀರಸವಾಗಿದೆ.
ಅನಂತನಾಗ್ ಲೋಕಸಭೆ ಕ್ಷೇತ್ರದಲ್ಲಿ ಬರುವ ನಾಲ್ಕು ಜಿಲ್ಲೆಗಳಲ್ಲಿ ಪುಲ್ವಾಮಾ ಸಹ ಒಂದು. ಮೇ 6ರಂದು ಪುಲ್ವಾಮಾದಲ್ಲಿ ಚುನಾವಣೆ ನಡೆಯಲಿದೆ. ಆದರೆ ಈವರೆಗೆ ಯಾವ ಪಕ್ಷದವರೂ ಇಲ್ಲಿ ಪ್ರಚಾರ ಕೈಗೊಳ್ಳಲು ಧೈರ್ಯ ಮಾಡಿಲ್ಲ. ಗನ್ ನೆರಳಲ್ಲಿ ಪ್ರಚಾರದಂತಹ ಸಾಹಸ ಮಾಡುವುದು ರಾಜಕೀಯ ನಾಯಕರಿಗೆ ಸವಾಲಾಗಿದೆ.
ಇನ್ನು ಉಗ್ರರ ಹಲವು ದಾಳಿಗಳನ್ನು ಎದುರಿಸಿಯೂ ಕ್ಷೇತ್ರ ಬಿಟ್ಟು ತೆರಳಿ ಮಾಜಿ ಶಾಸಕ ನ್ಯಾಷನಲ್ ಕಾನ್ಫರೆನ್ಸ್ ಪಕ್ಷದ ಗುಲಾಂ ಮೊಹಿಯುದ್ದೀನ್ ಮಿರ್ ಇಲ್ಲಿನ ಪ್ರಮುಖ ರಾಜಕಾರಣಿಯಾಗಿದ್ದಾರೆ. ಎರಡು ವರ್ಷಗಳಲ್ಲಿ ತಮ್ಮ ಇಬ್ಬರು ಭದ್ರತಾ ಸಿಬ್ಬಂದಿಯನ್ನು ಕಳೆದುಕೊಂಡಿದ್ದಾರೆ. ಎಷ್ಟೆಲ್ಲಾ ದಾಳಿಗಳಾದರೂ ತಾನು ಇಲ್ಲಿಯೇ ಇದ್ದು, ಜನರ ಸಂಪರ್ಕದಲ್ಲಿರುವೆ ಎಂದು ಹೇಳಿಕೊಂಡಿದ್ದಾರೆ.