'ಇಂಡಿಯಾ' ಬದಲು 'ಭಾರತ್' ಎಂದು ಹೆಸರಿಡುವ ವಿಚಾರ: ಅರ್ಜಿ ವಿಚಾರಣೆ ಮುಂದೂಡಿದ ಸುಪ್ರೀಂ

ದೇಶಕ್ಕಿರುವ 'ಇಂಡಿಯಾ' ಹೆಸರನ್ನು 'ಭಾರತ್' ಎಂದು ಬದಲಾಯಿಸಲು ಕೋರಿ ದೆಹಲಿ ಮೂಲದ ವ್ಯಕ್ತಿಯೋರ್ವ ಸುಪ್ರೀಂಕೋರ್ಟ್​ಗೆ ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ ವಿಚಾರಣೆಯನ್ನು ಮುಂದೂಡಲಾಗಿದೆ.

ನವದೆಹಲಿ:'ಇಂಡಿಯಾ' ಬದಲಾಗಿ ದೇಶಕ್ಕೆ 'ಭಾರತ್' ಎಂದು ಮರುನಾಮಕರಣ ಮಾಡಬೇಕೆಂದು ಕೋರಿದ್ದ ಅರ್ಜಿ ವಿಚಾರಣೆಯನ್ನು ಸುಪ್ರೀಂಕೋರ್ಟ್​ ಮುಂದೂಡಿದೆ.

ಮುಖ್ಯ ನ್ಯಾಯಮೂರ್ತಿ ಎಸ್.ಎ.ಬೊಬ್ಡೆ ಇಂದು ಕೋರ್ಟ್​ಗೆ ಗೈರಾದ ಕಾರಣ, ಮುಂದಿನ ದಿನಾಂಕ ನಿಗದಿಪಡಿಸದೆ ವಿಚಾರಣೆಯನ್ನು ಮುಂದೂಡಲಾಗಿದೆ.

ದೇಶಕ್ಕಿರುವ 'ಇಂಡಿಯಾ' ಹೆಸರನ್ನು 'ಭಾರತ್' ಎಂದು ಬದಲಾಯಿಸಲು ಹಾಗೂ ಸಂವಿಧಾನವನ್ನು ತಿದ್ದುಪಡಿ ಮಾಡಲು ಕೇಂದ್ರಕ್ಕೆ ನಿರ್ದೇಶಿಸುವಂತೆ ಕೋರಿ ದೆಹಲಿ ಮೂಲದ ವ್ಯಕ್ತಿಯೋರ್ವ ಕೋರ್ಟ್​ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ (PIL) ಸಲ್ಲಿಸಿದ್ದರು.

ಬ್ರಿಟಿಷರು ಆಂಗ್ಲ ಭಾಷೆಯಲ್ಲಿಟ್ಟ 'ಇಂಡಿಯಾ' ಹೆಸರು ತೆಗೆದು ಹಾಕಿ ವಸಾಹತುಶಾಹಿ ಕಾಲದ ನೆನಪಿನಿಂದ ದೇಶದ ಪ್ರಜೆಗಳು ಹೊರಬಂದು, ಅವರಲ್ಲಿ ರಾಷ್ಟ್ರೀಯತೆಯ ಹೆಮ್ಮೆಯ ಭಾವವನ್ನು 'ಭಾರತ್​' ಎನ್ನುವ ಹೆಸರು ಮೂಡಿಸುತ್ತದೆ. ಸ್ವಾತಂತ್ರ್ಯ ಹೋರಾಟಗಾರರ ಕಠಿಣ ಪರಿಶ್ರಮವನ್ನು ಸಹ ಇದು ಸಮರ್ಥಿಸುತ್ತದೆ ಎಂದು ಅರ್ಜಿಯಲ್ಲಿ ಉಲ್ಲೇಖಿಸಲಾಗಿತ್ತು.

ಈ ಕುರಿತು ಮೇ 29 ರಂದು ವಿಚಾರಣೆ ಆರಂಭಿಸಿದ್ದ ನ್ಯಾಯಾಲಯವು, ಜೂ.2ಕ್ಕೆ ಮುಂದೂಡಿತ್ತು.