ಪಡಿತರ ಮೂಲಕ ದೇಶದ ಜನರ ಸಮಸ್ಯೆ ಬಗೆಹರಿಸಿ, ಭಾಷಣದಿಂದಲ್ಲ: ಸಿಬಲ್ ಒತ್ತಾಯ​

ದೇಶದ ಜನರ ಸಮಸ್ಯೆಗಳಿಗೆ ನಿಮ್ಮ ಭಾಷಣ ಪರಿಹಾರ ನೀಡುವುದಿಲ್ಲ ಎಂದು ಕೇಂದ್ರ ಸರ್ಕಾರದ ವಿರುದ್ಧ ಕಾಂಗ್ರೆಸ್​ ಮುಖಂಡ ಕಪಿಲ್​ ಸಿಬಲ್ ಕಿಡಿಕಾರಿದ್ದಾರೆ.

ನವದೆಹಲಿ: ಕೇಂದ್ರ ಸರ್ಕಾರದ ವಿರುದ್ಧ ಮತ್ತೆ ವಾಗ್ದಾಳಿ ನಡೆಸಿರುವ ಕಾಂಗ್ರೆಸ್​ ಮುಖಂಡ ಕಪಿಲ್​ ಸಿಬಲ್​, ದೇಶದ ಜನರು ಲಾಕ್​ಡೌನ್​ನಿಂದ ಸಮಸ್ಯೆ ಎದುರಿಸುತ್ತಿದ್ದಾರೆ. ಅವರ ಸಮಸ್ಯೆಗಳಿಗೆ ನಿಮ್ಮ ಭಾಷಣ ಪರಿಹಾರ ನೀಡುವುದಿಲ್ಲ ಎಂದು ಕಿಡಿಕಾರಿದ್ದಾರೆ.

ಈ ಕುರಿತು ಟ್ವೀಟ್​ ಮಾಡಿರುವ ಅವರು, "ನಮ್ಮ ಜನರು ಸರ್ಕಾರಕ್ಕೆ ಬೆಂಬಲ ನೀಡಲು ಸಿದ್ಧರಾಗಿದ್ದಾರೆ. ಹಾಗಾಗಿ ಸರ್ಕಾರ ಜನರಿಗಾಗಿ ಬೆಂಬಲ ನೀಡಬೇಕು. ಆದರೆ, ಅದು ಲಾಠಿ ಚಾರ್ಜ್​ ಅಥವಾ ನಿಮ್ಮ ಭಾಷಣದ ಮೂಲಕವಲ್ಲ, ಹೊರತಾಗಿ ರೇಷನ್​ ಮತ್ತು ಹಣದ ರೂಪದಲ್ಲಿ" ಎಂದಿದ್ದಾರೆ.

ಇದೇ ವೇಳೆ, "ಗುರುದ್ವಾರ, ಮಂದಿರ, ಎನ್​ಜಿಒ ಮುಖಾಂತರ ವಲಸಿಗರು ಹಾಗೂ ಬಡ ಜನರಿಗೆ ಸಹಾಯ ಮಾಡಿದ ಜನರಿಗೆ ಸೆಲ್ಯೂಟ್​ ಮಾಡುತ್ತೇನೆ" ಎಂದಿದ್ದಾರೆ.

ಈ ಹಿಂದೆ, ಕಾಂಗ್ರೆಸ್​ ನಾಯಕಿ ಸೋನಿಯಾ ಗಾಂಧಿ, ಪ್ರಧಾನಿ ಮೋದಿಗೆ ಪತ್ರ ಬರೆದಿದ್ದು, ದೇಶದ ಬಡ ಜನರಿಗೆ ಸೆಪ್ಟೆಂಬರ್​ 20ರವರೆಗೆ ರೇಷನ್​ ವಿತರಿಸುವಂತೆ ಕೋರಿದ್ದಾರೆ. ಅಷ್ಟೇ ಅಲ್ಲದೆ, ರಾಹುಲ್​ ಗಾಂಧಿ ಅವರು ಕೇಂದ್ರ ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದು, 'ತುರ್ತು ರೇಷನ್​ ಕಾರ್ಡ್​" ನೀಡುವಂತೆ ತಿಳಿಸಿದ್ದಾರೆ.