ರಾಜೀವ್​ ಗಾಂಧಿ ಭಯ ಹುಟ್ಟಿಸಲು ಜನಾದೇಶ ಬಳಸಲಿಲ್ಲ: ಸೊನಿಯಾ ಗಾಂಧಿ

1984ರಲ್ಲಿ ರಾಜೀವ್​ ಗಾಂಧಿ ಅವರಿಗೆ ಸಂಪೂರ್ಣ ಜನಾದೇಶ ಸಿಕ್ಕಿತ್ತು. ಆದರೆ ಅವರು ಭಯದ ವಾತಾವರಣ ಸೃಷ್ಟಿಸಲು ತಮ್ಮ ಅಧಿಕಾರವನ್ನು ಬಳಸಲಿಲ್ಲ ಎಂದು ಎಐಸಿಸಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರು ತಿಳಿಸಿದರು

ನವದೆಹಲಿ: 1984ರಲ್ಲಿ ರಾಜೀವ್​ ಗಾಂಧಿ ಅವರಿಗೆ ಸಂಪೂರ್ಣ ಜನಾದೇಶ ಸಿಕ್ಕಿತ್ತು. ಆದರೆ ಅವರು ಭಯದ ವಾತಾವರಣ ಸೃಷ್ಟಿಸಲು ತಮ್ಮ ಅಧಿಕಾರವನ್ನು ಬಳಸಲಿಲ್ಲ ಎಂದು ಎಐಸಿಸಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರು ತಿಳಿಸಿದರು.

ರಾಜೀವ್​ ಗಾಂಧಿ ಅವರ 75ನೇ ವರ್ಷದ ಜಯಂತಿ ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಅವರು, ರಾಜೀವ್​ ಗಾಂಧಿ ಅವರು ಜನರನ್ನು ಹೆದರಿಸಲು ಅಥವಾ ಸರ್ಕಾರಿ ಸಂಸ್ಥೆಗಳನ್ನು ನಾಶ ಮಾಡಲು, ಜನರ ಗಮನವನ್ನು ಬೇರೆಡೆ ಸೆಳೆಯಲು ತಮ್ಮ ಅಧಿಕಾರವನ್ನು ಬಳಸಲಿಲ್ಲ ಎಂದರು.
ರಾಜೀವ್​ ಅವರು ಮಾಡಿದ ಕೆಲಸಗಳು ಶ್ರಮ, ದೃಢ ಮನಸ್ಸಿನಿಂದ ಆಯಿತೇ ಹೊರತು ಘೋಷಣೆ ಕೂಗುವುದರಿಂದ ಆಗಿಲ್ಲ ಎಂದು ಹೇಳಿದರು.

ಕಾಂಗ್ರೆಸ್​ ಸದ್ಯ ತನ್ನ ಒಂದು ಸವಾಲನ್ನು ಎದುರಿಸುತ್ತಿರಬಹುದು, ಸಂಕಷ್ಟದ ಪರಿಸ್ಥಿತಿಯಲ್ಲಿರಬಹುದು ಆದರೆ, ತನ್ನ ಸಿದ್ಧಾಂತವನ್ನು ಎಂದಿಗೂ ಬಿಟ್ಟುಕೊಡುವುದಿಲ್ಲ ಎಂದರು.

ಮಾಜಿ ಕೇಂದ್ರ ಸಚಿವ ಪಿ. ಚಿದಂಬರಂ ಅವರ ಬಂಧನ ವಿಚಾರವನ್ನೇ ಮುಂದಿಟ್ಟುಕೊಂಡು ಸೋನಿಯಾ ಅವರು ಭಾಷಣ ಮಾಡಿದರು.