ಮುಂಬೈನಲ್ಲಿ ಡಬ್ಬವಾಲಾಗಳ ಸ್ಥಳೀಯ ಪ್ರಯಾಣಕ್ಕೆ ಗ್ರೀನ್​ಸಿಗ್ನಲ್​!

ಮುಂಬೈ ನಗರದಲ್ಲಿ ಡಬ್ಬವಾಲಾಗಳ ಸ್ಥಳೀಯ ಪ್ರಯಾಣಕ್ಕೆ ಸರ್ಕಾರ ಒಪ್ಪಿಗೆ ಸೂಚಿಸಿದೆ. ನಿನ್ನೆ ನಡೆದ ಸಂಪುಟ ಸಭೆಯಲ್ಲಿ ಡಬ್ಬವಾಲಾಗಳು ನಗರದಲ್ಲಿನ ಸ್ಥಳೀಯ ರೈಲಿನಲ್ಲಿ ಪ್ರಯಾಣಿಸಲು ಅವಕಾಶ ನೀಡಲಾಗಿದೆ.

ಮುಂಬೈ:ಕೊರೊನಾ ಲಾಕ್​ಡೌನ್​ನಿಂದಾಗಿ ಹಲವರ ಬದುಕು ಬೀದಿಗೆ ಬಂದಿತ್ತು. ಇದೀಗ ಕೋವಿಡ್​ ಭೀತಿ ನಿಧಾನವಾಗಿ ತಗ್ಗುತ್ತಿರುವುದರಿಂದಾಗಿ ಅನ್​ಲಾಕ್​ ಪ್ರಕ್ರಿಯೆಯೊಂದಿಗೆ ಜನಜೀವನ ನಿಧಾನಕ್ಕೆ ಸಹಜ ಸ್ಥಿತಿಯತ್ತ ಮರಳುತ್ತಿದೆ.

ಮುಂಬೈ ಮಹಾನಗರದಲ್ಲಿ ಸಾಕಷ್ಟು ಮಂದಿ ಡಬ್ಬವಾಲಾಗಳಿದ್ದಾರೆ. ಕಂಪನಿಗಳಲ್ಲಿ ಉದ್ಯೋಗಗಳಲ್ಲಿರುವವರಿಗೆ ಅವರವರ ಮನೆಗಳಿಂದ ಆಹಾರದ ಬುತ್ತಿಗಳನ್ನು ಕಚೇರಿಗೆ ಪೂರೈಸುವುದು ಅವರ ಕೆಲಸ. ಕೊರೊನಾ ಲಾಕ್​ಡೌನ್​ ಬಳಿಕ ಕಳೆದ ಮಾರ್ಚ್ 19 ರಿಂದ ಮುಂಬೈನಲ್ಲಿ ಈ ಡಬ್ಬವಾಲಾಗಳ ಪ್ರಯಾಣಕ್ಕೆ ಬ್ರೇಕ್​ ಹಾಕಲಾಗಿತ್ತು. ಹೀಗಾಗಿ ಇವರ ಬದುಕು ಭಾಗಶಃ ಬೀದಿಗೆ ಬಿದ್ದಿತ್ತು. ಹೀಗಾಗಿ ನಗರದಲ್ಲಿ ಡಬ್ಬವಾಲಾಗಳ ಸ್ಥಳೀಯ ಸೇವೆಯನ್ನು ಪ್ರಾರಂಭಿಸಲು ಮುಂಬೈ ಡಬ್ಬಾವಾಲಾ ಅಸೋಸಿಯೇಷನ್ ಸರ್ಕಾರವನ್ನು ​ಒತ್ತಾಯಿಸಿತ್ತು. ಇಲ್ಲದಿದ್ದರೆ ತಿಂಗಳಿಗೆ ಕನಿಷ್ಠ 3,000 ರೂ.ಗಳ ಸಬ್ಸಿಡಿ ನೀಡಬೇಕು ಎಂದು ಬೇಡಿಕೆ ಇಟ್ಟಿದ್ದರು.

ಸದ್ಯ ನಗರದಲ್ಲಿ ಡಬ್ಬವಾಲಾಗಳ ಸೇವೆಗೆ ಸರ್ಕಾರ ಒಪ್ಪಿಗೆ ಸೂಚಿಸಿದೆ. ನಿನ್ನೆ ನಡೆದ ಸಂಪುಟ ಸಭೆಯಲ್ಲಿ ಡಬ್ಬವಾಲಾಗಳು ನಗರದಲ್ಲಿನ ಸ್ಥಳೀಯ ರೈಲಿನಲ್ಲಿ ಪ್ರಯಾಣಿಸಲು ಅವಕಾಶ ನೀಡಲಾಗಿದೆ.