ಸ್ಪೇನ್​ನೊಡನೆ ವಿದೇಶಾಂಗ ಮಂತ್ರಿ ದೂರವಾಣಿ.. ಕೊರೊನಾ ವಿರುದ್ಧ ಹೋರಾಟದ ಸಹಕಾರಕ್ಕೆ ಒಪ್ಪಿಗೆ..

ವಿಶ್ವದಲ್ಲೇ ಕೊರೊನಾದಿಂದಾಗಿ ಘಾಸಿಗೊಂಡಿರುವ ದೇಶ ಸ್ಪೇನ್​ನೊಡನೆ ಕೇಂದ್ರ ವಿದೇಶಾಂಗ ಸಚಿವ ಆರ್‌ ಜೈಶಂಕರ್ ದೂರವಾಣಿ ಮಾತುಕತೆ ನಡೆಸಿ ಕೊರೊನಾ ವಿರುದ್ಧದ ಹೋರಾಟಕ್ಕೆ ಸಹಕಾರ ನೀಡಲು ಒಪ್ಪಿದ್ದಾರೆ.

ನವದೆಹಲಿ:ಸ್ಪೇನ್​ನಲ್ಲಿ ಕೊರೊನಾ ಹಾವಳಿ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಅಲ್ಲಿನ ವಿದೇಶಾಂಗ ಮಂತ್ರಿಯೊಡನೆ ಮಾತುಕತೆ ನಡೆಸಿದ್ದೇನೆ. ಕೊರೊನಾ ವಿರುದ್ಧದ ಜಾಗತಿಕ ಸಹಕಾರಕ್ಕಾಗಿ ಒಪ್ಪಿಕೊಂಡಿದ್ದೇವೆ ಎಂದು ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವ ಆರ್‌ ಜೈಶಂಕರ್ ತಿಳಿಸಿದ್ದಾರೆ.

ಈ ಕುರಿತು ತಮ್ಮ ಟ್ವಿಟರ್ ಖಾತೆಯಲ್ಲಿ ಬರೆದುಕೊಂಡಿರುವ ಅವರು ''ದೂರವಾಣಿಯಲ್ಲಿ ಸ್ಪೇನ್ ವಿದೇಶ ಮಂತ್ರಿ ಅರಂಚ ಗೊನ್ಜಾಲೆಜ್​ ಅವರೊಂದಿಗೆ ಮಾತನಾಡಿದ್ದೇನೆ. ಔಷಧ ಬೇಡಿಕೆಗೆ ಭಾರತ ಸಕಾರಾತ್ಮವಾಗಿ ಸ್ಪಂದಿಸಿದೆ. ಜಾಗತಿಕವಾಗಿ ಕೊರೊನಾ ವಿರುದ್ಧ ಹೋರಾಡಲು ಸಹಕಾರ ನೀಡಲು ಒಪ್ಪಿಕೊಂಡಿದ್ದೇವೆ'' ಎಂದಿದ್ದಾರೆ.

ಸ್ಪೇನ್​ ಕೊರೊನಾದಿಂದ ತತ್ತರಿಸಿದೆ. ಸುಮಾರು ಒಂದೂವರೆ ಲಕ್ಷ ಮಂದಿ ಕೊರೊನಾ ಪೀಡಿತರು ಇಲ್ಲಿದ್ದಾರೆ. ಸುಮಾರು 14 ಸಾವಿರ ಮಂದಿ ಸೋಂಕಿನಿಂದ ಮೃತಪಟ್ಟಿದ್ದಾರೆ.