ಹದಿಮೂರು ವರ್ಷಗಳ ಬಳಿಕ ಮೊದಲ ಬಾರಿಗೆ ತೈಲ ಬೇಡಿಕೆಯಲ್ಲಿ ಇಷ್ಟೊಂದು ಇಳಿಕೆ!

ಮಹಾಮಾರಿ ಕೊರೊನಾ ವೈರಸ್​ ಬಿಕ್ಕಟ್ಟಿನಿಂದಾಗಿ ಭಾರತದಲ್ಲಿ ತೈಲ ಬೆಲೆ ಬೇಡಿಕೆಯಲ್ಲಿ ಗಣನೀಯ ಪ್ರಮಾಣದ ಇಳಿಕೆ ಕಂಡು ಬಂದಿದೆ.

ನವದೆಹಲಿ:ದೇಶಾದ್ಯಂತ ಲಾಕ್​ಡೌನ್ ಹೇರಿಕೆ ಮಾಡಲಾಗಿರುವ ಕಾರಣ ವಾಹನ ಸವಾರರು ರಸ್ತೆಗಿಳಿಯುತ್ತಿಲ್ಲ. ಗೂಡ್ಸ್​ ವಾಹನಗಳ ಸಂಚಾರ ಕಡಿಮೆಯಾಗಿದೆ. ಹೀಗಾಗಿ ತೈಲ ಬೇಡಿಕೆಯಲ್ಲಿ ಭಾರಿ ಪ್ರಮಾಣದ ಇಳಿಕೆಯಾಗಿದೆ.

ಪೆಟ್ರೋಲ್​ ಬೇಡಿಕೆಯಲ್ಲಿ ಶೇ. 60.6ರಷ್ಟು ಹಾಗೂ ಡಿಸೇಲ್​ ಬೇಡಿಕೆ ಶೇ. 55.6ರಷ್ಟು ಕುಸಿತವಾಗಿದೆ. ಏಪ್ರಿಲ್​ ತಿಂಗಳಲ್ಲಿ 45.8ರಷ್ಟು ಬೇಡಿಕೆ ತಗ್ಗಿದೆ ಎಂದು ತಿಳಿದು ಬಂದಿದೆ. ಈ ಮೂಲಕ ಸುಮಾರು 9.93ಮಿಲಿಯನ್​ ಟನ್​ನಷ್ಟು ತೈಲ ಮಾರಾಟಗೊಂಡಿಲ್ಲ. 2007ರ ಬಳಿಕ ಇಷ್ಟೊಂದು ಕಡಿಮೆ ಮಟ್ಟದ ಬೇಡಿಕೆ ಇಳಿಕೆಯಾಗಿದೆ.

ಬೇರೆ ಬೇರೆ ರಾಜ್ಯಗಳಲ್ಲಿ ಶೇ.50ರಷ್ಟು ಮಾತ್ರ ತೈಲ ಮಾರಾಟ ಮಾಡಿದ್ದು, ಲಾಕ್​ಡೌನ್​ ಮುಂದೂಡಿಕೆಯಾಗಿರುವುದೇ ಇದಕ್ಕೆ ಮುಖ್ಯ ಕಾರಣ ಎಂದು ತೈಲ ಕಂಪನಿಗಳು ಮಾಹಿತಿ ನೀಡಿವೆ. ಪ್ರಪಂಚದಾದ್ಯಂತ ಕೊರೊನಾ ವೈರಸ್​ ಅಬ್ಬರ ಜೋರಾಗಿರುವ ಕಾರಣ ಕಚ್ಚಾ ತೈಲ ಬೇಡಿಕೆಯಲ್ಲೂ ಇಳಿಕೆ ಕಂಡು ಬಂದಿದ್ದು, ಖರೀದಿಗೆ ಜನರು ಹಿಂದೇಟು ಹಾಕುತ್ತಿದ್ದಾರೆ.