ಇಸ್ರೋದ 'ಜಿಸ್ಯಾಟ್​-30' ಉಪಗ್ರಹ ಯಶಸ್ವಿ ಉಡಾವಣೆ

ಬಾಹ್ಯಾಕಾಶ ಕ್ಷೇತ್ರದಲ್ಲಿನ ಸಾಧನೆ ಮೂಲಕ ಭಾರತದತ್ತ ಜಗತ್ತು ತಿರುಗಿ ನೋಡುವಂತೆ ಮಾಡುತ್ತಿರುವ ಇಸ್ರೋ ಇದೀಗ ಜಿಸ್ಯಾಟ್-30 ಉಪಗ್ರಹವನ್ನು ಉಡಾವಣೆ ಮಾಡಿದೆ. ದಕ್ಷಿಣ ಅಮೆರಿಕದ ಫ್ರೆಂಚ್ ಗಯಾನಾ ಬಾಹ್ಯಾಕಾಶ ಕೇಂದ್ರದಿಂದ ಉಪಗ್ರಹವನ್ನು ಯಶಸ್ವಿಯಾಗಿ ನಭಕ್ಕೆ ಕಳುಹಿಸಿದೆ.

ಬೆಂಗಳೂರು: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ(ಇಸ್ರೋ) ನಿರ್ಮಿತ ಸ್ವದೇಶಿ ತಂತ್ರಜ್ಞಾನದ ‘ಜಿಸ್ಯಾಟ್-30’ ಉಪಗ್ರಹ ಯಶಸ್ವಿಯಾಗಿ ಉಡಾವಣೆಯಾಯಿತು.

ದಕ್ಷಿಣ ಅಮೆರಿಕದ ಫ್ರೆಂಚ್ ಗಯಾನಾ ಬಾಹ್ಯಾಕಾಶ ಕೇಂದ್ರದಿಂದ ಭಾರತೀಯ ಕಾಲಮಾನದ ಪ್ರಕಾರ ರಾತ್ರಿ 2.35ಕ್ಕೆ ಎರೇನ್ ಲಾಂಚ್ ಕಾಂಪ್ಲೆಕ್ಸ್ ಉಡ್ಡಯನ ಕೇಂದ್ರದಿಂದ 'ಎರೇನ್ 5' ರಾಕೆಟ್ ಮೂಲಕ ಜಿಸ್ಯಾಟ್-30 ನಭಕ್ಕೆ ಹಾರಿದೆ ಎಂದು ಇಸ್ರೋ ಮಾಹಿತಿ ನೀಡಿದೆ. 'ಎರೇನ್ 5' ಉಡಾವಣ ವಾಹನವು ಇಂದು ಭಾರತದ ಜಿಟ್ಯಾಟ್-30 ಜೊತೆ ಫ್ರೆಂಚ್​ನ EUTELSAT KONNECT ಉಪಗ್ರಹವನ್ನು ಕೂಡ ಹೊತ್ತು ನಭಕ್ಕೆ ಜಿಗಿದಿದೆ.

3,357 ಕೆಜಿ ತೂಕದ ಜಿಸ್ಯಾಟ್-30 ಉಪಗ್ರಹವು ಮುಂದಿನ 15 ವರ್ಷಗಳ ಕಾಲ ದೂರಸಂಪರ್ಕ ಸೇವೆ ಒದಗಿಸಲಿದೆ. ಡಿಟಿಹೆಚ್, ಟೆಲಿಪೋರ್ಟ್ ಸೇವೆ, ಟೆಲಿವಿಷನ್ ಅಪ್ ಲಿಂಕಿಂಗ್ ಹಾಗೂ ಡೌನ್​ ಲಿಂಕಿಂಗ್ ಸೇರಿ ಹಲವು ಸಂವಹನ ಆಧಾರಿತ ಸೇವೆಗಳನ್ನು ಸಿ-ಬ್ಯಾಂಡ್ ಮೂಲಕ ಇದು ನೀಡಲಿದೆ. ‘ಜಿಸ್ಯಾಟ್-30’ ಉಪಗ್ರಹವು ಇಸ್ರೋದ ಈ ಹಿಂದಿನ ಇನ್​ಸ್ಯಾಟ್/ಜಿಸ್ಯಾಟ್​ನ ಮುಂದುವರಿದ ಸಿರೀಸ್.