ಶೌಚಾಲಯದಲ್ಲಿ ಮೊಬೈಲ್​ ಬಳಸ್ತೀರಾ? ಈ ಕಾಯಿಲೆ ಬರಬಹುದು ಹುಷಾರು..

ಅನೇಕ ಮಂದಿಗೆ ಗಂಟೆಗಟ್ಟಲೆ ಶೌಚಾಲಯದಲ್ಲಿ ಕುಳಿತುಕೊಂಡು ಮೊಬೈಲ್​ ವೀಕ್ಷಿಸುವ ಗೀಳಿದೆ. ಇದರಿಂದ ಅವರ ಜೀವನ ದುಸ್ಥಿತಿಗೆ ತಲುಪಬಹುದು ಎಂದು ಸಮೀಕ್ಷೆ ಎಚ್ಚರಿಸಿದೆ.

ನವದೆಹಲಿ:ಮೊಬೈಲ್ ಬಳಕೆದಾರರು ತಮ್ಮ ಸ್ಮಾರ್ಟ್‌ಫೋನ್ ಮೇಲೆ ಇತ್ತೀಚಿನ ದಿನಗಳಲ್ಲಿ ಅತಿ ಹೆಚ್ಚು ಅವಲಂಬಿತರಾಗಿದ್ದಾರೆ. ಸ್ಮಾರ್ಟ್‌ಪೋನ್​​ ಜನರ ಬದುಕಿನ ಅವಿಭಾಜ್ಯ ಅಂಗವೇ ಆಗಿಹೋಗಿದ್ದು ಅವುಗಳನ್ನು ಬಿಟ್ಟು ಬದುಕದ ಸ್ಥಿತಿಗೆ ಬಂದಿದ್ದಾರೆ. ಇದೇ ವಿಚಾರವಾಗಿ ಇಲ್ಲೊಂದು ಸಮೀಕ್ಷೆ ಎಚ್ಚರಿಕೆಯ ಕರೆಗಂಟೆ ಬಾರಿಸಿದೆ.

ಸಮೀಕ್ಷೆಯ ಪ್ರಕಾರ, ಮೊಬೈಲ್​ ಬಳಕೆದಾರರು ಹೆಚ್ಚಾಗಿ ಶೌಚಾಲಯದಲ್ಲಿರುವಾಗಲೂ ಮೊಬೈಲ್​​ ಬಳಸುತ್ತಿರುವ ವಿಚಾರ ಬೆಳಕಿಗೆ ಬಂದಿದೆ. ಈ ವೇಳೆ ತಾಸುಗಟ್ಟಲೆ ಕುಳಿತು ಅವರು ವಿಡಿಯೋ ನೋಡುವುದು, ಚಾಟಿಂಗ್ ಮಾಡುತ್ತಾರೆ. ಇದರಿಂದಾಗಿ ಅವರಿಗೆ ಮೂಲವ್ಯಾಧಿ (ಪೈಲ್ಸ್) ಬರಬಹುದು ಎಂದು ಎಚ್ಚರಿಸಿದೆ.

ಮೊಬೈಲ್​ ಬಳಸುತ್ತಾ ಶೌಚಾಲಯದಲ್ಲಿ ಗಂಟೆಗಳ ಕಾಲ ಕುಳಿತುಕೊಳ್ಳುವುದರಿಂದ ಗುದದ್ವಾರದಗುದನಾಳದ ಮೇಲೆ ಹೆಚ್ಚಿನ ಒತ್ತಡ ಉಂಟಾಗುತ್ತದೆ ಎಂದು ತಿಳಿದು ಬಂದಿದೆ.

ಈ ಬಗ್ಗೆ ಸಮೀಕ್ಷೆ ನಡೆಸಿರುವ ನೋಯ್ಡಾದ ಜೆಪಿ ಆಸ್ಪತ್ರೆ ವೈದ್ಯ ನವೀನ್​ ಕುಮಾರ್​, ಗಂಟೆಗಳ ಕಾಲ ಕುಳಿತುಕೊಂಡು ಮೊಬೈಲ್​ ಬಳಕೆ ಸರಿಯಲ್ಲ. ಇದು ಅನೇಕ ತೊಂದರೆಗಳಿಗೆ ಎಡೆಮಾಡಿ ಕೊಡುತ್ತದೆ. ನಿದ್ರಾಹೀನತೆಯೂ ಉಂಟಾಗುತ್ತದೆ ಎಂದು ಹೇಳಿದ್ದಾರೆ.