ಕೋಮು ಸೌಹಾರ್ದತೆಗೆ ಶಾಂತಿದೂತನ ಕೊಡುಗೆ ಅಪಾರ!

ಶಾಂತಿಯ ಮೂಲಕವೇ ಬ್ರಿಟಿಷರನ್ನು ಮಣಿಸಿ ದೇಶಕ್ಕೆ ಸ್ವಾತಂತ್ರ್ಯ ದೊರಕಿಸಿಕೊಟ್ಟ ಮಹಾತ್ಮ ಗಾಂಧೀಜಿ, ಕೋಮು ಸೌಹಾರ್ದತೆಗೆ ಹೆಚ್ಚಿನ ಆದ್ಯತೆ ನೀಡಿದ್ದರು. ವಿವಿಧತೆಯಲ್ಲಿ ಏಕತೆಯನ್ನು ರಾಷ್ಟ್ರಪಿತ ಪ್ರತಿಪಾದಿಸಿದ್ದರು.

ನವದೆಹಲಿ:ಗಾಂಧೀಜಿ ಶಾಂತಿಯ ಪ್ರತಿಪಾದಕ.. ವ್ಯಾಪಾರಕ್ಕೆ ಬಂದ ಬ್ರಿಟಿಷರು ಆಳ್ವಿಕೆ ಆರಂಭಿಸಿದಾಗ ಭಾರತ ಸೂಕ್ತ ನಾಯಕತ್ವದ ಕೊರತೆಯಿಂದ ಅಸಹಾಯಕವಾಗಿತ್ತು. ಆಳ್ವಿಕೆ ಆರಂಭಿಸಿದ ಕೆಂಪು ಮೂತಿಯವರನ್ನು ಶಾಂತಿಯ ನಡೆಯಿಂದಲೇ ಗೆದ್ದು ವಿಶ್ವಕ್ಕೇ ಶಾಂತಿ ಸಾರಿದ ಗಾಂಧಿ ಕೋಮು ಸೌಹಾರ್ದತೆಗೆ ಹೆಚ್ಚಿನ ಮನ್ನಣೆ ನೀಡಿದ್ದರು. ದೇಶದ ಒಟ್ಟಾರೆ ಅಭಿವೃದ್ಧಿಗೆ ಸಮನ್ವಯ ಬದುಕು ಅಗತ್ಯ ಎನ್ನುವ ಪಾಲಿಸಿ ಗಾಂಧೀಜಿಯವರದ್ದಾಗಿತ್ತು.

ಗಾಂಧೀಜಿ ಕ್ರೈಸ್ತ ಧರ್ಮವನ್ನು ನಿಖರವಾಗಿ ಓದಿ ತಿಳಿದುಕೊಂಡಿರಲಿಲ್ಲ. ಒಂದು ಬಾರಿ ಇಂಗ್ಲೆಂಡ್​ಗೆ ಪ್ರಯಾಣ ಬೆಳೆಸಿದ ಮೋಹನ್ ದಾಸ್ ಕರಮಚಂದ ಗಾಂಧಿ ಅವರಿಗೆ ಆ ವೇಳೆ ಬೈಬಲ್ ಓದುವ ಅವಕಾಶ ಒದಗಿ ಬಂದಿತ್ತು. ಕ್ರಿಶ್ಚಿಯನ್ನರ ಧರ್ಮ ಗ್ರಂಥ ಓದುತ್ತಾ ಓದುತ್ತಾ ಆ ಧರ್ಮದ ಬಗೆಗಿನ ಗಾಂಧೀಜಿ ನಿಲುವು ಸಂಪೂರ್ಣ ಬದಲಾಗಿತ್ತು. ಅದರಲ್ಲೂ ಎದುರಾಳಿ ಒಂದು ಏಟು ಹೊಡೆದರೆ ಮತ್ತೊಂದು ಕೆನ್ನೆಯನ್ನು ತೋರಿಸು ಎನ್ನುವ ಸಾಲು ಗಾಂಧೀಜಿಯವರನ್ನು ಆಕರ್ಷಿಸಿತ್ತು.

ಶಾಂತಿಯ ಪ್ರತಿಪಾದಕ ಗಾಂಧೀಜಿ

1948ರಲ್ಲಿ ಜನವರಿಯಲ್ಲಿ ಭಾರತದಲ್ಲಿರುವ ಅಲ್ಪಸಂಖ್ಯಾರಿಗೆ ಹಾಗೂ ಪಾಕ್​ನಲ್ಲಿರುವ ಹಿಂದೂಗಳು ಹಾಗೂ ಸಿಖ್ಖರಿಗೆ ಸೂಕ್ತ ಸ್ಥಾನಮಾನ ದೊರೆಯಬೇಕು ಎನ್ನುವ ಸದುದ್ದೇಶದಿಂದ ಉಪವಾಸ ಸತ್ಯಾಗ್ರಹ ಮಾಡಿದ್ದರು. ಭಾರತ ಸರ್ಕಾರ, ಪಾಕಿಸ್ತಾನಕ್ಕೆ ಸುಮಾರು 55 ಕೋಟಿ ಹಣವನ್ನು ನೀಡುವ ಉದ್ದೇಶಕ್ಕೆ ಗಾಂಧೀಜಿ ಸತ್ಯಾಗ್ರಹ ನಡೆಸುತ್ತಿದ್ದಾರೆ ಎಂದು ಬೇರೆಯದೇ ಅರ್ಥ ಕಲ್ಪಿಸಿ ಇತಿಹಾಸದಲ್ಲಿ ಗಾಂಧೀಜಿ ಹೆಸರಿಗೆ ಕಳಂಕ ತರುವ ಪ್ರಯತ್ನ ಮಾಡಿದ್ದು ಮಾತ್ರ ವಿಷಾದನೀಯ.

ಸರಳತೆಯ ಪ್ರತೀಕ ಬಾಪು

ಸ್ವಾತಂತ್ರ್ಯಪೂರ್ವದಲ್ಲಿ ದೇಶದಲ್ಲಿ ಧರ್ಮದ ಒಳ ಬಿಕ್ಕಟ್ಟನ್ನು ಸರಿಪಡಿಸುವ ಮಹತ್ತರ ಕಾರ್ಯಕ್ಕಿಳಿದು, ಭಾಗಶಃ ಯಶಸ್ಸು ಸಾಧಿಸಿದವರು ಗಾಂಧೀಜಿ. ಮಹಾತ್ಮನ ಹತ್ಯೆ ಬಳಿಕ ಕೊಂಚ ಶಾಂತವಾಗಿದ್ದ ದೇಶದ ಶಾಂತ ವಾತಾವರಣ 90ರ ದಶಕದಲ್ಲಿ ಬಾಬ್ರಿ ಮಸೀದಿ ಧ್ವಂಸದೊಂದಿಗೆ ಮತ್ತೆ ಕದಡಿತ್ತು. ಇದು ಹಂತ ಹಂತವಾಗಿ ಮುಂದುವರಿದು ಭಾರತದೆಲ್ಲೆಡೆ ಪಸರಿಸಿದೆ.

-ಸಂದೀಪ್​ ಪಾಂಡ್ಯ