ಇಂದೋರ್​ನಲ್ಲಿ ಐವರಿಗೆ ಕೊರೊನಾ ಸೋಂಕು.. ವಿದೇಶ ಪ್ರವಾಸ ಮಾಡದಿದ್ರೂ ಬಂದ ವೈರಸ್​

ಮಧ್ಯ ಪ್ರದೇಶದಲ್ಲಿ ಕೋವಿಡ್ ಸೋಂಕಿತರ ಸಂಖ್ಯೆ ಏರಿಕೆಯಾಗತೊಡಗಿದೆ. ಇಂದು ಮತ್ತೆ ಐವರಿಗೆ ಸೋಂಕು ತಗುಲಿರುವುದು ಪತ್ತೆಯಾಗಿದ್ದು, ಒಟ್ಟಾರೆ ರಾಜ್ಯದಲ್ಲಿ ಸೋಂಕಿತರ ಸಂಖ್ಯೆ 14 ಕ್ಕೆ ಏರಿದೆ.

ಭೋಪಾಲ್:ಇಂದೋರ್​ನ ವಿವಿಧ ಆಸ್ಪತ್ರೆಗಳಿಗೆ ದಾಖಲಿಸಲಾಗಿದ್ದ ಐವರಿಗೆ ಕೋವಿಡ್​-19 ಸೋಂಕು ತಗುಲಿರುವುದು ದೃಢಪಟ್ಟಿದೆ. ಮಧ್ಯಪ್ರದೇಶದಲ್ಲಿ ಕೋವಿಡ್​ ಸೋಂಕಿತರ ಸಂಖ್ಯೆ 14 ಕ್ಕೇರಿದಂತಾಗಿದೆ. ಸೋಂಕಿತರ ಪೈಕಿ​ ಯಾರೂ ವಿದೇಶ ಪ್ರವಾಸ ಮಾಡಿಲ್ಲ.

ಈ ಐವರಲ್ಲಿ ಓರ್ವ ಮಹಿಳೆ ನೆರೆಯ ಉಜ್ಜಯಿನಿಯವರಾಗಿದ್ದು, ಉಳಿದ ನಾಲ್ವರು ಇಂದೋರ್ ನಿವಾಸಿಗಳಾಗಿದ್ದಾರೆ ಎಂದು ಮುಖ್ಯ ವೈದ್ಯಕೀಯ ಮತ್ತು ಆರೋಗ್ಯ ಅಧಿಕಾರಿ ಡಾ. ಅನುಸೂಯಾ ಗವಳಿ ತಿಳಿಸಿದ್ದಾರೆ.

ಈ ಮುನ್ನ ಜಬಲ್ಪುರ್​ನಲ್ಲಿ 6 ಜನರಿಗೆ ಹಾಗೂ ಭೋಪಾಲ್, ಗ್ವಾಲಿಯರ್, ಶಿವಪುರಿಯ ತಲಾ ಓರ್ವರಿಗೆ ಕೋವಿಡ್​ ಸೋಂಕು ದೃಢಪಟ್ಟಿತ್ತು.