ಮೋದಿ 15 ಲಕ್ಷ ಹಾಕಲಿಲ್ಲ, ಆದ್ರೆ ನಾವು ಖಂಡಿತ ತಿಂಗಳಿಗೆ 6 ಸಾವಿರ ಹಾಕ್ತೀವಿ: ರಾಗಾ ಭರವಸೆ

ಮೋದಿ ಜನರ ಖಾತೆಗಳಿಗೆ ಹಣ ಹಾಕ್ತೀನಿ ಅಂತ ಹೇಳಿ, 30 ಸಾವಿರ ಕೋಟಿ ರೂ. ಅನಿಲ್ ಅಂಬಾನಿ ಜೇಬಿಗೆ ಹಾಕಿದ್ರು. ಆದರೆ ಕಾಂಗ್ರೆಸ್ ಕೊಟ್ಟ ಭರವಸೆ ಈಡೇರಿಸುತ್ತದೆ ಎಂದು ರಾಹುಲ್​ ಗಾಂಧಿ ವಾಗ್ದಾಳಿ ನಡೆಸಿದರು

ಗೊಲಘಾಟ್ (ಅಸ್ಸೋಂ)​: ಕಳೆದ ಚುನಾವಣೆಯಲ್ಲಿ ಎಲ್ಲರ ಬ್ಯಾಂಕ್​ ಖಾತೆಗಳಿಗೆ 15 ಲಕ್ಷ ಹಾಕ್ತೀನಿ ಅಂತ ಪ್ರಧಾನಿ ಮೋದಿ ಸುಳ್ಳು ಭರವಸೆ ನೀಡಿದ್ರು. ಆದರೆ, ನಾವು ಖಂಡಿತ ಕಡಿಮೆ ಆದಾಯ ಇರುವವರಿಗೆ 5 ವರ್ಷಕ್ಕೆ 3 ಲಕ್ಷ 60 ಸಾವಿರ ಹಣವನ್ನು ಅವರ ಬ್ಯಾಂಕ್​ ಖಾತೆಗಳಿಗೆ ಹಾಕ್ತೀವಿ ಎಂದು ಕಾಂಗ್ರೆಸ್​ ಅಧ್ಯಕ್ಷ ರಾಹುಲ್​ ಗಾಂಧಿ ಎಂದು ಘೋಷಿಸಿದರು.

ಅಸ್ಸೋಂನ ಗೊಲಘಾಟ್​ನಲ್ಲಿ ಚುನಾವಣೆ ಪ್ರಚಾರದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಪ್ರಧಾನಿ ಮೋದಿ ನೀಡಿದ್ದ ಭರವಸೆಗಳನ್ನು ಈಡೇರಿಸಲಿಲ್ಲ. ಸುಳ್ಳು ಹೇಳಿ ಜನರನ್ನು ನಂಬಿಸಿದರು. ಆದರೆ, ನಾವು ಕೇಂದ್ರದಲ್ಲಿ ಅಧಿಕಾರಕ್ಕೆ ಬಂದರೆ ಶೇ.20ರಷ್ಟು ಕಡಿಮೆ ಆದಾಯ ಇರುವ ಕುಟುಂಬಗಳಿಗೆ ನೀಡುತ್ತಿರುವ ಭರವಸೆ ಈಡೇರಿಸುತ್ತೇವೆ ಎಂದರು. ಇದೇ ವೇಳೆ ಪೌರತ್ವ ತಿದ್ದುಪಡಿ ಕಾಯ್ದೆ ಜಾರಿಯಾಗಲು ಬಿಡಲ್ಲ ಎಂದೂ ಹೇಳಿದರು.

ಚೌಕೀದಾರ್​ ಎಂದು ಕರೆದುಕೊಳ್ಳುವ ಮೋದಿ, ಜನರ ಖಾತೆಗಳಿಗೆ ಹಣ ಹಾಕ್ತೀನಿ ಅಂತ ಹೇಳಿ, 30 ಸಾವಿರ ಕೋಟಿ ರೂ. ಅನಿಲ್ ಅಂಬಾನಿ ಜೇಬಿಗೆ ಹಾಕಿದ್ದಾರೆ. ಅವರ ಬಾಯಿಯಲ್ಲಿ ಬರುವುದು ಸುಳ್ಳು ಮಾತ್ರ. ಎಷ್ಟು ಜನರ ಖಾತೆಗಳಿಗೆ ಅವರು ನೀಡಿದ್ದ ಭರವಸೆಯಂತೆ ಹಣ ಸಂದಾಯ ಮಾಡಿದ್ದಾರೆ ಲೆಕ್ಕ ಕೊಡಲಿ ಎಂದು ಸವಾಲು ಹಾಕಿದರು.

ಕಳೆದ ಐದು ವರ್ಷಗಳಲ್ಲಿ ಮೋದಿ ಉದ್ಯೋಗ ಸೃಷ್ಟಿ ಮಾಡುತ್ತೇನೆ ಎಂದು ಹೇಳಿ, ನಿಮ್ಮನ್ನು ಸರತಿ ಸಾಲಿನಲ್ಲಿ ನಿಲ್ಲುವಂತೆ ಮಾಡಿದರು. ಆದರೆ ನಮ್ಮ ಸರ್ಕಾರ ಅಧಿಕಾರ ಪಡೆದರೆ, ನಿಮ್ಮನ್ನು ಬೇರೆಯದೇ ಸಾಲಿನಲ್ಲಿ ನಿಲ್ಲಿಸುತ್ತೇವೆ. ಬಡವರ ಬ್ಯಾಂಕ್​ ಖಾತೆಗಳಿಗೆ ವರ್ಷಕ್ಕೆ 72 ಸಾವಿರ ರೂ. ಗಳನ್ನು ಸಂದಾಯ ಮಾಡುತ್ತೇವೆ ಎಂದು ಪುನರುಚ್ಚರಿಸಿದರು.