ಊರುಗಳಿಗೆ ಹೋಗುತ್ತಿರುವವರಿಗೆ ಸಾರಿಗೆ ಸೇವೆ ನೀಡಿ; ಪ್ರಧಾನಿಗೆ ಸೋನಿಯಾ, ಪ್ರಿಯಾಂಕ ಮನವಿ!

ಕೊರೊನಾ ವಿರುದ್ಧ ಹೋರಾಟ ನಡೆಸಲು ದೇಶಾದ್ಯಂತ 21 ದಿನಗಳ ಲಾಕ್​ಡೌನ್​ ಹೊರಡಿಸಲಾಗಿದ್ದು, ಇದರಿಂದ ತೊಂದರೆಗೊಳಗಾಗಿರುವ ಕೂಲಿ ಕಾರ್ಮಿಕರು ಮನೆಗಳತ್ತ ಮುಖ ಮಾಡಿದ್ದಾರೆ. ಆದರೆ ಇವರಿಗೆ ಸರಿಯಾದ ವಾಹನದ ವ್ಯವಸ್ಥೆ ಸಿಗುತ್ತಿಲ್ಲ.

ನವದೆಹಲಿ:ನೊವೆಲ್‌ ಕೊರೊನಾ ವೈರಸ್‌ ಅನ್ನು ತಡೆಯಲು ಸರ್ಕಾರ ದೇಶಾದ್ಯಂತ ಲಾಕ್‌ಡೌನ್‌ ಘೋಷಿಸಿ ಇಂದಿಗೆ ಮೂರು ದಿನ ಕಳೆದಿದೆ. ಜನ ಕೆಲಸ ಇಲ್ಲದ ಪರಿಣಾಮ ತಮ್ಮ ಸ್ವಂತ ಗೂಡು ಸೇರಿಕೊಳ್ಳಲು ನಾನಾ ರೀತಿಯ ಪ್ರಯತ್ನಗಳನ್ನು ಮಾಡುತ್ತಿದ್ದಾರೆ. ಈ ಸಂಬಂಧ ಎಐಸಿಸಿ ಹಂಗಾಮಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಪ್ರಧಾನಿ ನರೇಂದ್ರ ಮೋದಿಗೆ ಪತ್ರ ಬರೆದಿದ್ದು, ಯಾರೆಲ್ಲಾ ತಮ್ಮ ಊರುಗಳತ್ತ ತೆರಳುತ್ತಿದ್ದಾರೆ ಅವರ ನೆರವಿಗೆ ಬರುವಂತೆ ಮನವಿ ಮಾಡಿದ್ದಾರೆ.

ಅವರ ಪತ್ರದಲ್ಲಿ ಸಾರಾಂಶ ಹೀಗಿದೆ.

ದೇಶಾದ್ಯಂತ ಲಾಕ್‌ಡೌನ್‌ ಆಗಿರುವ ಪರಿಣಾಮ ಪ್ರಸ್ತುತ ಬಡ ಜನರು ತಮ್ಮ ಊರುಗಳಿಗೆ ನಡೆದುಕೊಂಡು ಹೋಗುತ್ತಿದ್ದಾರೆ. ಈ ವಿಚಾರ ಸಂಬಂಧ ನಾನು ನಿಮ್ಮ(ಪ್ರಧಾನಿ ನರೇಂದ್ರ ಮೋದಿ) ಗಮನ ಸೆಳೆಯಲು ಬಯಸುತ್ತೇನೆ.

ಸೋನಿಯಾ ಬರೆದ ಪತ್ರ

ಸಾರಿಗೆ ಸೌಲಭ್ಯ ಇಲ್ಲದ ಹಿನ್ನೆಲೆಯಲ್ಲಿ ಲಕ್ಷಾಂತರ ಮಂದಿ ವಲಸಿಗ ಕಾರ್ಮಿಕರು ನೂರಾರು ಮೈಲಿ ನಡೆದು ತಮ್ಮ ಊರುಗಳತ್ತ ಸಾಗುತ್ತಿದ್ದಾರೆ. ಕೆಲವರು ವಸತಿ ಗೃಹಗಳು ಅಥವಾ ಹೋಟೆಲ್‌ಗಳಲ್ಲಿ ಸಿಕ್ಕಿಹಾಕಿಕೊಂಡು ಹಣ ಕೊಡಲಾರದೇ ಅಲ್ಲಿಂದ ಹೊರ ಬರುತ್ತಿದ್ದಾರೆ. ಲಾಕ್‌ಡೌನ್‌ನಿಂದ ದೇಶದ ಹಲವು ಮಂದಿ ಕಠಿಣ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಯಾರೆಲ್ಲಾ ಪ್ರಯಾಣ ಮಾಡ್ತಿದ್ದಾರೋ ಅಂತವರಿಗೆ ಸೂಕ್ತ ನೆರವು ನೀಡಬೇಕು. ಇದು ನನ್ನ ಮನಃಪೂರ್ವಕವಾದ ಮನವಿಯಾಗಿದೆ ಎಂದು ಸೋನಿಯಾ ಗಾಂಧಿ ಪತ್ರದಲ್ಲಿ ತಿಳಿಸಿದ್ದಾರೆ. ಇದರ ಜೊತೆಗೆ ಎರಡು ಸಲಹೆಗಳನ್ನು ನೀಡಿದ್ದಾರೆ.

1. ತಮ್ಮ ಪಟ್ಟಣ ಅಥವಾ ಹಳ್ಳಿಗಳಿಗೆ ಹೋಗುತ್ತಿದ್ದಾರೋ ಅವರಿಗೆಲ್ಲಾ ಒಮ್ಮೆ ರಾಜ್ಯ ಸಾರಿಗೆ ಸೌಲಭ್ಯ ಒದಗಿಸಬೇಕು.

2. ಯಾರೆಲ್ಲಾ ಲಾಡ್ಜ್‌ ಮತ್ತು ವಸತಿ ಗೃಹದಲ್ಲಿದ್ದಾರೋ ಅಂತಹವರು ಸ್ವಲ್ಪ ಕಾಲ ಅಲ್ಲೇ ಉಳಿಯಲು ಜಿಲ್ಲಾಧಿಕಾರಿಗಳು ಅಗತ್ಯ ನೆರವು ನೀಡಬೇಕು ಎಂದು ಮನವಿ ಮಾಡಿದ್ದಾರೆ.

ನಾಳಿನ ಒಳ್ಳೆಯ ದಿನಕ್ಕಾಗಿ ದೇಶದ ಜನತೆ ಬಹುದೊಡ್ಡ ತ್ಯಾಗವನ್ನು ಮಾಡುತ್ತಿದ್ದಾರೆ. ಹೀಗಾಗಿ ಲಾಕ್‌ಡೌನ್‌ನಿಂದ ಯಾರ ಮನಸಿಗೂ ಗಾಸಿಯಾದಂತೆ ಸಾಧ್ಯವಾದಷ್ಟು ನೆರವು ನೀಡಬೇಡಬೇಕಿದೆ ಎಂದು ಪತ್ರದ ಮೂಲಕ ಮನವಿ ಮಾಡಿದ್ದಾರೆ.

ಇದೇ ವೇಳೆ, ಕಾಂಗ್ರೆಸ್​ನ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ವಾದ್ರಾ ಕೂಡ ವಿಡಿಯೋ ಮೂಲಕ ಕೇಂದ್ರ ಸರ್ಕಾರದ ಬಳಿ ಮನವಿ ಮಾಡಿಕೊಂಡಿದ್ದು, ಕೊರೊನಾ ವೈರಸ್​ನಿಂದಾಗಿ ಸಾವಿರಾರು ಜನರು ಕಾಲ್ನಡಿಗೆಯಲ್ಲೇ ತಮ್ಮ ಊರುಗಳತ್ತ ತೆರಳುತ್ತಿದ್ದು, ಅವರಿಗೆ ಕೇಂದ್ರ ಸಹಾಯ ಮಾಡಬೇಕಾಗಿದೆ ಎಂದಿದ್ದಾರೆ.