ಶೆ. 95ರಷ್ಟು ಯಶಸ್ಸು ಸಾಧಿಸಿದ್ದೇವೆ: ಇಸ್ರೋ ಮೊದಲ ಪ್ರತಿಕ್ರಿಯೆ

ಲ್ಯಾಂಡರ್​ನೊಂದಿಗೆ ಸಂಪರ್ಕ ಕಳೆದುಕೊಂಡ ಹೊರತಾಗಿಯೂ ಚಂದ್ರ ವಿಜ್ಞಾನಕ್ಕೆ ನಮ್ಮ ಕೊಡುಗೆ ನೀಡುತ್ತೇವೆ ಎಂದು ಇಸ್ರೋ ಪ್ರಕಟಣೆಯಲ್ಲಿ ತಿಳಿಸಿದೆ.

ಬೆಂಗಳೂರು:ಯಾರೂ ಅನ್ವೇಷಿಸದ ಚಂದ್ರನ ದಕ್ಷಿಣ ಧ್ರುವವನ್ನ ಅನ್ವೇಷಿಸಲು ಹೊರಟ ಚಂದ್ರಯಾನ-2 ಒಂದು ಸಂಕೀರ್ಣವಾದ ಪ್ರಯತ್ನವಾಗಿದ್ದು, ಇದರಲ್ಲಿ ನಾವು ಶೇ. 95ರಷ್ಟು ಯಶಸ್ಸು ಸಾಧಿಸಿದ್ದೇವೆ ಎಂದು ಇಸ್ರೋ ಪ್ರಕಟಣೆಯಲ್ಲಿ ತಿಳಿಸಿದೆ.

ಚಂದ್ರಯಾನ-2 ಒಂದು ಸಂಕೀರ್ಣವಾದ ಮಿಷನ್ ಆಗಿದ್ದು, ಈ ಹಿಂದಿನ ಇಸ್ರೋ ಮಿಷನ್​ಗಳಿಗೆ ಹೋಲಿಕೆ ಮಾಡಿದರೆ ಆರ್ಬಿಟರ್, ಲ್ಯಾಂಡರ್ ಮತ್ತು ರೋವರ್​ಗಳನ್ನ ಹೊತ್ತು ಸಾಗಿದ ಚಂದ್ರಯಾನ-2 ಅಧಿಕ ತಾಂತ್ರಿಕ ಕ್ಲಿಷ್ಟತೆಯನ್ನ ಹೊಂದಿತ್ತು. ಜುಲೈ 22ರಂದು ಚಂದ್ರಯಾನ-2 ಉಡಾವಣೆ ಆದಾಗಿನಿಂದ ಭಾರತ ಮಾತ್ರವಲ್ಲದೆ ಇಡೀ ವಿಶ್ವವೇ ಹಲವು ನಿರೀಕ್ಷೆಗಳಿಂದ ಎದುರು ನೋಡುತ್ತಿತ್ತು.

ಇದು ಚಂದ್ರನ ಒಂದು ಪ್ರದೇಶವನ್ನು ಮಾತ್ರವಲ್ಲದೆ, ಚಂದ್ರನ ಮೇಲ್ಮೈ ಮತ್ತು ಚಂದ್ರನ ಉಪ-ಮೇಲ್ಮೈ ಸೇರಿದಂತೆ ಒಂದೇ ಮಿಷನ್‌ನಲ್ಲಿ ಎಲ್ಲವನ್ನ ಅಧ್ಯಯನ ಮಾಡುವ ಗುರಿ ಹೊಂದಿತ್ತು. ಈಗಾಗಲೇ ಆರ್ಬಿಟರ್​​​ಅನ್ನು ಚಂದ್ರನ ಸುತ್ತ ಅದರ ಉದ್ದೇಶಿತ ಕಕ್ಷೆಯಲ್ಲಿ ಇರಿಸಲಾಗಿದೆ. ಅದರಲ್ಲಿನ ಎಂಟು ಅತ್ಯಾಧುನಿಕ ವೈಜ್ಞಾನಿಕ ಸಾಧನಗಳನ್ನು ಬಳಸಿ ಧ್ರುವ ಪ್ರದೇಶಗಳಲ್ಲಿನ ಖನಿಜಗಳು, ನೀರಿನ ಅಣುಗಳು, ಚಂದ್ರನ ವಿಕಾಸ ಮತ್ತು ನಕ್ಷೆಯ ಬಗ್ಗೆ ಅಧ್ಯಯನ ಮಾಡಲು ಸಹಕಾರಿಯಾಗಲಿದೆ.

ಈ ಆರ್ಬಿಟರ್​​ನಲ್ಲಿ ಇಲ್ಲಿಯವರೆಗೆ ಯಾವುದೇ ಚಂದ್ರಯಾನದಲ್ಲಿ ಬಳಸದ ಅತ್ಯಾದುನಿಕ ಕ್ಯಾಮರಾ(0.03m) ಅಳವಡಿಸಲಾಗಿದ್ದು, ​ಜಾಗತಿಕ ವಿಜ್ಞಾನ ಸಮುದಾಯಕ್ಕೆ ಉತ್ಕೃಷ್ಟ ಛಾಯಾಚಿತ್ರಗಳನ್ನ ಒದಗಿಸಲಿದೆ. ಉದ್ದೇಶಿತ ಒಂದು ವರ್ಷದ ಬದಲು 7 ವರ್ಷ ಕಾರ್ಯಾಚರಣೆ ನಡೆಸಲಿದೆ.

ಇನ್ನು ವಿಕ್ರಮ್ ಲ್ಯಾಂಡರ್​ ತನ್ನ ಕಕ್ಷೆಯಿಂದ 35 ಕಿಲೋ ಮೀಟರ್​ನಿಂದ ಚಂದ್ರನ ಮೇಲ್ಮೈಯಿಂದ ಕೇವಲ 2 ಕಿಲೋ ಮೀಟರ್​​ವರೆಗೆ ತಲುಪುವವರೆಗೂ ಮೂಲದ ಪಥದಲ್ಲೇ ಸಾಗಿದೆ. ಈ ವೇಳೆ ಲ್ಯಾಂಡರ್‌ನ ಎಲ್ಲಾ ವ್ಯವಸ್ಥೆಗಳು ಅತ್ಯುತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದವು.

ಯಶಸ್ಸಿನ ಮಾನದಂಡಗಳನ್ನು ಮಿಷನ್‌ನ ಪ್ರತಿಯೊಂದು ಹಂತಕ್ಕೂ ವ್ಯಾಖ್ಯಾನಿಸಲಾಗಿದೆ. ಈ ಯತ್ನದಲ್ಲಿ ಇಲ್ಲಿಯವರೆಗೆ ಶೇ. 90ರಿಂದ 95ರಷ್ಟು ಯಶಸ್ಸು ಸಾಧಿಸಲಾಗಿದೆ. ಲ್ಯಾಂಡರ್​​​ನೊಂದಿಗೆ ಸಂಪರ್ಕ ಕಳೆದುಕೊಂಡ ಹೊರತಾಗಿಯೂ ಚಂದ್ರ ವಿಜ್ಞಾನಕ್ಕೆ ನಮ್ಮ ಕೊಡುಗೆ ನೀಡುತ್ತೇವೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.