ಸಾರ್ಕ್​ ರಾಷ್ಟ್ರಗಳ ಕೊರೊನಾ ನಿಧಿಗೆ ಭೂತಾನ್​, ನೇಪಾಳ ದೇಣಿಗೆ... ಪ್ರಧಾನಿ ಮೋದಿ ಅಭಿನಂದನೆ

ಕೊರೊನಾ ವಿರುದ್ಧ ಹೋರಾಡಲು ಒಂದಾಗುವಂತೆ ಪ್ರಧಾನಿ ನರೇಂದ್ರ ಮೋದಿ ಈಗಾಗಲೇ ಸಾರ್ಕ್​ ರಾಷ್ಟ್ರಗಳಿಗೆ ಕರೆ ನೀಡಿದ್ದು, ನಮೋ ಮಾತಿಗೆ ಜೈಕಾರ ಹಾಕಿರುವ ಕೆಲವೊಂದು ರಾಷ್ಟ್ರಗಳು ದೇಣಿಗೆ ನೀಡುತ್ತಿವೆ.

ನವದೆಹಲಿ:ಮಹಾಮಾರಿ ಕೊರೊನಾ ವೈರಸ್​ ವಿರುದ್ಧ ಹೋರಾಟಕ್ಕಾಗಿ ಸಾರ್ಕ್​ ರಾಷ್ಟ್ರಗಳು ಒಟ್ಟಾಗಿ ಶ್ರಮಿಸಬೇಕು ಎಂದು ಈ ಹಿಂದೆ ಪ್ರಧಾನಿ ನರೇಂದ್ರ ಮೋದಿ ಘೋಷಣೆ ಮಾಡಿದ್ದರು. ಇದಾದ ಬಳಿಕ ಸಾರ್ಕ್​ ದೇಶಗಳ ನಾಯಕರೊಂದಿಗೆ ಅವರು ವಿಡಿಯೋ ಕಾನ್ಫರೆನ್ಸ್​ ಮೂಲಕ ಸಂವಾದ ಕೂಡ ನಡೆಸಿದ್ದರು.

ಕೊರೊನಾ ವೈರಸ್​ ಸೋಂಕು ನಿಯಂತ್ರಣ ನಿಧಿಗೆ ಈಗಾಗಲೇ ಭಾರತ 1 ಕೋಟಿ ರೂ ದೇಣಿಗೆ ನೀಡಿದ್ದು, ಇದರ ಬೆನ್ನಲ್ಲೇ ಭೂತಾನ್​ ಪ್ರಧಾನಿ ಡಾ. ಲೋಟೆ ತ್ಯೆರಿಂಗ್​ 75,62,260 ರೂ. ಹಾಗೂ ನೇಪಾಳ ಪ್ರಧಾನಿ ಕೆಪಿ ಶರ್ಮಾ 10 ಕೋಟಿ ರೂ ದೇಣಿಗೆ ನೀಡಿ ಘೋಷಣೆ ಮಾಡಿದ್ದಾರೆ.

ಕೊರೊನಾ ವಿರುದ್ಧ ಹೋರಾಡಲು ಈ ಹಣ ಬಳಕೆಯಾಗಲಿದ್ದು, ಇದೀಗ ಪ್ರಧಾನಿ ನರೇಂದ್ರ ಮೋದಿ ಎರಡು ದೇಶದ ಪ್ರಧಾನಿಗಳಿಗೆ ಅಭಿನಂದನೆ ಸಲ್ಲಿಕೆ ಮಾಡಿದ್ದು, ಮಹಾಮಾರಿ ವಿರುದ್ಧ ಹೋರಾಡಲು ನೀವೂ ನೀಡಿರುವ ಸಹಾಯ ನಿಜಕ್ಕೂ ಶ್ಲಾಘನಿಯ ಎಂದಿದ್ದಾರೆ.

ಕಳೆದ ಕೆಲ ದಿನಗಳ ಹಿಂದೆ ನಡೆದಿದ್ದ ಈ ವಿಡಿಯೋ ಕಾನ್ಪರೆನ್ಸ್​ನಲ್ಲಿ ಮಾಲ್ಡಿವ್​ ಅಧ್ಯಕ್ಷ ಇಬ್ರಾಹಿಂ ಸೊಲಿಹ್​, ಶ್ರೀಲಂಕಾ ಪ್ರಧಾನಿ ಗೊಟಬಯ ರಾಜಪಕ್ಷೆ, ಭೂತಾನ್​ ಪ್ರಧಾನಿ ಲೋಟೆ, ಬಾಂಗ್ಲಾ ಪ್ರಧಾನಿ ಶೇಖ್​ ಹಸೀನಾ, ನೇಪಾಳ ಪ್ರಧಾನಿ ಕೆ.ಪಿ ಶರ್ಮಾ ಒಲಿ, ಆಫ್ಘಾನ್​ ಹಾಗೂ ಪಾಕ್​ ದೇಶದ ಪ್ರತಿನಿಧಿಗಳು ಸಹ ಭಾಗಿಯಾಗಿದ್ದರು.