ಮೊಬೈಲ್ ಟಾರ್ಚ್​, ಮೇಣದಬತ್ತಿ ಬೆಳಕಿನಲ್ಲಿ ಗರ್ಭಿಣಿಗೆ ಹೆರಿಗೆ; ಸರ್ಕಾರಿ ಆಸ್ಪತ್ರೆಯ ದುಸ್ಥಿತಿ!

ಸರ್ಕಾರಿ ಆಸ್ಪತ್ರೆಯಲ್ಲಿ ಮೇಲಿಂದ ಮೇಲೆ ವಿದ್ಯುತ್​ ಕಡಿತಗೊಳ್ಳುತ್ತಿರುವ ಕಾರಣ, ಮೊಬೈಲ್ ಟಾರ್ಚ್​, ಮೇಣದಬತ್ತಿ ಬೆಳಕಿನಲ್ಲೇ ಗರ್ಭಿಣಿಯೊಬ್ಬರಿಗೆ ಹೆರಿಗೆ ಮಾಡಿಸಲಾಗಿದೆ.

ಅನಕಾಪಲ್ಲಿ(ಆಂಧ್ರಪ್ರದೇಶ): ಸರ್ಕಾರಿ ಆಸ್ಪತ್ರೆಗಳಂದ್ರೆ ಬಡವರ ಪಾಲಿಗೆ ಸಂಜೀವಿನಿ ಅಂತಾರೆ. ಆದ್ರೆ, ಆಂಧ್ರಪ್ರದೇಶದ ನರಸೀಪಟ್ನಂನಲ್ಲಿ ಹೊಸದಾಗಿ ನಿರ್ಮಾಣಗೊಂಡಿರುವ ಅನಕಾಪಲ್ಲಿ ಜಿಲ್ಲೆಯ ಸರ್ಕಾರಿ ಆಸ್ಪತ್ರೆ ಅವ್ಯವಸ್ಥೆಯ ಆಗರವಾಗಿದೆ. ಆಸ್ಪತ್ರೆಯ ಅವ್ಯವಸ್ಥೆಯಿಂದ ಬೇಸತ್ತು ರೋಗಿಗಳು ಕಣ್ಣೀರು ಹಾಕುತ್ತಿದ್ದಾರೆ.

ಏಪ್ರಿಲ್​ 6ರಂದು ಸುಮಾರು ಎಂಟು ಗಂಟೆಗಳ ಕಾಲ ವಿದ್ಯುತ್ ಕಡಿತಗೊಂಡ ಕಾರಣ, ಗರ್ಭಿಣಿಯೋರ್ವಳಿಗೆ ಮೇಣದ ಬತ್ತಿ ಮತ್ತು ಮೊಬೈಲ್​ ಟಾರ್ಚ್​ ಬೆಳಕಿನ ಸಹಾಯದಿಂದ ಹೆರಿಗೆ ಮಾಡಿಸಲಾಗಿದೆ. ಪ್ರತಿದಿನ ವಿದ್ಯುತ್​ ಕಡಿತದಂತಹ ಸಮಸ್ಯೆ ಉಂಟಾಗುತ್ತಿರುವ ಕಾರಣ ಇಲ್ಲಿನ ರೋಗಿಗಳು ಇನ್ನಿಲ್ಲದ ಸಮಸ್ಯೆ ಎದುರಿಸುವಂತಾಗಿದೆ. ಜಿಲ್ಲೆಯಲ್ಲೇ ಅತಿದೊಡ್ಡ ಆಸ್ಪತ್ರೆಯಾಗಿದ್ದರೂ ಕೂಡ, ಮೂಲಭೂತ ಸೌಲಭ್ಯಗಳಿಲ್ಲ. ಜನರೇಟರ್​ ಹಾಳಾಗಿದ್ದು, ಸೊಳ್ಳೆಗಳ ಕಾಟ ಹೆಚ್ಚಾಗಿದೆ.

ರಾತ್ರಿ ವೇಳೆ ವಿದ್ಯುತ್​ ಕೈ ಕೊಡುತ್ತಿರುವ ಕಾರಣ ರೋಗಿಗಳ ಸಂಬಂಧಿಕರು ಬ್ಯಾಟರಿ ಚಾಲಿತ ಟೇಬಲ್ ಫ್ಯಾನ್ ತೆಗೆದುಕೊಂಡು ಬರುತ್ತಿದ್ದಾರೆ. ಕೆಲ ದಿನಗಳಿಂದ ಕುಡಿಯುವ ನೀರಿನ ಘಟಕವೂ ಸಹ ಕಾರ್ಯನಿರ್ವಹಿಸುತ್ತಿಲ್ಲ. ಹೀಗಾಗಿ, ಮನೆಯಿಂದಲೇ ನೀರಿನ ಬಾಟಲ್​ ತೆಗೆದುಕೊಂಡು ಬರುವಂತಾಗಿದೆ.

ಈ ವಿಚಾರವಾಗಿ ಮಾತನಾಡಿರುವ ಆಸ್ಪತ್ರೆ ಪ್ರಭಾರಿ ಡಾ.ಡೇವಿಡ್​ ವಸಂತ್ ಕುಮಾರ್​, ಹೆರಿಗೆ ವಾರ್ಡ್​ನಲ್ಲಿ ವಿದ್ಯುತ್​ ಇಲ್ಲದ ಕಾರಣ ಟಾರ್ಚ್​ ಲೈಟ್​​, ಸೆಲ್​​ಫೋನ್​​ ಬಳಕೆ ಮಾಡಿ ಹೆರಿಗೆ ಮಾಡಿಸಿಕೊಳ್ಳಲಾಗ್ತಿದೆ. ಮುಂದಿನ ಕೆಲ ದಿನಗಳಲ್ಲಿ ಕುಡಿಯುವ ನೀರಿನ ಘಟಕ ಪುನಾರಂಭ ಮಾಡಲಾಗುವುದು ಎಂದರು.