- उत्तराखंड मा फिर बढ़ी कोरोना की रफ्तार
उत्तराखंड मां धीरे-धीरे कोरोना की रफ्तार एक बार फिर से बढ़ण लग गी. जनवरी का पैला हप्ता मा कोरोना संक्रमित मरीजुं की संख्या मा कमी ऐ छै, मगर अब कुछ दिनू बटी या संख्या लगातार बढ़णी छन, ब्याली कोरोना का 500 नया मामला संमणि ऐनी, जैका बाद प्रदेश मां कोरोना संक्रमितुं की संख्यां 1,00,911 ह्ववे गी, जबकि यां से मन्न वालौ की संख्या 1719 च. प्रदेश मा कोरोना संक्रमित मरीजुं की रिकवरी रेट 95.88 % च.
- मंत्री गणेश जोशी भी कोरोना संक्रमित
तीरथ सरकार मा कैबिनेट मंत्री गणेश जोशी भी कोरोना संक्रमित ह्वे गिन. शुक्रवार सुबेर ऊन अपणु कोरोना टेस्ट करै छौ, ज्या मा वु पॉजिटिव ऐन, जैका बाद ऊन अपणा तमाम कार्यक्रमू थै स्थगित करेली. कोरोना संक्रमित होंणा बाद गणेश जोशी न अफु थै होम आइसोलेट करेली
- चमोली आपदा मा अब भी कई लोग लापता
उत्तराखंड का चमोली जिला मा ऋषिगंगा आपदा मा लापता लोखूं की तलाश अब भी जारी च. आपदा का करीब डेढ़ मैना बाद भी तपोवन सुरंग मा रेस्क्यू ऑपरेशन जारी च. आपदा का बाद से अब तक यख 75 शव बरामद ह्वे गिन, ई आपदा मा अभी भी 130 लोग लापता छन.
- पूर्व सीएम त्रिवेंद्र का करीबी दायित्वधारी पैदल
तीरथ सरकार न पूर्व मुख्यमंत्री त्रिवेंद्र सिंह रावत का कार्यकाल मा बंण्या दायित्वधार्यूं बटी जिम्मेदारी वापस लियेली. आज या कुं थै शासन स्तर बटी नोटिफिकेशन जारी ह्वे गी, जानकारी का अनुसार सौ से अधिक नेताऊं से दायित्व वापस लिये गिन.
- कांग्रेस न करी चुनाव संचालन समिति कु गठन
सल्ट विधानसभा उपचुनाव मा जीत थै लेकी कांग्रेस पूरूं जोर लगौणी च. ई कड़ी मा आज कांग्रेस न आज पूर्व विधानसभा अध्यक्ष गोविंद सिंह कुंजवाल की अध्यक्षता मा 19 सदस्यीय चुनाव संचालन समिति कु गठन करी. ई समिति मा सांसद प्रदीप टम्टा, उपनेता प्रतिपक्ष करण माहरा, विधायक हरीश धामी, सहित कई अन्य वरिष्ठ कांग्रेसी शामिल छन.
- दुर्गम क्षेत्रुं मा चौपाल लगै की अधिकारी सुंणला जन समस्या
सीएम तीरथ सिंह रावत न अधिकार्यू थै जनता की समस्याऊं का समाधान कन्ना निर्देश दिनी. दगड़ा मा ऊंन सबी जिलाधिकारी, मुख्य विकास अधिकार्यूं थै दूरस्थ क्षेत्रूं मा रात्रि विश्राम करी चौपाल का माध्यम से लोखूं की समस्या समाधान कन्ना निर्देश दिनी. यां से पैली ऊंन राजकीय प्राथमिक विद्यालय धोबीघाट, दुगड्डा मा आयोजित रात्रि चौपाल मा वर्चुअल माध्यम से प्रतिभाग करी, चौपाल मा 21 समस्याऊं में से 17 कु मौके पर ही निस्तारण करे गी.
- बैरागी अखाड़ों का तीनी आणियों की धर्मध्वजा स्थापित
हरिद्वार महाकुंभ मा आज बैरागी अखाड़ों का तीनी आणियों की धर्मध्वजा स्थापित ह्वे. ये दौरान साधु-संतूं पर हेलीकॉप्टर से फूलों की बरखा करे गी. धर्मध्वजा कार्यक्रम मा अखाड़ा परिषद का अध्यक्ष, आईजी कुंभ, मेलाधिकारी कुंभ का दगड़ा ही कई पुलिस व प्रशासनिक अधिकारी भी मौजूद रैन.
- आचार्य महामंडलेश्वर न करी नगर भ्रमण
आज निरंजनी और आनंद अखाड़ा के आचार्य महामंडलेश्वर न नगर भ्रमण करी. ये नगर भ्रमण कनखल आद्य शक्ति आश्रम बटी शुरू ह्वे की दक्षिण काली मंदिर मा समाप्त ह्वे. नगर भ्रमण का दगड़ा ही आचार्य महामंडलेश्वर न मेला छावनी मा प्रवेश करी.
- 6 मैनौ खुली गंगोत्री नेशनल पार्क
विश्व प्रसिद्ध गंगोत्री नेशनल पार्क थै पर्यटकूं थै खोले गी. शासन का आदेश पर गंगोत्री नेशनल पार्क का कनखू बैरियर का गेट ग्रीष्मकाल थै खोले गिन. गंगोत्री नेशनल पार्क करीब 1800 मीटर से 7083 मीटर की ऊंचाई पर स्थित च. यू करीब 2390 वर्ग किमी क्षेत्रफल मा फैल्यूं च. यख गौमुख सहित गंगोत्री ग्लेशियर, डोकरानी ग्लेशियर मा स्थित शिवलिंग, सतोपंथ जैसी गगनचुम्बी हिमशिखर छन.
- उत्तरसू गौं मा बगड़वाल नृत्य कु समापन
तल्ला नागपुर क्षेत्र का उत्तरसू गौं मा भी बगड़वाल नृत्य आयोजित करे गी, जैकू समापन प्रसाद वितरण का दगड़ि ह्वे गी. ये दौरान देवता का रूप मा पूजे जांण वाला जीतू बगड़वाल का जागरुं का बीच ग्रामीणों न खूब नृत्य करी. दगड़ा मा ही जीतू बगड़वाल से सुख-शांति और समृद्धि की कामना भी करे गी.
